ރާއްޖޭގެ ދަރިވަރުންނަށް މަތީ ތައުލީމުގެ ފުރުސަތު ހޯދައިދިނުމުގައި ފާހަގަކޮށްލެވޭ ޒެޑެކްސް ސްޓަޑީ އެބްރޯޑުން، ސަރުކާރުގެ ސްޓޫޑެންޓް ލޯނަށް ކުރިމަތިލާ ދަރިވަރުންނަށް ހާއްސަކޮށްގެން މައުލޫމާތު ދިނުމުގެ ސެޝަނެއް މިރޭ ހޮޓެލް ޖެންގައި ބޭއްވުމަށް ނިންމައިފި އެވެ.
ޒެޑެކްސް އިން ބުނީ މިރޭ 20:30 ގައި ބާއްވާ މި ސެޝަން އަމާޒުކޮށްފައިވަނީ ލޯނަށް ފޯމު ހުށަހެޅުމުގައި ދިމާވާ ދަތިތަކާއި އޮޅުންބޮޅުންތައް ހައްލުކޮށްދީ، އިތުރު އިތުބާރާއެކު ކުރިމަތިލުމަށް މަގުފަހިކޮށްދިނުމަށެވެ.
މި ސެޝަނުގައި ލޯނަށް އެދި ހުށަހަޅާނެ ގޮތުގެ ފުރިހަމަ އިރުޝާދާއި، ބޭނުންވާ ލިޔެކިޔުންތަކާއި، ޝަރުތުތަކުގެ އިތުރުން ފޯމު ހުށަހެޅުމުގައި އާންމުކޮށް ހެދޭ ގޯސްތަކާ ބެހޭގޮތުން ތަފްސީލީ މައުލޫމާތު ދީ، މަތީ ތައުލީމަށް ބޭނުންވާ ފައިސާ ހޯދުމަށް ކުރެވިދާނެ ކަންކަމާ ގުޅޭގޮތުން ފަންނީ އެހީތެރިކަން ވެސް ފޯރުކޮށްދިނުމަށް ވަނީ ހަމަޖެހިފަ އެވެ.
ރާއްޖޭގެ ގިނަ އަދަދެއްގެ ހުނަރުވެރި ދަރިވަރުންނަށް މަތީ ތައުލީމުގެ ފުރުސަތުތައް ގެއްލެނީ ލޯނަށް އެދި ހުށަހަޅާނެ ގޮތް ރަނގަޅަށް އޮޅުންނުފިލާތީކަން ފާހަގަކޮށް ޒެޑެކްސް އިން ބުނީ މި ސެޝަނުގެ މައިގަނޑު މަގުސަދަކީ އެފަދަ ހުރަސްތައް ނައްތާލައި، ދަރިވަރުންނަށް ފަސޭހަކަމާއެކު ފޯމު ހުށަހެޅުމުގެ މަގު ދައްކައިދިނުން ކަމަށެވެ.
މި ސެޝަނަކީ ގްރޭޑް 12 ނިންމާފައިވާ ދަރިވަރުންނާއި، ރާއްޖޭން ބޭރުގައި ކިޔެވުމަށް ތައްޔާރުވަމުންދާ ދަރިވަރުންގެ އިތުރުން ބެލެނިވެރިންނަށްވެސް ވަރަށް މުހިންމު ފުރުސަތެއް ކަމަށް ޒެޑެކްސް އިން ބުންޏެވެ.
މި ސެޝަނުގައި ބައިވެރިވުމަށް ބޭނުންވާ ފަރާތްތަކުން ޒެޑެކްސްގެ ވެބްސައިޓް މެދުވެރިކޮށް ރަޖިސްޓްރީ ކުރެވޭނެ އެވެ. އަދި އިތުރު މައުލޫމާތު ހޯދުމަށް އެ ކުންފުނީގެ ހޮޓްލައިން ނަންބަރު، 9902788 އަށް ގުޅައިގެން ނުވަތަ މެސެޖުކޮށްގެން މައުލޫމާތު ސާފުކުރުމަށް އެ ކުންފުނިން އެދެ އެވެ.
މި ސެޝަނުގައި ބައިވެރިވެވޭނީ ވަކި އަދަދެއްގެ ދަރިވަރުންނަށް ކަމަށްވާތީ، ވީހާވެސް އަވަހަކަށް ރަޖިސްޓްރީވުމަށް އެ ކުންފުނިން އިލްތިމާސްކުރެއެވެ.
ކުރިން ކިއު ސްޓަޑީ މޯލްޑިވްސްގެ ނަމުގައި ހިންގި ޒެޑެކްސް ސްޓަޑީ އެބްރޯޑަކީ ރާއްޖޭގެ ދަރިވަރުންނަށް މަތީ ތައުލީމުގެ ފުރުސަތުތައް ހޯދައިދިނުމުގައި 10 އަހަރަށްވުރެ ގިނަ ދުވަހުގެ ތަޖުރިބާ ހުރި ކުންފުންޏެކެވެ. ހާއްސަކޮށް މެލޭޝިއާ ފަދަ ގައުމުތަކުގެ މޮޅު ޔުނިވާސިޓީތަކުން ޖާގަ ހޯދައިދިނުމާއި، ވިސާގެ ކަންކަމާއި، ސަރުކާރުގެ ލޯނު ސްކީމުގެ ދަށުން ކިޔެވުމަށް ބޭނުންވާ އެހީތެރިކަން ފޯރުކޮށްދިނުމުގައި އެ ކުންފުނިން އަންނަނީ މުހިންމު މަސައްކަތްތަކެއް ކުރަމުންނެވެ.
