ޒަމާނީ ކޮންވެންޝަން ސެންޓަރެއް ހިމެނޭ ގޮތަށް، އިވެންޓު ސެންޓަރެއް ތަރައްގީކުރަން ބިން ހިއްކުމުގެ މަސައްކަތް ފަށާފައިވާ އަތަމަނަ (ކުރިން ގަލުފަޅު) ފަރަށް ތެޔޮ އުފުލާ ބޯޓެއް އަރައިފި އެވެ.
އަދަދު އަށް އެނގިފައިވާ ގޮތުގައި މާލޭގެ ހުޅަނގުއުތުރުން 2.5 ކިލޯމީޓަރު ދުރުމިނުގައި އޮންނަ އަތަމަނައަށް އުރުނު ބޯޓާ ގުޅިގެން މިހާތަނަށް ފުލުހުންނާއި އެމްއެންއެންޑީއެފް އިން އެއްވެސް އެއްޗެއް ނުބުނެ އެވެ.
މާލޭގައި ހުންނަ ދަރުބާރުގޭގެ ބަދަލުގައި އިވެންޓުތަކާއި ޖަލްސާތަކާއި އެހެނިހެން ބައްދަލުވުންތައް ބާއްވަނެ ތަނެއް ގާއިމުކުރުމުގެ މަގުސަދުގައި ތަރައްގީކުރާ އަތަމަނައަކީ ބިންވެރިޔާ ސްކީމަށް ހުޅުމާލޭން ގޯތި ދޭން ޖެހުމާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ބަދަލުގެ ގޮތުގައި ދީފައި އޮތް ފަޅެކެވެ.
ނަމަވެސް މި ފަހުން ސަރުކާރުން ވަނީ އަތަމަނަގައި އެޗްޑީސީން ހިންގަން އުޅުނު އިވެންޓު ސެންޓަރު ޕްރޮޖެކްޓާ ހަވާލުވެ، ފިނޭންސުގެ ބެލުމުގެ ދަށުން މަސައްކަތް ފަށާފަ އެވެ. ސަރުކާރުން ވެސް މި ފަޅު ތަރައްގީކުރަނީ، އެޗްޑީސީން 2024 ވަނަ އަހަރު ދައްކާލި ޓްރާންސްފޯމިން ޓުމޯރޯ ޕްލޭންގެ ތެރެއިން ދައްކާލި، "ނޫވިލު" ޕްރޮޖެކްޓުގައި ދައްކާލި ކޮންސެޕްޓަށެވެ.
މި ފަޅުގެ ޑިވެލޮޕްމަންޓު ޕްލޭންގައިވާ ގޮތުން، މެދަށް ފުންކޮށް އޮންނަ 60 ހެކްޓަރުގެ ގަލުފަޅުގެ ވަށައިގެން އޮންނަ ތިލަ ސަރަހައްދުން ހިއްކަނީ 19.8 ހެކްޓަރެވެ.
މި ފަޅު ހިއްކާ ނިމުމުން ކުރިން ހުޅުމާލޭ އާބަން އައިލްގައި އަޅަން ބުނި އިންޓަނޭޝަލް ފައިނޭންޝަލް ސެންޓަރު މި ތަނުގައި ތަރައްގީކުރަން ވިސްނަމުންދާ ކަމަށް ވެސް މި ނޫހަށް މައުލޫމާތު ލިބިފައިވެ އެވެ. ނަމަވެސް، ރަސްމީ މަސްދަރަކުން މި ކަން ކަށަވަރުކުރެވޭ ގޮތެއް އަދި ނުވެ އެވެ.
