ޗައިނާގެ ގުއަންގްޒޫ ސިޓީގައި އަވަށްޓެރިޔަކާ ޖެހުނު މައްސަލައެއްގައި، ބަދަލުހިފުމުގެ ގޮތުން ކޮންމެ ދުވަހަކު ގިނަ ވަގުތުތަކެއް ވަންދެން ބިރުވެރި އަޑުތައް ޖަހައިގެން އުނދަގޫކުރި މީހަކަށް ކޯޓުން ހުކުމްކޮށްފިއެވެ.
ސައުތު ޗައިނާ މޯނިންގް ޕޯސްޓުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ގުއަންގްޒޫގެ އެޕާޓްމަންޓް އިމާރާތެއްގައެވެ.
މި ހާދިސާގައި ހިމެނޭ ލޫ އަދި އޭނާގެ ރޫމްމޭޓް ލީ، އެމީހުންގެ އަވަށްޓެރިއެއް ކަމަށްވާ ޒީ އާ ދެމެދު އުފެދުނު ދެބަސްވުމަކާ ގުޅިގެން، ބަދަލުހިފުމުގެ ގޮތުން އެ އެޕާޓްމެންޓު ކައިރީގައި ލައުޑްސްޕީކަރެއް ބަހައްޓައި ބިރުވެރި އަޑުތައް އިއްވަން ފެށިއެވެ.
އެމީހުން މި އަޑުތައް ޖަހަމުން ދިޔައީ ކޮންމެ ދުވަހަކު ހެނދުނު 8:45 އިން މެންދުރު 12:00 އަށް، އަދި މެންދުރުފަހު 3:30 އިން ރޭގަނޑު 10:00 އަށް، ޖުމްލަ 10 ގަޑިއިރު ވަންދެންނެވެ.
މިއީ ގަސްދުގައި މީހުންނަށް އުނދަގޫކުރުމަށް ކުރި ކަމެއްކަން ސާބިތުވާތީ، ގުއަންގްޒޫގެ ހައިޒޫ ޑިސްޓްރިކްޓް ކޯޓަށް މައްސަލަ ހުށަހެޅި އެވެ.
ކޯޓުން މައްސަލަ ބެލުމަށްފަހު، އެ އަޑުތައް ވަގުތުން ހުއްޓާލުމަށް އަމުރުކުރިއެވެ.
ކޯޓު އޮފިޝަލުންގެ ހާޒިރުގައި ލޫ ވަނީ އޭނާ ބޭނުންކުރި ސައުންޑް ސިސްޓަމް ނަގައި، ހުރިހާ ރެކޯޑިންތަކެއް ފޮހެލާފައެވެ. އަދި ކުރިއަށް އޮތް ތަނުގައި މިފަދަ އަމަލެއް ނުކުރާނެ ކަމަށް އޭނާ ކޯޓުގައި އެއްބަސްވި އެވެ.
