ތެހެރާން، އިރާން (މާޗް 3) - އެމެރިކާ އާއި އިޒްރޭލުން އިސްވެ، އިރާނާ ދެކޮޅަށް ފެށި ހަނގުރާމަ މިހާރު ދަމުން އަންނަ މިސްރާބުގެ ސަބަބުން، މި އަހަރުގެ ޖޫން/ޖުލައި މަހު އެމެރިކާ އާއި މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕްގައި ކުޅެން އިރާނުން އެމެރިކާ އަށް ދިއުމާ މެދު ދެ ވަނަ ވިސްނުމަކަށް ގޮސްފި އެވެ.
އިރާނަށް ދެމުންދާ ހަމަލާތަކުގައި މިހާތަނަށް 750 އަށްވުރެ ގިނަ މީހުން ވަނީ މަރުވެފަ އެވެ.
"ޔަގީން ކަމެއް މި ހަމަަލާތަކަަށް ފަހު، އަހަރެމެންނަށް ވޯލްޑް ކަޕްގައި ކުޅެން އުންމީދުތަކެއް އޮވެގެން ވިސްނޭނެ ކަމަށް ނުދެކެން،" އިރާން ފުޓްބޯޅަ ފެޑެރޭޝަން ރައީސް، މަހުދީ ތާޖު ވިދާޅުވި އެވެ.
މިހާރު އޮތްގޮތުން، އިރާނުން ވޯލްޑް ކަޕްގައި ކުޅޭ ފުރަތަމަ މެޗުގައި ޖޫން މަހުގެ 15 ވަނަ ދުވަހު ނިއު ޒީލެންޑާ ކުޅޭނެ އެވެ. އަދި، 21 ޖޫންގައި ބެލްޖިއަމާ ކުޅުމަށް ފަހު 26 ޖޫންގައި މިސްރާ ބައްދަލުކުރާނެ އެވެ.
ވޯލްޑް ކަޕް ޝެޑިއުލްކޮށްފައި އޮތީ ޖޫން 11 އިން ޖުލައި 19 ގެ ނިޔަލަށެވެ. އެމެރިކާގެ ރައީސް ޑޮނާލްޑް ޓްރަމްޕަށް ފީފާ އިން ޕީސް އެވޯޑް އެރުވި ނަމަވެސް، އޭނާ ކަންކަން ކުރައްވަމުން އަންނަ ގޮތުން ގިނަ ބަޔެއްގެ ހިތްހަމަނުޖެހުން ވަނީ އަމާޒުވެފަ އެވެ. އެ ގޮތުން، ގިނަ ގައުމުތަކެއްގެ ރައްޔިތުންނަށް އެމެރިކާ އަށް ނާދެވޭ ގޮތަށް ޓްރެވަލް ބޭން ގައުމުތަކުގެ ލިސްޓެއް ހެދިއިރު، އެ ގައުމުތަކުގެ ތެރޭގައި މި ފަހަރުގެ ވޯލްޑް ކަޕަށް ކޮލިފައިވި ގައުމުތައް ވެސް ހިމެނެ އެވެ. އިރާނަކީ އެ ލިސްޓުގައި ވެސް ހިމެނޭ ގައުމެކެވެ.
އިރާނުން ވޯލްޑް ކަޕްގައި ކުޅުމުގައި އަަަމަލުކުރާނެ ގޮތެއް ނިންމަން ފީފާގައި އެދިފައިވާއިރު، އެ މައުލޫމާތު ހޯދަން މީޑިއާ އިން ކުރި މަސައްކަތް ވެސް އަދި ކާމިޔާބުނުވެ އެވެ.
