ނޫސްވެރިން ލިޔާ ހަބަރެއްގެ ސަބަބުން ޖިނާއީ އެއްވެސް ފިޔަވަޅެއް އަޅައިގެން ނުވާނެ ކަމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ރާއްޖޭގައި އޮތް މިނިވަން ނޫސްވެރިކަމުގެ މާހާއުލު އެއްކޮށް ފުނޑުފުނޑުކޮށްލައި ނޫސްތަކާއި ނޫސްވެރިންނަށް ދައުލަތުގެ އިދާރާތައް މެދުވެރިކޮށް އެތައް ގޮންޖެހުމެއް މުއިއްޒު ސަރުކާރުން އަންނަނީ ކުރިމަތި ކުރަމުންނެވެ.
ސަންގު ޓީވީގެ 11 ވަނަ އަހަރީ ދުވަހުގެ ހަފްލާގައި ވާހަކަ ދައްކަވަމުން ފައްޔާޒު ވަނީ މިއީ ފެހި ގާނޫނުއަސާސީއަށް އަމަލުކުރަން ފެށި ފަހުން މައުލޫމާތު ހޯދުމަށް އެންމެ ބޮޑަށް ގޮންޖެހުން ކުރިމަތިވަމުން އަންނަ ދުވަސްތައް ކަމަށް ވިދާޅުވެފަ އެވެ.
"އަޅުގަނޑު އަބަދުވެސް ގަބޫލުކުރަނީ ދޮގު ހެދި ކަމުގައި ވިޔަސް، ތެދު ހެދި ކަމުގައިވިޔަސް، ނޫސްވެރިންނާ ދޭތެރޭ ޖިނާއީ ފިޔަވަޅު އެޅިގެން ނުވާނެ ކަމަށް،" އެމްޑީޕީ ސަރުކާރުގައި އިކޮނޮމިކް މިނިސްޓަރުކަން ކުރެއްވި ފައްޔާޒު ވިދާޅުވި އެވެ.
ދޮގު ހަބަރު ފެތުރުމަކީ ރަނގަޅު ކަމެއް ކަމަށް ދެކެވަޑައިނުގަންނަވާ ކަމަށާއި ޑިމޮކްރަސީ ހިމާޔަތްކޮށް ހުދުމުހުތާރު ވެރިންގެ ކިބައިން ރައްޔިތުން ސަލާމަތް ކުރުމަށް ނޫސްވެރިންނަށް ތަންމިނަށް ޖާގަ ދޭން ޖެހޭ ކަމަށް ފައްޔާޒު ވިދާޅުވި އެވެ.
"ތެދު ހެދިޔަސް ގާނޫނުތަކެއް ބޭނުންކޮށްގެން ހުދުމުހުތާރު ވެރިން އަބަދުވެސް ބޭނުންވާނީ ނޫސްވެރިންގެ އަނގަ ބަންދުކުރަން. ހަމަ އެހާމެ މުހިންމު ކަމެއް ތެދު ހަބަރު ފެތުރުމަކީ ވެސް، އެކަން ކުރާނީ ނޫސްވެރިން، ސިވިލް ސޮސައިޓީގެ ފަރާތުން، ސަރުކާރު ނުކުމެ ކްރިމިނަލް ދައުވާ އުފުލައިގެނެއް ނޫން،" ފައްޔާޒު ވިދާޅުވި އެވެ.
ވެރިކަން ކުރަން އަންނަ މީހެއްގެ ވިސްނުމާއި ފިކުރު ހުންނަ ގޮތަކުން ނޫސްވެރިކަމަށް ވަރަށް ބޮޑަށް އަސަރުކުރާ ކަމަށް ފައްޔާޒު ވިދާޅުވި އެވެ.
ފައްޔާޒު މިހެން ވިދާޅުވިއިރު އަދަދު ނޫހުގެ ސީއީއޯ ހުސައިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ފަސް ކުށެއްގެ ތުހުމަތުކޮށް ފުލުހުން ވަނީ ތަހުގީގެއް ފަށާފަ އެވެ.
ރިޕޯޓާސް ވިތައުޓް ބޯޑާސް (އާރުއެސްއެފް) ގެ ނޫސްވެރިކަމުގެ މިނިވަންކަމުގެ އިންޑެކްސްގައި މި އަހަރު ރާއްޖެ ވަނީ ހަތަރު ދަރަޖަ ފަހަތަށް ވެއްޓިފަ އެވެ.
މި އަހަރުގެ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ އޮތީ 180 ގައުމުގެ ތެރެއިން 108 ވަނައިގަ އެވެ. މިދިޔަ އަހަރު ރާއްޖެ ރޭންކު ކުރެވިފައި އޮތީ 104 ވަނައިގަ އެވެ. ރައީސް މުހައްމަދު މުއިއްޒުގެ ވެރިކަން ފެށުނުއިރު ރާއްޖެ ރޭންކު ކޮށްފައި އޮތީ 100 ވަނައިގަ އެވެ.
