ދެކުނު ޗައިނާ ކަނޑުގައި މިލްކުވެރިކަމާ މެދު ދެބަސްވުން އުފެދިފައިވާ ސަރަހައްދެއްގައި ހަރަކާތްތެރިވި ޗައިނާގެ ބޯޓުތަކަކުން ސައިނައިޑް ފެނިފައިވާ ކަމަށް ފިލިޕީންސުން ބުނެފި އެވެ.
ފިލިޕީންސުން އިންޒާރު ދީފައިވާ ގޮތުގައި މިއީ އެ ސަރަހައްދުގެ މަސްމަހާމެހި ނައްތާލުމަށް ދީފާނެ ހަމަލާއެއްގެ ފެށުމަކަށް ވެދާނެ އެވެ.
ފިލިޕީންސްގެ ސަލާމަތީ އިދާރާތަކުން ހޯމަ ދުވަހު ބުނި ގޮތުގައި، ދެކުނު ޗައިނާ ކަނޑުގެ ސްޕްރެޓްލީ އައިލެންޑްސްގައި ހިމެނޭ "ސެކަންޑް ތޯމަސް ޝޯލް" ފަރުން މިދިޔަ އަހަރު ފިލިޕީންސްގެ ކަނޑުގެ ސިފައިން އަތުލައިގަތް ފުޅިތަކެއް ލެބޯޓްރީގައި ތަހުލީލު ކުރިއިރު، ނުރައްކާތެރި ވިހަ މާއްދާއެއް ކަމަށްވާ ސައިނައިޑް ވަނީ ފެނިފަ އެވެ.
ކަމާބެހޭ އޮފިޝަލުން އިންޒާރު ދެއްވި ގޮތުގައި، ސައިނައިޑްގެ ސަބަބުން ކަނޑުގެ ދިރުންތަކަށް ބޮޑެތި ގެއްލުންތަކެއް ލިބުމުގެ އިތުރުން، އެ ފަރުގެ ބާރު ދެރަވެދާނެ އެވެ. އެ ފަރަކީ ފިލިޕީންސްގެ ސަރަހައްދީ ދައުވާ ވަރުގަދަ ކުރުމަށްޓަކައި އެ ގައުމުގެ މަނަވަރެއް ބާއްވާފައިވާ މުހިންމު ސަރަހައްދެކެވެ.
ފިލިޕީންސްގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު ކޯނޭލިއޯ ވެލެންސިއާ ނޫސްވެރިންގެ ބައްދަލުވުމެއްގައި ވިދާޅުވީ، "އަޔުންގިން ޝޯލް" (ސެކަންޑް ތޯމަސް ޝޯލްއަށް ފިލިޕީންސުން ކިޔާ ނަން) ގައި ސައިނައިޑް ބޭނުންކުރުމަކީ އެ ސަރަހައްދުގެ މަސްތައް މަރާލުމަށް ހިންގާ އަމަލެއް ކަމަށެވެ. އަދި މީގެ ސަބަބުން އެ ސަރަހައްދުގައި ތިބޭ ކަނޑުގެ ސިފައިންނަށް ބޭނުންވާ މުހިންމު ކާނާގެ ބާވަތްތައް ނެތިގެންދާނެ ކަމަށް އޭނާ ފާހަގަކުރެއްވި އެވެ.
ވެލެންސިއާ އިތުރަށް ވިދާޅުވީ، ސައިނައިޑްގެ ސަބަބުން ފަރަށް ގެއްލުންވެ، އެ ސަރަހައްދުގައި ބާއްވާފައިވާ މަނަވަރަށް ނުރައްކާވެ، އެ އުޅަނދު އަޑިއަށް ދިއުމުގެ ފުރުސަތު އޮތް ކަމަށެވެ.
ޗައިނާގެ ފޮރިން މިނިސްޓްރީން ވަނީ ފިލިޕީންސްގެ މި ތުހުމަތުތައް ދޮގުކޮށް، އެއީ ސަމާލުކަން ހޯދުމަށް ހިންގާ "ސްޓަންޓެއް" ކަމަށް ބުނެފަ އެވެ.
ޗައިނާގެ ތަރުޖަމާނު ގުއޯ ޖިއާކުން ވިދާޅުވީ، އާންމު އުސޫލުން މަސްވެރިކަން ކުރަމުންދިޔަ ޗައިނާގެ ބޯޓުތަކަށް ފިލިޕީންސުން ގާނޫނާ ހިލާފަށް ހުރަސްއަޅައި، މަސްވެރިންގެ ސާމާނުތައް އަތުލައި، ސައިނައިޑްގެ ދޮގު ވާހަކަތަކެއް ފަތުރަމުންދާ ކަމަށެވެ. އަދި ފިލިޕީންސްގެ މި ވާހަކަތަކުގައި އެއްވެސް ހަގީގަތެއް ނެތް ކަމަށް އޭނާ ވިދާޅުވި އެވެ.
