މި ހިނގާ ބަރަކާތްތެރި ރޯދަ މަހު 20 ވަނަ ރައްޔިތުންގެ މަޖިލީހުން ބޭއްވި ފުރަތަމަ ޖަލްސާގައި މެންބަރުން އެކަކު އަނެކަކަށް ހަޅޭއްލަވައި، ޒުވާބުކޮށް، ރޯދަ ނުހިފާކަމުގެ ހުތުރު ތުހުމަތުތަކެއް އަމާޒުކޮށްފި އެވެ.
މިއަދުގެ ޖަލްސާގައި އެޖެންޑާކޮށްފައި އޮތީ ފަސް ސަފީރުން ހަމަޖެއްސުމުގެ މަސައްކަތާއި ދެ ބިލަކާ ގުޅޭ ބަހުސެއް ކުރުމެވެ. އެކަމަކު، މިއަދުގެ ޖަލްސާއިން ފެނުނީ އެޖެންޑާގައި އޮތް މަސައްކަތްތައް ކުރަން ފޯކަސް ކުރެއްވުމުގެ ބަދަލުގައި މެންބަރުންގެ ރުޅި ގޮސްފައިވާ ހިސާބެވެ.
"ރޯދައަށް ހުރެގެން އަޅުގަނޑުމެން ނުހަދާނަން ދޮގެއް. އަޅުގަނޑަށް މިހާރު ހީވޭ ވައިކަރަދޫ ދާއިރާގެ އިއްޒަތްތެރި މެންބަރާއި ކެންދޫ ދާއިރާގެ އިއްޒަތްތެރި މެންބަރު ރޯދަ ނޫންހެން ވެސް މިއަދު،" ޖަލްސާގެ ވަކި ހިސާބަކުން ބާރަށު ދާއިރާގެ މެންބަރު އިބްރާހިމް ސުޖާއު ވިދާޅުވި އެވެ.
ވެރިކަން ހިންގާ ޕީއެންސީގެ މެންބަރުން، އިދިކޮޅު އެމްޑީޕީގެ މެންބަރުންނަށް ހަޅޭއްލަވަން ފެށުމުން، އެމްޑީޕީގެ މެންބަރުން ވެސް ވަނީ ހަމަ އެ މޭރުމުން މަޖިލީހުގެ ތަޅުމުގައި މިއަދު ވާހަކަ ދައްކަވައިފަ އެވެ.
"ކިތަންމެ އަޑަށް ބާރުލިޔަސް، ރޯދަމަހެއް ވިޔަސް އަޅުގަނޑުމެންނަށް ވުރެ ވަކި ބާރަކަށް ވާހަކައެއް ނުދެއްކޭނެ. ރޯދައަށް ތިބެގެން ދެއްކިޔަސް އަޅުގަނޑުމެން ދައްކާނަން ބާރަށް ވާހަކަ. އިންތިހާބު އެއްކޮށް ނުލެވޭނެ،" ވާހަކަ ދައްކަން ލިބުނު ފުރުސަތެއްގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވި އެވެ.
ރޯދަމަހާ ނުގުޅޭ ޒާތުގެ ވާހަކަ އާއި ތުހުމަތުތައް ވާދަވެރި މެންބަރުންނަށް އެންމެ ބޮޑަށް އަމާޒު ކުރެއްވި އެއް މެންބަރަކީ މެޖޯރިޓީ ލީޑަރު އިބްރާހިމް ފަލާހު އެވެ. ފަލާހު މިއަދު ވަނީ ތަޅުމުގައި ވަރަށް ހުތުރު ތުހުމަތުތަކެއް އެމްޑީޕީ މެންބަރުންނަށް އަމާޒު ކުރައްވައިފަ އެވެ.
"އެބޭފުޅުންނަށް ވަރަށް އުނދަގޫވާނެ ތެދު ބަހުން ވާހަކަ ދައްކަންޏާ ތިބެން. ތެދު ބަހުން ވާހަކަ ދައްކަންޏާ އުނދަގޫވާނެ އަދި ގުރްއާން ކިޔަވަންޏާ މާ އުނދަގޫވާނެ މިތާ. ގުރްއާން ޖަހަންޏާ މާ އުނދަގޫވާނެ، ނުކުމެގެން ދާނެ،" އިނގުރައިދޫ ދާއިރާ ތަމްސީލު ކުރައްވާ މެންބަރު ފަލާހު ވިދާޅުވި އެވެ.
