އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް ވާދަ ކުރަން ނިންމީ ވަކި މީހެއްގެ މަސްލަހަތު ހިމާޔަަތް ކުރުމަށް ނޫން ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި މީކާއިލް ވަނީ އޭނާގެ "އިތުބާރު" ކެމްޕޭން ލޯންޗުކޮށްފަ އެވެ. އޭނާ ވާދަކުރައްވަނީ ކުރީގެ ރައީސް އިބްރާހިމް މުހައްމަދު ސޯލިހު،އެމްޑީޕީގެ ރައީސް އަބްދުالله ޝާހިދު، ކުރީގެ ނައިބު ރައީސް ފައިސަލް ނަސީމް، އަދި އެމްޑީޕީ ޕީޖީގެ ގިނަ މެންބަރުންގެ ތާއިދާ އެކު ކަމަށް މީކާއިލް މިއަދު ވިދާޅުވި އެވެ.
"ހަމަހަމަކަމާއެކު ވަކި މީހެއްގެ މަސްލަހަތަށް ނުބަލައި އެ ބޭފުޅުންގެ މެދުގައި ކަންކަން ނިންމައިދޭނެ ކަމުގެ އިތުބާރު އަޅުގަނޑުގެ މައްޗަށް އޮތީމައި، އެ ބޭފުޅުންގެ ވެސް ހިޔާލުތައް ހިމަނައިގެން އެންމެން އެކުއެކީ 2028 އާ ހަމައަށް ގެންގޮސް އަޅުގަނޑުގެ ޗެއާޕާސަން ކަމުގައި 2028 ކާމިޔާބު ކޮށްދޭނެ ކަމުގެ އިތުބާރު އަޅުގަނޑުގެ މައްޗަށް އޮތީމައި އެ ތިއްބެވީ،" މީކާއިލް ވިދާޅުވި އެވެ.
ޗެއާޕާސަންގެ އިންތިހާބުގައި ދެން ވާދަކުރައްވަނީ ކުރީގެ ރައީސް މުހައްމަދު ނަޝީދު އާއި އެ ޕާޓީގެ ނައިބު ރައީސްކަން ކުރެއްވި އަލްހާން ފަހުމީ އެވެ. އޭގެ ތެރެއިން ނަޝީދު ވަނީ 2028 ގެ އެމްޑީޕީގެ ރިޔާސީ ޕްރައިމަރީގައި ކުރީގެ ޗެއާޕާސަން ފައްޔާޒު އިސްމާއީލަށް ތާއިދު ކުރައްވާކަން ހާމަކުރައްވާފަ އެވެ.
"އަޅުގަނޑުގެ ވިސްނުމެއް ނޫން މީގައި މުހިންމީ. މީގައި މުހިންމީ ޕާޓީގެ އާންމު މެންބަރުންގެ ވިސްނުން، އާންމު މެންބަރުންގެ މަސްލަހަތު. އަޅުގަނޑުމެން އެބަޖެހޭ އެ މީހުންގެ ގާތަށް ދާން އެނގޭތޯ، ތި ބޭފުޅުން ބޭނުންވަނީ ކޮން ގޮތެއްތޯ އަހަން،" މީކާއިލް މިއަދު ވިދާޅުވި އެވެ.
އެމްޑީޕީ ހިންގަން ޖެހޭނީ އާންމު މެންބަރުން ބޭނުންވާ ގޮތަށް ކަމަށާއި އޭނާގެ ޗެއާޕާސަން ކަމުގައި މަޝްވަރާ ކުރުން ކުޑަވެގެން އެ ޕާޓީގެ ތެރޭގައި އޮތް އެއްބައިވަންތަކަން ގެއްލުމަށް ފުރުސަތު ނުދެއްވާނެ ކަމަށް މީކާއިލް ވިދާޅުވި އެވެ.
"އަޅުގަނޑު މި ހުރީ އެމްޑީޕީގެ ޗެއާޕާސަނެއްގެ ހައިސިއްޔަތުން ކުރިއަށް އޮތް ރިޔާސީ އިންތިހާބުގެ ޕްރައިމަރީގައި ވާދަކުރައްވަން ޝައުގުވެރިކަން ހުރި ހުރިހާ ބޭފުޅުންގެ މެދުގައި ވެސް އިންސާފުވެރިކަމާއެކު ހަމަހަމަކަމާއެކު، އެ ބޭފުޅުންނަށް ގަބޫލުކުރެއްވޭނޭ އިތުބާރު ކުރެވޭ، ޕްރައިމަރީއެއް ބާއްވައިދޭން ތައްޔާރަށޭ، އަޅުގަނޑު މި ހުރީ ވަކި ބޭފުޅަކާ އެކުގައި ނޫނޭ، މި ހުރީ އެމްޑީޕީގެ އާންމު މެންބަރުންނާ އެކުގައި."
ރައްޔިތުންގެ މަޖިލީހަށް ދެވަނަ ދައުރަކަށް 2024 ގައި އިންތިހާބުވި އެމްޑީޕީއަށް ނިސްބަތްވާ ހަތަރު މެންބަރުންގެ ތެރެއިން މީކާއިލްއަކީ އެކަކެވެ. އެންމެ ފަހުން އޮތް މަޖިލިސް އިންތިހާބުގައި ގަލޮޅު ދެކުނު ދާއިރާގެ ގޮނޑި މީކާއިލް ދިފާއުކުރެއްވި އެވެ.
މީކާއިލް އެމްޑީޕިއާ ގުޅުނީ 2012 ވަނަ އަހަރު ކުރީގެ ރައީސް މުހައްމަދު ނަޝީދު ހިންގެވި އެމްޑީޕީގެ ފުރަތަމަ ސަރުކާރު ބަގާވާތަކުން ވައްޓާލުމާ ގުޅިގެންނެވެ. އެ ޕާޓީގެ ޒުވާނުންގެ ހިތްވަރުގެ ރައީސްކަން ވެސް މީކާއިލް ކުރެއްވި އެވެ. އަދި މިވަގުތު ވެސް އޭނާއަކީ އެ ޕާޓީގެ ގައުމީ މަޖިލީހުގެ މެންބަރެކެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ.
ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގުރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
