ކަނޑުދަތުރުފަތުރުގެ ދާއިރާގެ ރައްކާތެރިކަމާއި ހިންގުންތެރިކަން ހަރުދަނާކުރުމަށް ކުރަމުންދާ މަސައްކަތްތަކުގެ ދަށުން، އެލިއާ އިންވެސްޓްމެންޓްސް އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ހިންގާ "ބޯޓް އޮޕަރޭޓާސް ޓްރެއިނިން ޕްރޮގްރާމް 2026" ރަސްމީކޮށް ފަށައިފި އެވެ.
މި މަހުގެ 14 އިން 16 އަށް ކުރިއަށްގެންދާ މި ތަމްރީނު ޕްރޮގްރާމުގައި ރިސޯޓުތަކާއި، ކަނޑުދަތުރުފަތުރުގެ ޚިދުމަތްދޭ ކުންފުނިތަކުގެ އިތުރުން ސަރުކާރުގެ އެކި މުއައްސަސާތަކުން ޖުމްލަ 48 ކެޕްޓަނުން ބައިވެރިވެ އެވެ.
މިއީ ރާއްޖޭގެ އުޅަނދުފަހަރު ދުއްވާ ކެޕްޓަނުންގެ ފަންނީ ގާބިލުކަމާއި އަމަލީ ހުނަރުތައް އިތުރުކުރުމަށް އެލިއާ އިން މެދުކެނޑުމެއްނެތި މި ސިލްސިލާ ކުރިއަށްގެންދާ 12 ވަނަ އަހަރެވެ.
ތަމްރީނު ޕްރޮގްރާމުގެ މުހިންމު ބައިތައް:
- ކަނޑުމަތީގެ ގަވާއިދުތަކާއި ނެވިގޭޝަން: މިސްރާބު ހޯދުމުގެ ރައްކާތެރިކަމާއި ދަތުރުފަތުރުގެ އުސޫލުތައް.
- ކުއްލި ހާލަތްތަކަށް ތައްޔާރުވުން: ކުއްލި ދިމާވާ ހާދިސާތަކުގައި އަމަލުކުރާނެ ގޮތްތަކާއި، ފަސްޓް އެއިޑް އަދި އަލިފާނުގެ ހާދިސާތަކުން ރައްކާތެރިވުން.
- އަމަލީ ތަމްރީނު: ޔަމަހާ އައުޓްބޯޑް އިންޖީނުތައް މަރާމާތުކޮށް ބެލެހެއްޓުމާއި، ދިމާވާ ޓެކްނިކަލް މައްސަލަތައް ޚުދު އަމިއްލައަށް ހައްލުކުރުން.
އެލިއާ އިން ބުނި ގޮތުގައި މި ތަމްރީނުތަކުގެ ސަބަބުން ކަނޑުމަތީގައި ދިމާވާ ނުރައްކާތެރި ހާލަތްތަކުގައި އަވަސް އަދި ރަނގަޅު ނިންމުންތައް ނިންމުމުގެ ގާބިލުކަން ކެޕްޓަނުންނަށް ލިބިގެންދާނެ އެވެ. އަދި މިއީ ރާއްޖޭގެ ކަނޑުދަތުރުފަތުރުގެ ދާއިރާ ކުރިއެރުވުމަށާއި، މި ދާއިރާއަށް ބޭނުންވާ އިންސާނީ ވަސީލަތް ބިނާކުރުމަށް އެ ކުންފުނިން ދެމުންގެންދާ ހާއްސަ އަހައްމިއްޔަތެއްގެ ބައެކެވެ.
"ރާއްޖޭގައި ޔަމަހާ އިންޖީނުގެ އެކްސްކްލޫސިވް ޑިސްޓްރިބިއުޓަރުގެ ހައިސިއްޔަތުން، އެލިއާގެ އަމާޒަކީ ރައްކާތެރި އަދި ހަރުދަނާ ކަނޑުދަތުރުފަތުރުގެ ނިޒާމެއް ގާއިމުކުރުމަށް ބޭނުންވާ ފުރިހަމަ ތަމްރީނާއި އެހީތެރިކަން ފޯރުކޮށްދިނުން،" އެލިއާއިން ބުންޏެވެ.
ރާއްޖޭގެ ކަނޑުދަތުރުފަތުރުގެ ދާއިރާއަށް އަންނަމުންދާ ޒަމާނީ ބަދަލުތަކާ އެއްގޮތަށް، ހުނަރުވެރި އަދި ރައްކާތެރިކަމަށް އިސްކަންދޭ ކެޕްޓަނުންތަކެއް އުފެއްދުމުގައި މި ޕްރޮގްރާމް ކޮންމެ އަހަރަކުވެސް އަންނަނީ މުހިންމު ދައުރެއް އަދާކުރަމުންނެވެ.
