ދުނިޔޭގައި އެންމެ ގިނަ ދުވަހު ދިރިއުޅުނު ބޯވާގެ ރެކޯޑު ދީފައި އޮތީ ބޯވަޔަކަށް ނޫންކަން ފަހުގެ ދިރާސާތަކުން ސާބިތުވެއްޖެ އެވެ.
އެމެރިކާގެ އިލިނޯއީސްގެ މޭޒަން ކްރީކް ސަރަހައްދުން ފެނިފައިވާ 'ޕޯލްސެޕިއާ މޭޒޮނެންސިސް' ނަމަކަށް ކިޔާ މި ފޮސިލްއަކީ 300 މިލިއަން އަހަރު ދިރިއުޅުނު ބޯވައެއް ކަމަށް އޮތީ ކަނޑައަޅައިފަ އެވެ. އެހެންވެ، ގިނިސް ވޯލްޑް ރެކޯޑްސްގައި "ދުނިޔޭގެ އެންމެ ދުވަސްވީ ބޯވާ" ގެ ލަގަބު އެ ފޮސިލްއަށް އޮތީ ދީފަ އެވެ.
ނަމަވެސް އާ ހޯދުމާއެކު މި ޝަރަފު ވަނީ ބާތިލްވެފަ އެވެ.
އެއީ ބޯވައެއްގެ ބަދަލުގައި ނައިބޮއްޔާ ގާތް ގުޅުމެއް އޮންނަ މަހުލޫގެއް ކަމަށް ސައިންސްވެރިން މިހާރު ވަނީ ނިންމާފައެވެ. ނައިބޮއްޔަކީ ބޯވަޔާއި އެއް އާއިލާއެއްގެ، ނަމަވެސް ބޭރުން ހަރު ތޮށިގަނޑެއް އޮންނަ އެއްޗެކެވެ.
އާ ދިރާސާ އިސްކޮށް ކުރިއަށް ގެންދެވި ޔުނިވާސިޓީ އޮފް ރީޑިންގެ ޒޫލޮޖިސްޓް ތޯމަސް ކްލެމެންޓްސް ވިދާޅުވި ގޮތުގައި، މި ފޮސިލްއަކީ ދެނެގަންނަން ވަރަށް އުނދަގޫ، އަދި ސައިންސްވެރިންގެ މެދުގައި އަބަދުވެސް ބޮޑު ބަހުސެއް އޮތް އެއްޗެކެވެ.
އިންސާނެއްގެ އަތްތިލައިގެ ބޮޑުމިން ހުރި މި ފޮސިލް ފެނިފައިވަނީ ޑައިނަސޯރުންގެ ޒަމާނަށްވުރެ ވެސް މާ ކުރީގެ ފޮސިލްތައް ގިނަ ސަރަހައްދަކުންނެވެ.
ދެހާސް ވަނަ އަހަރު މި ފޮސިލްއަކީ ބޯވައެއް ކަމަށް ކަނޑައެޅުމުން، ބޯވާގެ ނަސްލު އުފެދިގެން އައި ޒަމާނާ މެދު ސައިންސްވެރިން ކުރިން ގަބޫލުކުރި ގަބޫލުކުރުންތަކަށް ބޮޑު ބަދަލެއް އައެވެ.
ނަމަވެސް، މި އާ ހޯދުމާއެކު ބޯވާގެ ތާރީހު އަނެއްކާވެސް މިވަނީ ބަދަލުވެފައެވެ. މިހާރު ދުނިޔެއިން ފެނިފައިވާ އެންމެ ދުވަސްވީ ބޯވާގެ ފޮސިލްގެ އުމުރަކީ ގާތްގަނޑަކަށް 90 މިލިއަން އަހަރެވެ. އެހެންކަމުން، އޮކްޓޮޕަސްގެ ނަސްލު އުފެދުނީ ކުރިން ހީކުރި ވަރަށް ވުރެ މާ ފަހުން ކަމަށް މިހާރު ބެލެވެއެވެ.
