އިނގިރޭސިވިލާތުގެ ޗެޝަޔާގައި ހަރަކާތްތެރިވާ ދީނީ ގްރޫޕެއްގެ މެންބަރުންގެ މައްޗަށް ކުރެވޭ ޖިންސީ ގޯނާ އާއި، މަޖުބޫރުން ކައިވެނި ކުރުވުމާއި އަދި ޒަމާނީ އަޅުވެތިކަމުގެ ސީރިއަސް ތުހުމަތުތަކަކާ ގުޅިގެން ނުވަ މީހަކު ހައްޔަރުކޮށްފި އެވެ.
މި ތަހުގީގުގެ ދަށުން ކްރޫ ސިޓީގެ ތިން ސަރަހައްދެއް ބަލައި ފާސްކުރުމަށް ފަސްސަތޭކައަށްވުރެ ގިނަ ފުލުހުން ވަނީ ހަރަކާތްތެރިވެފަ އެވެ. މި އޮޕަރޭޝަން އަމާޒުކޮށްފައިވަނީ މި ގަރުނުގެ ކުރީކޮޅު ޝިއައީ އިސްލާމްދީނުގެ ތެރެއިން އުފެދުނު "އަހުމަދީ ރިލިޖަން އޮފް ޕީސް އެންޑް ލައިޓް" ނަމަކަށް ކިޔާ ޖަމާއަތަކަށެވެ.
ޗެޝަޔާ ފުލުހުން ހާމަކުރި ގޮތުގައި މި މައްސަލައިގެ ތަހުގީގު ފަށާފައިވަނީ 2023 ވަނަ އަހަރު ހިނގާފައިވާ ކަމަށް ބުނާ ހާދިސާތަކެއްގެ ރިޕޯޓު މިދިޔަ މަހު ލިބުމާ ގުޅިގެންނެވެ. މި ތުހުމަތުތައް އަމާޒުވެފައިވަނީ އެ ދުވަސްވަރު އެ ގުރޫޕްގެ މެންބަރެއްގެ ގޮތުގައި ހުރި އަންހެނަކަށް ކުރި އަނިޔާތަކަކާ ގުޅިގެންނެވެ. މިހާރު 150 އެއްހާ މެންބަރުން ތިބި މި ގުރޫޕުން ހައްޔަރުކުރި މީހުންގެ ތެރޭގައި ހިމެނެނީ ހަ ފިރިހެނުންނާއި ތިން އަންހެނުންނެވެ. މީގެ ތެރޭގައި އެމެރިކާ، މެކްސިކޯ، އިޓަލީ، ސްޕެއިން އަދި އިނގިރޭސިވިލާތަށް ނިސްބަތްވާ މީހުން ހިމެނެ އެވެ.
ފުލުހުންގެ އިސް އޮފިޝަލެއް ކަމަށްވާ ޗީފް ސުޕްރިންޓެންޑެންޓް ގަރެތު ރިގްލީ ވިދާޅުވީ، މިއީ އެ ދީނީ ގްރޫޕާ ދެކޮޅަށް ކުރެވޭ ތަހުގީގަކަށްވުރެ ބޮޑަށް، އެ ގްރޫޕްގެ ވަކިވަކި މެންބަރުންގެ މައްޗަށް ހުށަހެޅިފައިވާ ސީރިއަސް ޖިނާއީ ތުހުމަތުތަކެއްގެ ތަހުގީގެއް ކަމަށެވެ. އަދި މި އޮޕަރޭޝަނުގެ ތެރެއިން އާންމު ނިޒާމާ ހިލާފުވި ކަމުގެ ތުހުމަތުގައި އިތުރު 13 މީހަކު ވެސް ވަނީ ހައްޔަރުކޮށްފަ އެވެ.
މި އޮޕަރޭޝަން ހިންގާފައިވަނީ އަންގާރަ ދުވަހުގެ ހެނދުނު 08:50 ހާއިރުއެވެ. ފުލުހުންގެ ގިނަ އަދަދެއްގެ އުޅަނދުތަކާއި އެމްބިއުލާންސްތައް ކިންގް ޖޯޖް5 ޕާކާއި ވިކްޓޯރިއާ އެވެނިއު ސަރަހައްދުގައި ހަރަކާތްތެރިވަމުންދިޔަ މަންޒަރު ފެނިފައިވާކަމަށް ބީބީސީން ރިޕޯޓުކޮށްފައި ވެ އެވެ. ފުލުހުން ވަނީ އެ ގުރޫޕްގެ މިލްކިއްޔާތުގައި ހުރި ތިން އިމާރާތެއް ބަލައި ފާސްކޮށްފަ އެވެ.
ހައްޔަރުކުރި މީހުންގެ ތެރޭގައި އިންސާނީ ވަގުފާރި އާއި، ރޭޕް ކުރުމާއި، ޖިންސީ ގޯނާ އަދި މަޖުބޫރުން ކައިވެނި ކުރުވި ކަމުގެ ތުހުމަތު ކުރެވޭ މީހުން ހިމެނެ އެވެ. މި އޮޕަރޭޝަނުގައި ޔޫރޯޕޯލްގެ އެހީތެރިކަމާއެކު އަޔަލޭންޑާއި ސްވިޑަންގެ ފުލުހުން ވެސް ބައިވެރިވެފައި ވެ އެވެ.
ޗެޝަޔާ އީސްޓް ކައުންސިލުން ބުނި ގޮތުގައި، މި ހާދިސާއާ ގުޅިގެން ހާލުގައި ޖެހުނު މީހުންނަށް ރައްކާތެރިކަމާއި އެހީތެރިކަން ފޯރުކޮށްދިނުމުގެ މަސައްކަތް ދަނީ ކުރަމުންނެވެ. އަދި ކްރޫ އެންޑް ނެންޓްވިޗް ދާއިރާގެ މެންބަރު ކޮނޯ ނެއިސްމިތު ވިދާޅުވީ، މި ހާދިސާގެ ސަބަބުން އާންމުންގެ މެދުގައި އުފެދިފައިވާ ބިރުވެރިކަން ނައްތާލުމަށް ފުލުހުންގެ ތަހުގީގު އަވަސްކުރުމަށް އެދިވަޑައިގެންފައިވާ ކަމަށެވެ.
އިސްލާމްދީނުގެ މައިގަނޑު ޖަމާއަތްތަކުން ވަނީ "އަހުމަދީ ރިލިޖަން އޮފް ޕީސް އެންޑް ލައިޓް" އަކީ އެމީހުންނާ ގުޅުމެއް ނެތް ބައެއް ކަމަށް މީގެ ކުރިން ވެސް ބުނެފަ އެވެ. އަދި މިއީ އިނގިރޭސިވިލާތުގައި ބޮޑު އާބާދީއެއް އޮންނަ އަހުމަދިއްޔާ މުސްލިމް ޖަމާއަތާ ގުޅުމެއް އޮތް ބައެއް ނޫންކަން ވެސް ފުލުހުން ފާހަގަކުރެ އެވެ. ފުލުހުން ވަނީ މި ސަރަހައްދުގެ ސަލާމަތީ ކަންކަން ވަރުގަދަކޮށް، އާންމުންނަށް އެއްވެސް ނުރައްކަލެއް ނެތްކަމުގެ ޔަގީންކަން ދީފަ އެވެ.
