އިރާނާއި އެމެރިކާ-އިޒްރޭލާ ދެމެދު ހިނގަމުންދާ ވަރުގަދަ ހަނގުރާމަ ދެވަނަ ހަފުތާއަކަށް ދެމިގެން ގޮސްފައިވާއިރު، އިރާނުން ޝަރުތެއް ނެތި އަމާންދިނުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވައިފިއެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރުތް' ގައި ވިދާޅުވީ، އިރާނާއެކު އެއްވެސް ސިޔާސީ އެއްބަސްވުމެއް ނުހަދާނެ ކަމަށާއި، އޮތް ހަމައެކަނި މަގަކީ އަމާންދިނުން ކަމަށެވެ. އަދި ބަލައިގަނެވޭނެ އާ ލީޑަޝިޕެއް އިރާނަށް އައުމުން، އެމެރިކާއާއި ބައިވެރިން ގުޅިގެން އިރާނުގެ އިގުތިސާދު ކުރިއަށްވުރެ ވަރުގަދަކޮށް "މޭކް އިރާން ގްރޭޓް އެގެއިން" ގެ ދަށުން ބިނާކޮށްދޭނެ ކަމަށް ވެސް ޓްރަމްޕް ވައުދުވެވަޑައިގަތެވެ.
ވައިޓް ހައުސްގެ ތަރުޖަމާނު ކެރޮލީން ލީވިޓް ވިދާޅުވި ގޮތުގައި، މި އަސްކަރީ އޮޕަރޭޝަންތައް ގާތްގަނޑަކަށް 4 އިން 6 ހަފްތާއަށް ދެމިގެންދާނެ ކަމަށް ބެލެވެއެވެ. އަދި މިހާރުވެސް އިރާނުގެ ކަނޑުގެ ސިފައިންގެ ބާރު ކަނޑުވާލުމުގެ މަސައްކަތް ކާމިޔާބީއާއެކު ކުރިއަށްދާ ކަމަށް އޭނާ ފާހަގަކުރެއްވިއެވެ.
އިރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލިތާ ހަފްތާއެއް ވެފައިވާއިރު، ޓްރަމްޕް ބޭނުން ވަނީ އޭނާގެ ގޮނޑިކޮއްކޮ ސަރުކާރެއް ގެނައުމަށެވެ. ހާއްސަކޮށް ޚާމަނާއީގެ ދަރިކަލުން މުޖްތަބާ ގެނައުމަކީ އެމެރިކާއިން ބަލައިގަންނާނެ ކަމެއް ނޫން ކަމަށް ޓްރަމްޕް ވަނީ ވިދާޅުވެފައެވެ.
ރިޕޯޓްތައް ބުނާގޮތުން ރަޝިއާއިން ދަނީ އެމެރިކާގެ މަނަވަރުތަކާއި ބޯޓުތައް ހުރި ތަންތަނުގެ އިންޓެލިޖެންސް މައުލޫމާތު އިރާނަށް ފޯރުކޮށްދެމުންނެވެ. ނަމަވެސް، ރަޝިއާގެ ރައީސް ލަޑީމިއާ ޕޫޓިން ވަނީ އިރާނުގެ ރައީސް މަސްއޫދު ޕެޒެޝްކިއާނަށް ފޯނުން ގުޅުއްވައި، ހަމަލާތައް ވަގުތުން ހުއްޓާލުމަށާއި ސިޔާސީ ހައްލެއް ހޯދުމަށް ބާރުއަޅުއްވާފައެވެ.
ހަނގުރާމަ މިހާރު ވަނީ ސަރަހައްދީ ފެންވަރެއްގައި ފުޅާވެފައެވެ. އިރާނަށް ތާއީދުކުރާ ހިޒްބުالله އިން އިޒްރޭލަށް ހަމަލާދިނުމާ ގުޅިގެން، އިޒްރޭލުން ދަނީ ލެބަނަންގެ ބެއިރޫތަށް ވަރުގަދަ ވައިގެ ހަމަލާތަކެއް ދެމުންނެވެ. މީގެ އިތުރުން، ގަތަރު، ބަހުރޭން، އުރުދުން، ޔޫއޭއީ އަދި ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް އިރާނުން ރައްދު ހަމަލާތަކެއް ދީފައިވާއިރު، ސައިޕްރަސްގައި ހުރި އިނގިރޭސި އަސްކަރީ ބޭހަކަށްވެސް ޑްރޯން ހަމަލާއެއް ވަނީ އަރާފައެވެ. ޓްރަމްޕް ވިދާޅުވާ ގޮތުގައި މިއީ އިރާގު ނުވަތަ އަފްޣާނިސްތާން ފަދަ ދިގުލައިގެންދާނެ ހަނގުރާމައަކަށް އެމެރިކާއިން ވިޔަ ނުދޭނެއެވެ.
