ގުދުސްގެ އޯލްޑް ސިޓީގައި ހުންނަ އަލް އަގްސާ މިސްކިތުގެ "ވެރިޔަކީ" އޭނާ ކަމަށް އިހުސާސް ކުރެވޭ ކަމަށާއި، އެ ތަނަށް ޔަހޫދީން ވަދެ އަޅުކަން ކުރުމަށް އޮންނަ ފުރުސަތުތައް އިތުރަށް ފުޅާކުރަން މަސައްކަތް ކުރާނެ ކަމަށް އިސްރާއީލުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން ގްވީރު އާދީއްތަ ދުވަހު ބުނެފި އެވެ.
ބެން ގްވީރު މި މޭރުމުން ވާހަކަދެއްކީ އިސްލާމްދީނުގެ އެންމެ މުގައްދަސް އެއް ބިނާ ކަމަށްވާ އަލްއަގްސާ މިސްކިތުގެ ހަރަމްފުޅަށް ގަދަބާރުން ވަދެގަތުމަށް ފަހު އެވެ. މިއީ މަހަކަށް ވުރެ ގިނަ ދުވަހު ފަލަސްތީނުގެ މުސްލިމުންނަށް އެ މިސްކިތް ބަންދުކޮށްފައި ބޭއްވުމަށް ފަހު، އަލުން ހުޅުވާލިތާ މަދު ދުވަސްކޮޅެއްގެ ތެރޭގައި ހިނގި ހާދިސާއެކެވެ.
އަލް އަގްސާ މިސްކިތުގެ ތެރޭގައި ހުރެ ރިކޯޑްކުރި ވީޑިއޯއެއްގައި، އިސްރާއީލުގެ ހަރުކަށި ކަނާތު ފިޔައިގެ މިނިސްޓަރު ބެން ގްވީރު ބުނީ، "މިއަދު އަޅުގަނޑަށް މިތަނުގެ ވެރިޔަކީ އަޅުގަނޑު ކަމުގެ އިހުސާސް ކުރެވޭ" ކަމަށެވެ. މި ވީޑިއޯ އާންމުކޮށްފައިވަނީ އޭނާގެ އޮފީހުންނެވެ.
އޭނާ އިތުރަށް ބުނީ، "އަދިވެސް ކުރަންޖެހޭ ކަންކަން އެބަހުރި ކަމަށާއި، ކަންކަން ރަނގަޅު ކުރަންޖެހޭ" ކަމަށެވެ. އަދި މިކަމުގައި އިތުރު ފިޔަވަޅުތައް އެޅުމަށް ބޮޑުވަޒީރު ބެންޖަމިން ނަތަންޔާހޫއަށް ބާރުއަޅަމުންދާ ކަމަށާއި، މި މަސައްކަތުގައި ކުރިއަށް ދާންޖެހޭ ކަމަށް ވެސް އޭނާ ބުންޏެވެ.
ބެން ގްވީރު މިފަދަ ވާހަކަތަކެއް ދައްކާފައި މިވަނީ، ފަލަސްތީނުގެ މުސްލިމުންނަށް އަލް އަގްސާ މިސްކިތަށް ވަނުން ހަނިކޮށް، އެ ތަނުގައި ޔަހޫދީންގެ ބާރުވެރިކަން އިތުރުކުރުމަށް އިސްރާއީލުން މަސައްކަތް ކުރަމުންދާ ދަނޑިވަޅެއްގަ އެވެ.
މި ހަފުތާގެ ކުރީކޮޅު އިސްރާއީލުން އަލް އަގްސާ މިސްކިތް ހުޅުވާލީ، 40 އަށްވުރެ ގިނަ ދުވަހު އެ ތަން ބަންދުކޮށްފައި ބޭއްވުމަށްފަހު އެވެ. އެ މުއްދަތުގެ ތެރޭގައި ރަމަޟާން މަހާއި، ފިތުރު އީދާއި، ހުކުރު ނަމާދުތަކަށް ވެސް ފަލަސްތީނުގެ ރައްޔިތުން އެ މިސްކިތަށް ވަނުން އޮތީ މަނާކޮށްފަ އެވެ. މީގެ ކުރިން މިހާ ގިނަ ދުވަހަށް މިސްކިތް ބަންދުކޮށްފައެއް ނުވެ އެވެ.
