މި ފާއިތުވި 2025 ވަނަ އަހަރު ނިމުމުގެ ކުރިން މާފަންނު މަދަރުސާގެ ގްރައުންޑް ފްލޯގައި ހޯލެއް އިމާރާތްކޮށްދެއްވާނެ ކަމަށް ވިދާޅުވެ، އެ ސްކޫލުގެ ތުއްތު ދަރިވަރުންނަށް ރައީސް މުހައްމަދު މުއިއްޒު ވެވަޑައިގެންނެވި ވައުދު ވެސް ނުފުއްދެވި އެވެ.
މެދުކެނޑުމެއް ނެތި ހިންގަމުންދާތާ 42 އަހަރުވެފައިވާ މާފަންނު މަދަރުސާގެ ހޯލު ހުންނަނީ ސްކޫލުގެ ތިން ވަނަ ފަންގިފިލާގަ އެވެ. އެއީ މީގެެ ވަރަށް ގިނަ އަހަރުތަކެއްގެ ކުރިން ޑިޒައިންކޮށް އިމާރާތްކޮށްފައިވާ ތަނެކެވެ.
މާފަންނު މަދަރުސާގެ އެންމެ ތިރީގައި ހޯލެއް އިމާރާތްކޮށްދެއްވާނެ ކަމަށް މުއިއްޒު ވައުދުވެވަޑައިގެންނެވީ، އެކަން ކޮށްދެއްވުމަށް އެ ސްކޫލުގެ ތުއްތު ދެ ދަރިވަރަކު، ސްކޫލަށް 40 އަހަރު ފުރުމުގެ މުނާސަބަތުގައި ބޭއްވި ޖަލްސާގައި އެދުމުންނެވެ.
"އަޅުގަނޑު ހަމަ އަވަސްވެގަންނާނީ، އަދި ތުއްތު ލޮބުވެތި ދަރިވަރުން މިތަނުގައި މި ސްކޫލަށް ދަތިވެފައިވާ ކަންކަން ފާހަގަކޮށް، އެހާ ޝައުގުވެރިކަމާއެކީ އެކަންކަން ފާހަގަކޮށްދިނީތީއާ އެކީގައި، ފުރަތަމަ ވެސް އަޅުގަނޑު ބޭނުންވަނީ ޔަގީންކަންދޭން، އިރާދަކުރެއްވިއްޔާ މި އަންނަ އަހަރު މި ސްކޫލްގައި ތިޔަ ލޮބުވެތި ތުއްތު ކުދިންގެ މާމައިންނާއި ކާފައިންނަށް ފަސޭހައިން ވަދެވޭ ގޮތަށް ބިންމަތީގައި ހުންނަ ހޯލެއް ހަދައިދޭނެ ކަމުގެ ޔަގީންކަން،" ޑިސެމްބަރު 7، 2024، ގައި މުއިއްޒު ވިދާޅުވި އެވެ.
މުއިއްޒު އެހެން ވިދާޅުވި ނަމަވެސް މާފަންނު މަދަރުސާގެ ހޯލު ތިރީގައި އިމާރާތް ކުރުމުގެ އެއްވެސް މަސައްކަތެއް މިހާތަނަށް ކޮށްފައެއް ނުވެ އެވެ. އަދި އެފަދަ މަސައްކަތެއް ކުރަން ރޭވި ކަމެއް ވެސް އެނގިފައެއްނުވެ އެވެ.
ސްކޫލުގެ ތިރީގައި ހޯލެއް އިމާރާތްކޮށްދޭން މާފަންނު މަދަރުސާގެ ދަރިވަރުން އެދުނީ ތިން ވަނަ ފަންގިފިލާފައި ހޯލް ހުންނާތީ ހަފުލާތައް ބޭއްވުމަށް ދަތިވުމާއި އުމުރުން ދުވަސްވީ މީހުންނަށް ސިޑިން މައްޗަށް އަރަން އުނދަގޫކަމުންނެވެ.
"މާފަންނު މަދަރުސާގެ ހޯލު ހުންނަނީ ތިން ވަނަ ފަންގިފިލާގައި، ދެން ކިހާ އުނދަގޫވާނެ ހަފުލާތައް ބާއްވަން. އަޅުގަނޑުމެންގެ ލޯބިވާ މާމަ އާއި ކާފަމެންނަށް މިފަދަ އުފާވެރި ހަފުލާތަކުގައި ބައިވެރިނުވެވޭ. މިއީ އަޅުގަނޑުމެން ވަރަށް ދެރަވާ ކަމެއް،" ދަރިވަރަކު ބުންޏެވެ.
މާފަންނު މަދަރުސާގެ ދަރިވަރުން މުއިއްޒު އަރިހުން ދެން އެދުނީ ސްކޫލުގެ ތިރީގައި ހޯލެއް އިމާރާތްކޮށްދެއްވުމަށެވެ.
"މިއީ އަޅުގަނޑުމެން ވަރަށް ދެރަވާ ކަމެއް. އެހެންވީމާ އަޅުގަނޑުމެންގެ މި ވާހަކަތައް އެއްސެވުމަށް އަޅުގަނޑުމެން ދެކެ ނުހަނު ލޯބިފުޅުވާ އަޅުގަނޑުމެންނަށްޓަކައި ސްކޫލަށް ވަރަށް ގިނަ ކަންތައްތަކެއް ކޮށްދެއްވާފައިވާ ލޮބުވެތި ރައީސް ޑރ. މުއިއްޒު ބޭބެ ވެސް އިންނެވުމާއެކު މުއިއްޒު ބޭބެގެ އަރިހުން ވަރަށް އަދަބުވެރިކަމާއެކު އަޅުގަނޑުމެންނަށް ހޯލެއް ތިރީގައި ބިނާކޮށްދެއްވުމަށް އެދި ދަންނަވަން،" އެ ދަރިވަރު ބުންޏެވެ.
