ރާއްޖޭގެ އިގްތިސާދީ އަދި ހިންގުމުގެ ނިޒާމަށް ކުރިމަތިވެފައިވާ ގޮންޖެހުންތަކުން އަރައިގަތުމަށްޓަކައި، ހުރިހާ ސިޔާސީ ޕާޓީތަކެއް ބައިވެރިވާ މަޝްވަރާތަކެއް ނުވަތަ އޯލް ޕާޓީ ޓޯކްސް ބޭއްވުމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް ގޮވާލައްވައިފި އެވެ.
މިއަދުގެ ވަގުތެއްގައި ސަރުކާރުގެ ވަޒީރުންގެ މަޖިލީހަށް ބޮޑެތި ބަދަލުތަކެއް ވަނީ އައިސްފަ އެވެ. ރައީސް މުހައްމަދު މުއިއްޒު އަންގަވައިގެން ނުވަ މިނިސްޓަރަކު މިހާރު ވަނީ އިސްތިއުފާ ދެއްވާފަ އެވެ.
މިއަދު އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ ޅި ކެބިނެޓް އެކީގައިހެން ބަދަލުވެގެން ދިއުމަކީ ވަކި ހާދިސާއެއްގެ ގޮތުގައި ބެލެވެން ނެތް ކަމަށެވެ. އަދި މިއީ ރައްޔިތުންގެ މެދުގައި ސަރުކާރަށް އޮތް ތާއިދު ކުޑަވަމުންދާކަމުގެ ހެއްކެއް ކަމަށް ވެސް އޭނާ ވިދާޅުވި އެވެ.
"ރާއްޖެއަށް ކުރިމަތިވެފައިވާ އިގްތިސާދީ އަދި ހިންގުމުގެ ދާއިރާގެ މައްސަލަތަކަށް ހައްލެއް ހޯއްދެވުމަށް ހުރިހާ ސިޔާސީ ޕާޓީތަކެއް އެއް މޭޒަކަށް ގެނައުމަށް ރައީސް މުއިއްޒުއަށް ގޮވާލަން،" ފައްޔާޒު ވިދާޅުވި އެވެ.
ގައުމުގެ މާލީ ހާލަތު ނާޒުކު ފައްތަރެއްގައި އޮތް ދަނޑިވަޅެއްގައި އަދި ދުނިޔޭގެ މަސްރަހު ނުތަނަވަސްވެފައިވާ ވަގުތެއްގައި، ރާއްޖެއަށް ގައުމީ މަސްލަހަތު އިސްކުރައްވަން ފައްޔާޒު ގޮވާލެއްވި އެވެ.
އޭނާ ވިދާޅުވި ގޮތުގައި މިވަގުތު ގައުމަށް އެންމެ މުހިންމީ ސިޔާސީ ހިޔާލު ތަފާތުވުންތައް އެއްފަރާތްކޮށް، ގައުމީ ބޮޑެތި މައްސަލަތަކުގައި އެންމެން ގުޅިގެން މަސައްކަތް ކުރުން ކަމަށެވެ.
ރައްޔިތުންގެ މަޖިލީހުގައި އޮތް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ސުޕަމެޖޯރިޓީއިން ގާނޫނުއަސާސީއަށް ގެނެސްފައިވާ ބަދަލުތަކާ މެދު ދެ ޕާޓީގެ މެދުގައި މަޝްވަރާކޮށް ހައްލު ހޯދުމަށް އެމްޑީޕީގެ ޗެއާޕާސަން އަބްދުލްޣަފޫރު މޫސާ ވެސް އިއްޔެ ގޮވާލެއްވި އެވެ.
އިދިކޮޅު ޕާޓީތަކުގެ އިސްވެރިން މި ގޮތަށް ގޮވާލަމުން އަންނައިރު ސަރުކާރުން އަދި މިކަމުގައި އެއްވެސް ބަހެއް ބުނެފައެއް ނުވެ އެވެ.
