އިރާނު ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެމުން އައިސް، ސާފު ނުކުރާ ތެޔޮ ފީފާއެއްގެ އަގު 90 ޑޮލަރަށް އަރައިފި އެވެ.
ހަނގުރާމަ ފެށިތާ ހަފުތާއެއްގެ ތެރޭގައި އަގަށް މި ވަރުގެ އިތުރުވުމެއް އައިސްފައިވާއިރު، މިއީ ވޭތުވި ދެ އަހަރެއްހާ ދުވަހުގެ ތެރޭގައި ތެލުގެ އަގު އެންމެ ބޮޑަށް އުފުލުނު ފަހަރެވެ.
ތެލުގެ އަގު އުފުލެމުން އަންނަ މައިގަނޑު ސަބަބަކީ ހޮރުމޫޒު ކަނޑުއޮޅި އެކީ ކަހަލަ ގޮތަކަށް ބޭނުންކުރުން ހުއްޓާލުމެވެ.
ދުނިޔޭގައި އުފައްދާ ތެލުގެ 20 ޕަސެންޓާއި ގޭހުގެ 20 ޕަސެންޓު ދަތުރުކުރަނީ ހޮރުމޫޒު ކަނޑުއޮޅި ހުރަސްކޮށެވެ. ކަނޑު ދަތުރުތަކުގެ ޓްރެކިން ޑޭޓާއިން ދައްކާ ގޮތުގައި މިދިޔަ މަހުގެ 28 ގައި، ހަނގުރާމަށް ފެށުމުގެ ކުރިން މި ކަނޑުއޮޅިން ލާފާއި ދުވާލަކު 138 އާގުބޯޓު ދަތުރުކުރެ އެވެ. ހަނގުރާމަ ފެށި ފަހުން އެ އަދަދު 10 އަށް ވެސް ނާރަ އެވެ.
ތެލުގެ އަގު އުފުލެން މެދުވެރިވެފައިވާ އަނެއް ސަބަބަކީ އިރާނުގެ ޑްރޯން އަދި މިސައިލް ހަމަލާތައް އަރަބި ގައުމުތަކުގެ ތެލާއި ގޭސް އުފައްދާ ތަންތަނަށް އަމާޒުކުރުމެވެ. މިއާ ގުޅިގެން ސައުދީ އަރަބިއާ އާއި ކުވެއިތު ފަދަ ގައުމުތަކުން ވަނީ ތެޔޮ އުފައްދާ މިންވަރު މަދުކޮށްފަ އެވެ.
މާހިރުން ބުނާ ގޮތުގައި ކުރިއަށް އޮތް ހަފުތާއެއްހާ ދުވަހުގެ ތެރޭގައި ހޮރުމޫޒު ކަނޑުއޮޅިން ދަތުރުކުރުން އާންމު ހާލަތަށް ނޭޅިއްޖެ ހާލަތެއްގައި ތެޔޮ ފީފާއެއްގެ އަގު 100 ޑޮލަރަށް އެރުން ގާތެވެ. އަދި، ތެޔޮ އުފައްދާ މިންވަރު މަދުކޮށްފައި އޮންނަ މުއްދަތު ދިގުދެމިގެންދާ ނަމަ ފީފާއެއްގެ އަގު 150 ޑޮލަރަށް އެރުން ގާތް ކަމަށް ވެސް ބޭރުގެ ނޫސްތަކުގައި ރިޕޯޓުކޮށްފައި އެބަހުއްޓެވެ.
