ކްލައިމެޓް ޗޭންޖް މިނިސްޓަރުގެ މަގާމަށް އަންގާރަ ދުވަހު އައްޔަން ކުރި އަލީ ޝަރީފުގެ ސޯޝަލް މީޑިއާގައި ޝާއިއު ކުރެއްވި ހުތުރު ޕޯސްޓުތަކެއް އާންމުވެ، ދައުރުވާން ފަށައިފި އެވެ.
އާންމުވެފައި ވަނީ ސޯޝަލް މީޑިއާ ޕްލެޓްފޯމް އެކްސްގައި އަލީ ޝަރީފު މީގެ ކުރިން ކުރައްވާފައިވާ ޕޯސްޓުތަކެކެވެ. އެއީ އޭނާ އެކައުންޓުކަން އަދަދު އިން ވާނީ ކަށަވަރުކޮށްފަ އެވެ.
އަލީ ޝަރީފު ކުރައްވާފައި ހުރި ޕޯސްޓުތަކުގެ ތެރޭގައި، ރައްޔިތުންގެ މަޖިލީހުގެ ކުރީގެ މެންބަރު އިބްރާހިމް އިސްމާއިލް (އިބްރާ) ގެ ނުކުޅެދުންތެރިކަމަށް ހަޖޫޖަހާފައި ހުރި ޕޯސްޓަކާއި ކުރީގެ ރައީސް މުހައްމަދު ނަޝީދަކީ ކާފަރެއް ކަމަށް ބުނެފައިވާ ޕޯސްޓަކާއި ބުރުގާ ނާޅާ އަންހެނުން އަމިއްލައަށް ފުރައްސާރައަށް މަރުހަބާ ކިޔާ ކަމަށް ބުނާ ޕޯސްޓެއް ހިމެނެ އެވެ.
"މީނާގެ ދެން ހުރި އަނގުނުތައް ސަލާމަތުން ﷲ ދެއްވީތީ މީނާ ޝުކުރުވެރިވާން އެބަޖެހޭ،" އިބްރާއަށް ނިސްބަތްކޮށް އަލީ ޝަރީފު ކުރެއްވި ޕޯސްޓެއްގައި ވިދާޅުވެފައިވެ އެވެ.
އޭގެ އިތުރުން އިންޑިއާގެ ބޮޑުވަޒީރު ނަރެންދުރަ މޯދީއަކީ ޓެރަރިސްޓެއް ކަމަށް ބުނާ ޕޯސްޓަކާއި ޑިމޮކްރަސީގެ ނިޒާމު ގަބޫލުނުކުރައްވާ ކަމަށް ބުނާ ޕޯސްޓަކާއި ބައެއް މީސްމިހުންނާ ދިމާލަށް ހުތުރު ބަހުން ވާހަކަ ދައްކާފައިވާ ޕޯސްޓުތަކެއް ވެސް އަލީ ޝަރީފު ކުރައްވާފައިވެ އެވެ.
އަލީ ޝަރީފުގެ ޕޯސްޓުތައް އަލުން އާންމުވުމުން އެ ޕޯސްޓުތަކަށް އާންމުންގެ ފާޑުކިޔުން ދަނީ އަމާޒުވަމުންނެވެ. އެގޮތުން، އޭނާ ކެބިނެޓަށް އައްޔަން ކުރުމުން ރައީސް މުހައްމަދު މުއިއްޒަށް ވެސް ބައެއް މީހުން ފާޑުކިޔާފައިވެ އެވެ.
"މިއީ ލަދުވެތި ކަމެއް، މުއިއްޒު. މިކަހަލަ އުރައްޕެއް ނެތް މީހުން ވަޒީރުކަމަށް ލީމާ ދެން ވެސް ވާނީ ފެއިލް،" އެކްސްގައި މީހަކު ކުރި ޕޯސްޓެއްގައި ބުނެފައިވެ އެވެ.
އަލީ ޝަރީފު ހިމެނިވަޑައިގަންނަވާ ގޮތަށް ކެބިނެޓަށް އާ ހަތަރު ވަޒީރަކު މުއިއްޒު ވަނީ އައްޔަން ކުރައްވައިފަ އެވެ. އެއީ ޑިފެންސް މިނިސްޓަރު ހަސަން ރަޝީދާއި ހެރިޓޭޖް މިނިސްޓަރު ހީނާ ވަލީދާއި ހެލްތު މިނިސްޓަރު ގީލާ އަދި ފޮރިން މިނިސްޓަރު އިރުތިޝާމް އާދަމް އެވެ.
ރައީސް މުއިއްޒު ކެބިނެޓަށް ބަދަލުތަކެއް މި ގެނައީ ނިމިދިޔަ ލޯކަލް ކައުންސިލްތަކުގެ އިންތިހާބާއި ފެންނަ ނުފެންނަ ވޯޓުން ސަރުކާރު ބޮޑުތަނުން ބަލިވި ފަހުންނެވެ. ކެބިނެޓުގެ 10 ވަޒީރަކު މުއިއްޒު ވަކި ކުރެއްވި އެވެ. ކެބިނެޓު އަލުން އެކުލަވާލިއިރު މިނިސްޓްރީތަކުގެ އަދަދު 20 އިން 15 އަށް ވަނީ ބަދަލުކޮށްފަ އެވެ.
