ކުރީގެ ރައީސް އަބްދުالله ޔާމީންގެ ޕީޕަލްސް ނެޝަނަލް ފްްރޮންޓް (ޕީއެންއެފް) އިން މިހާރު ކުރިއަށްގެންދާ ސިލްސިލާ މަގުމަތީ ހަރަކާތްތަކުެގ ލައިވް ކަވަރޭޖު ހުއްޓާލުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އަންގައިފި އެވެ.
މައުލޫމާތު ލިބިފައިވާ ގޮތުގައި އެ ކޮމިޝަނުން ޗެނަލް 13 އަށް މި ގޮތަށް އެންގީ ބަލަމުންދާ މައްްސަލައަކާ ގުޅިގެންނެެވެ. އެއީ ކޮން މައްސަލައެއްކަން މިހާތަނަށް އެނގިފައި ނުވި ނަމަވެސް އެ މައްސަލައާ މެދު ވަކި ގޮތެއް ނިންމަންދެން މުޒާހަރާގެ ލައިވް ކަވަރޭޖު ހުއްޓާލުމަށް އެ ޗެނަލަށް ވަނީ އަންގާފަ އެވެ.
މީގެ ކުރިން އޮތް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ތަހުގީގު ކުރި މައްސަލައަކާ ގުޅިގެން ސެޕްޓެމްބަރު 17، 2025 ގައި ވެސް ޗެނަލް 13 ގެ ބްރޯޑްކާސްޓް ދެ ގަޑިއިރަށް މެދުކަނޑާލި އެވެ. އަދި އޮގަސްޓު 2025، ގައި ކުރީގެ ރައީސް އަބްދުﷲ ޔާމީން ބައިވެރިވާ ޖަލްސާއެއް އެ ޗެނަލްއިން ދުރަށް ފޮނުވަން ތައްޔާރުވެފައި ވަނިކޮށް ބްރޯޑްކާސްޓް ހުއްޓާލަން ވެސް އެންގި އެވެ.
ޕީއެންއެފް އިން މުޒާހަރާ ކުރަނީ މަޖީދީ މަގު ކޮޅުގައި އާޓިފިޝަލް ބީޗު ކުރިމަތީގަ އެވެ. އެ މުޒާހަރާގެ ތެރެއިން މަގުމަތީގައި ބޭންދި ސޯފާއެއް ވެސް ކުޑަ ވަގުތުކޮޅަކަށް ފުލުހުން އެއް ރެޔަކު ގެންދިޔަ އެވެ.
އެމްޑީޕީ އާއި ޕީއެންއެފް އިން ސަރުކާރާ ދެކޮޅަށް މުޒާހަރާ ކުރަން ފެށީ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުން ސަރުކާރަށް ލިބުނު ބޮޑު ނާކާމިޔާބީއަށްފަހު އެވެ.
އެމްޑީޕީ އާއި ޕީއެންއެފް އިން ބުނަނީ ރައީސް މުހައްމަދު މުއިއްޒު އިސްތިއުފާ ދެއްވައި، އިންތިގާލީ ވެރިކަމެއް ރާއްޖޭގައި ގާއިމް ކުރަންޖެހޭ ކަމަށެވެ.
