ދިވެހިރާއްޖޭގެ އެންމެ ބޮޑު ގޭމިން ޕްލެޓްފޯމް، ދިރާގު ގޭމާސް ގިލްޑް (ޑީޖީޖީ) އިން އިންތިޒާމުކޮށްގެން ކުރިއަށްގެންދާ "ރޯދަ ކުއެސްޓް" ހަރަކާތް ރޭ ދިރާގު ހެޑް އޮފީހުގައި ފަށައިފި އެވެ.
މި މަހުގެ 8 ވަނަ ދުވަހުގެ ނިޔަލަށް، ކުރިއަށްދާ މި ހަރަކާތަކީ ރާއްޖޭގެ ގޭމިން ކޮމިއުނިޓީއަށް ހާއްސަކޮށްގެން ބާއްވާ ފޯރިގަދަ ހަރަކާތެކެވެ. "ރޯދަ ކުއެސްޓް" ކުރިއަށްދާނީ ކޮންމެ ރެއަކުވެސް ރޭގަނޑު 9:00 އިން ދަންވަރު 1:00 އަށް ކަމަށް ދިރާގުން ބުނެ އެވެ.
މި ހަރަކާތުގައި ބައިވެރިވުމަށް އެއްވެސް ފީއެއް ދައްކާކަށް ނުޖެހެއެވެ. އެމްއެލްބީބީ، ޕަބްޖީ މޮބައިލް، އެފްސީ25 އަދި ޓެކެން 8 ފަދަ މަގުބޫލު ގޭމުތަކުގެ ރަޖިސްޓްރޭޝަން މިހާރު ނިމިފައި ވީނަމަވެސް، ޒިޔާރަތްކުރާ ފަރާތްތަކަށް އަދިވެސް ގިނަ ފުރުސަތުތަކެއް އެބައޮތެވެ.
މި މަހުގެ 6 ވަނަ ދުވަހުން ފެށިގެން ކުރިއަށްދާ ޖީޓީ7 ރޭސިން ސިމިއުލޭޓަރ އަދި ބީޓް ސޭބަރ ސެޝަންތަކުގައި، ކުރިން ރަޖިސްޓްރީވުމަކާ ނުލައި ކޮންމެ މީހަކަށްވެސް ބައިވެރިވެވޭނެއެވެ.
ދިރާގުން ބުނި ގޮތުގައި، މިއީ ހުރިހާ ފެންވަރެއްގެ ގޭމަރުންނަށް ވެސް ބައިވެރިވެވޭ ގޮތަށް ފަރުމާކޮށްފައިވާ ހަރަކާތެކެވެ. އެހެންކަމުން، ގޭމިންއަށް ޝައުގުވެރިވާ ހުރިހާ ފަރާތްތަކުން ވެސް މި ހަރަކާތްތަކުގައި ބައިވެރިވެ، ކޮންމެ ރެއަކުވެސް ތަފާތު ތަޖުރިބާއެއް ކޮށްލުމަށް އެ ކުންފުނިން ދައުވަތު އަރުވައެވެ.
ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއަރުވައި، އަންނަން އޮތް ޖީލުތަކުގެ ގޭމިން ހުނަރުތައް އިތުރުކުރުމަށް ޑީޖީޖީ އިން ދަނީ މަސައްކަތްތަކެއް ކުރަމުންނެވެ. މި ހަރަކާތްތަކުގެ އެންމެ ފަހުގެ މައުލޫމާތުތައް dgg.mv ވެބްސައިޓުން ލިބިވަޑައިގަންނަވާނެއެވެ.
