ދިރިއުޅުމުގެ އާދަކާދަތަކަށް އަންނަ ބަދަލުތަކާއެކު، އަމިއްލަ ސިއްހަތަށް ބަލައިގެން އުޅުމަކީ މުހިންމު ކަމެކެވެ. މީގެ ތެރެއިން އެންމެ އިސްކަމެއް ދޭންޖެހޭ އެއް ކަމަކީ ތިމާގެ ބަރުދަން ހުރީ ހުންނަންޖެހޭ މިންވަރަށްތޯ ބެލުމެވެ. މިއީ ބޮޑި މާސް އިންޑެކްސް (އެމްއައިބީ) މެދުވެރިކޮށް ފަސޭހަކަމާއެކު ދެނެގަނެވިދާނެ ކަމެކެވެ.
ބީއެމްއައި އަކީ ކޮބައި؟
ބީއެމްއައި އަކީ މީހެއްގެ އިސްކޮޅާ އަޅާބަލާއިރު ބަރުދަން ހުރި މިންވަރު އަންދާޒާކޮށްދޭ މިންގަނޑެކެވެ. މިއީ ބަރުދަނާއި އިސްކޮޅު ގެންލުމުން ނެރެވޭ އަދަދެކެވެ. މިއީ ސިއްހީ ނުރައްކާތައް ދެނެގަތުމަށް ބޭނުންކުރާ މުހިންމު ވަސީލަތެކެވެ.
ބީއެމްއައި މިންގަނޑުތައް ބެހިފައިވާ ގޮތް
އުމުރުން 20 އަހަރުން މަތީގެ މީހުންނަށް ބީއެމްއައި ބެލެވޭ މައިގަނޑު ހަތަރު ބަޔަކީ:
- 18.5 އަށް ވުރެ ދަށް: ބަރުދަން ލުއި
- 18.5 އާއި 24.9 އާ ދެމެދު: ދުޅަހެޔޮ ބަރުދަން
- 25.0 އާއި 29.9 އާ ދެމެދު: ބަރުދަން އިތުރު
- 30.0 އަށް ވުރެ މަތި: މާބޮޑަށް ބަރުދަން އިތުރުވުން
އޭޝިއާ ދަރިކޮޅުގެ މީހުންނަށް މި މިންގަނޑު ތަފާތެވެ. އެގޮތުން ބީއެމްއައި 23 އާއި 25 އާ ދެމެދުގައި ހުރިނަމަވެސް އެއީ ބަރުދަން އިތުރު މީހެއްގެ ގޮތުގައި ބެލެވިދާނެއެވެ. އަދި 25 އަށް ވުރެ މަތިވުމަކީ އޭޝިއާ މީހުންނަށް އޮބީސިޓީގެ ގޮތުގައި ބެލެވޭ މިންގަނޑެކެވެ.
ކުޑަކުދިންގެ ބީއެމްއައި ބަލަނީ ޕަސެންޓައިލް ރޭންކިންއަކުންނެވެ. އެއީ ކުދިން ބޮޑުވަމުން އަންނައިރު ހަށިގަނޑުގެ ސަރުބީއަށް އަންނަ ބަދަލުތައް އަންހެން ކުދިންނާއި ފިރިހެން ކުދިންގެ ތަފާތުވާތީއެވެ.
ބީއެމްއައި އަކީ ހަމައެކަނި ސްކްރީނިން ޓޫލްއެކެވެ. މީގެން ހަށިގަނޑުގެ ހުރިހާ ސިއްހީ މައުލޫމާތެއް ނުލިބޭނެއެވެ. ހަށިގަނޑުގެ ގުނަވަންތަކުގެ ވަށައިގެން ހުންނަ ސަރުބީ އަކީ ސިއްހީ ގޮތުން ނުރައްކާ އެއްޗެކެވެ. ނަމަވެސް ބީއެމްއައި އަކަށް ސަރުބީ ހުރި ތަނެއް ނޭނގޭނެއެވެ. ކަސްރަތުކުރާ މީހުންގެ މަސްގަނޑު ބޮޑުވުމުން ބީއެމްއައި މަތިވެދާނެއެވެ. ނަމަވެސް އެއީ ސަރުބީ ހުރެގެން ވާގޮތެއް ނޫނެވެ. އަންހެނުންގެ ހަށިގަނޑުގައި ފިރިހެނުންނަށް ވުރެ ގާތްގަނޑަކަށް 10 ޕަސެންޓު އިތުރަށް ސަރުބީ ހުރެއެވެ.
ދުޅަހެޔޮ ދިރިއުޅުމަކަށް ޕްލޭނެއް
ބީއެމްއައި ބެލުމަށްފަހު، ދުޅަހެޔޮ ބަރުދަނެއްގައި ހުރުމަށްޓަކައި އުނަގަނޑުގެ ވަށަމިނާއި، އުމުރާއި، އަދި ދުވާލަކު ހަރަކާތްތެރިވެ އުޅޭ މިންވަރަށް ބަލައި ކެއުމާއި ކަސްރަތުގެ ޕްލޭނެއް އެކުލަވާލުން މުހިންމެވެ.