އިސްރާއީލުގެ ކަމާބެހޭ ފަރާތްތަކުން ވަނީ ހަރުކަށި ޔަހޫދީން އަލް އަގްސާ މިސްކިތަށް ވަންނަ ވަގުތުތައް އިތުރުކޮށް، ކޮންމެ ދުވަހަކު ކަހަލަ ގޮތަކަށް އެ ތަނަށް ވަދެގަތުމުގެ ފުރުސަތު އަލުން ދޭން ފަށާފަ އެވެ.
އަލްއަގްސާ މިސްކިތުގެ ކަންކަން ބަލަހައްޓަނީ އެތައް އަހަރެއްވީ ބައިނަލްއަގުވާމީ "ސްޓޭޓަސް ކޯ" އެއްބަސްވުމެއްގެ ދަށުންނެވެ. އެ އެއްބަސްވުމުގެ ދަށުން އެ ތަނަކީ އިސްލާމީ މުގައްދަސް ބިނާއެއްގެ ގޮތުގައި ބަލައިގަނެ، މިސްކިތަށް ވަނުމާއި، އަޅުކަން ކުރުމާއި، މިސްކިތް ބެލެހެއްޓުމުގެ ފުރިހަމަ ބާރު އޮންނަނީ މުސްލިމް އިދާރާތަކަށެވެ. އެ އެއްބަސްވުމުގެ ދަށުން ޔަހޫދީންނަށް އެ ތަނަށް ޒިޔާރަތް ކުރެވުނު ނަމަވެސް، އެ ތަނުގައި އަޅުކަން ކުރުމަކީ މަނާ ކަމެކެވެ.
ނަމަވެސް، ފަލަސްތީނުގެ ހުއްދައަކާ ނުލައި ހަރުކަށި ޔަހޫދީން އެ މިސްކިތަށް ވަދެގަތުމާއި، އެ ތަނުގައި އަޅުކަން ކުރުމަށް ފުރުސަތު ދީގެން އިސްރާއީލުން ދަނީ މި އެއްބަސްވުމާ ތަކުރާރުކޮށް ޚިލާފުވަމުންނެވެ.
މިގޮތަށް ތަކުރާރުކޮށް މިސްކިތަށް ވަދެގަންނަމުންދާތީ، އިސްރާއީލުން އެ ތަނުގެ ގަވާއިދުތައް ބަދަލުކޮށް، ޔަހޫދީންނަށް އަޅުކަން ކުރަން ވަކި ސަރަހައްދެއް ނުވަތަ ވަކި ވަގުތުތަކެއް ކަނޑައަޅައިފާނެ ކަމުގެ ބިރު ވަނީ ބޮޑުވެފަ އެވެ.
މިސްކިތް ބެލެހެއްޓުމާ ހަވާލުވެފައިވާ އުރުދުންއިން ބުނީ، ބެން ގްވީރުގެ މި އަމަލަކީ "ސްޓޭޓަސް ކޯ" އެއްބަސްވުމާ ޚިލާފުވުން ކަމަށާއި، އެއީ މިސްކިތުގެ މުގައްދަސްކަން ކުޑަކުރުމާއި، ގަބޫލުނުކުރެވޭ ފަދަ ފުރައްސާރައެއް ކަމަށެވެ.
ފަލަސްތީނުގެ ރައީސް މަހްމޫދު އައްބާސްގެ އޮފީހުން ބުނީ މިފަދަ އަމަލުތަކުގެ ސަބަބުން ސަރަހައްދުގެ ހަމަޖެހުން އިތުރަށް ގެއްލިގެން ހިނގައިދާނެ ކަމަށެވެ.
ބެން ގްވީރުގެ ތަރުޖަމާނު ބުނި ގޮތުގައި، އޭނާ މަސައްކަތް ކުރަނީ ޔަހޫދީންނަށް އެ ތަނަށް ވަދެވޭނެ އިތުރު ފުރުސަތުތަކާއި އަޅުކަން ކުރުމުގެ ހުއްދަ ހޯދައިދިނުމަށެވެ. އަދި ބެން ގްވީރު އެ ތަނުގައި އަޅުކަން ކުރި ކަމަށް ވެސް ތަރުޖަމާނު ކަށަވަރުކޮށްދިނެވެ.