ފިލިޕީންސުން މީގެ ކުރިން ވެސް ވަނީ އެ ސަރަހައްދުގައި އޮތް މަނަވަރަށް ބޭނުންވާ ތަކެތި ފޯރުކޮށްދިނުމަށް ކުރާ ދަތުރުތަކަށް ޗައިނާއިން ހުރަސްއަޅާ ކަމަށް ތުހުމަތުކޮށްފަ އެވެ. އެގޮތުން 2024 ޖޫން 17 ގައި ހިނގި ކުރިމަތިލުމެއްގައި ފިލިޕީންސްގެ ފަޅުވެރިއެއްގެ އިނގިއްޔެއް ވަނީ ބުރިވެފަ އެވެ.
މީގެ އިތުރުން، 2025 ޑިސެމްބަރު މަހުގެ ތެރޭގައި، ދެބަސްވުން އުފެދިފައިވާ "ސަބީނާ ޝޯލް" ކައިރީގައި މަސްވެރިކަން ކުރަން އުޅުނު ފިލިޕީންސްގެ މަސްވެރިންނަށް ޗައިނާގެ ކޯސްޓްގާޑުން ފެންބަޑިން ހަމަލާދީފައިވާ ކަމަށް ފިލިޕީންސުން ބުނެފައިވެ އެވެ. މި ހާދިސާގައި ތިން މީހަކަށް އަނިޔާވެ، ދެ މަސްބޯޓަކަށް ބޮޑެތި ގެއްލުންތަކެއް ލިބުނެވެ.
ޗައިނާއިން ވަނީ މިފަދަ ހާދިސާތަކުގައި އަނިޔާވެރިކޮށް އަމަލުކުރާ ކަމަށް ކުރެވޭ ތުހުމަތުތައް ދޮގުކޮށްފަ އެވެ. އަދި ފިލިޕީންސުން ޗައިނާގެ ކަނޑުގެ ސަރަހައްދަށް ގަވާއިދާ ހިލާފަށް ވަންނަ ކަމަށް ޗައިނާއިން ތުހުމަތު ކުރެ އެވެ.
ދެކުނު ޗައިނާ ކަނޑުގެ މައްސަލައިގައި ޗައިނާ އާއި ފިލިޕީންސުން މިދިޔަ މަހު ވަނީ މަތީ ފަންތީގެ މަޝްވަރާތަކެއް ބާއްވާފަ އެވެ. މި ބައްދަލުވުންތަކުގައި ތެލާއި ގޭހުގެ ދާއިރާއިން އެއްބާރުލުން ދިނުމަށާއި، ދެ ގައުމުގެ ކޯސްޓްގާޑުންގެ މެދުގައި މުއާމަލާތް ކުރުން ފަދަ އިތުބާރު އުފެއްދުމުގެ ފިޔަވަޅުތަކާ ބެހޭ ގޮތުން މަޝްވަރާ ކުރެވުނެވެ.
ނަމަވެސް، ފިލިޕީންސްގެ ފޮރިން މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނީ، ކޯސްޓްގާޑުތަކުގެ މެދުގައި އޮންނަ އެއްބާރުލުން އޮންނާނީ ވަކި ދާއިރާތަކަކަށް ހަނިކުރެވިފައި ކަމަށާއި، ނާޒުކު ސަރަހައްދުތަކުގައި އެއްބާރުލުން ދިނުމަށް ނުވަތަ ގުޅިގެން ޕެޓްރޯލް ކުރުމާ ބެހޭ ގޮތުން އެއްވެސް މަޝްވަރާއެއް ކޮށްފައި ނުވާނެ ކަމަށެވެ.
ބްރޫނާއީ، މެލޭޝިއާ، ފިލިޕީންސް އަދި ވިއެޓްނާމުން މިލްކުވެރިކަމަށް ދައުވާކުރާ ސަރަހައްދުތައް ހިމެނޭހެން، ދެކުނު ޗައިނާ ކަނޑުގެ ގާތްގަނޑަކަށް މުޅި ސަރަހައްދަކީ ޗައިނާގެ ތަނެއް ކަމަށް އެ ގައުމުން ދައުވާ ކުރެ އެވެ.
ބައިނަލްއަގުވާމީ އާބިޓްރަލް ޓްރައިބިއުނަލުން 2016 ވަނަ އަހަރު ނިންމާފައިވަނީ ޗައިނާގެ މި ދައުވާތަކަކީ ބައިނަލްއަގުވާމީ ގާނޫނުތަކުގެ ދަށުން އެއްވެސް އަސާސެއް ނެތް ދައުވާތަކެއް ކަމަށެވެ. ނަމަވެސް ޗައިނާއިން އެ ނިންމުން ގަބޫލެއް ނުކުރެ އެވެ.
ދެކުނު ޗައިނާ ކަނޑަކީ އަހަރަކު ތިން ޓްރިލިއަން ޑޮލަރަށް ވުރެ ގިނަ އަދަދެއްގެ މުދާ އުފުލާ، ދުނިޔޭގެ ވިޔަފާރީގެ އެންމެ މުހިންމު އެއް ކަނޑުގެ މަގެވެ.
