ލޯކަލް ކައުންސިލްތަކުގެ އިންތިހާބުތަކާ ދިމާކޮށް މާލެހިޔާ އަދި ސިނަމާލޭ ފްލެޓުތަކުގެ ވެރިންނަށް އެމަނިކުފާނު ދޭން ނިންމެވި 16 މިލިއަން ރުފިޔާއަކީ ރިޝްވަތެއް ނޫން ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
މިއަދު ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވީ، ފްލެޓުތަކުގެ ވެރިންނަށް ފައިސާ ދިނުމަކީ އެމަނިކުފާނުގެ ވައުދެއް ކަމަށާއި އެކަން ފުއްދުން އިންތިހާބަކާ ދިމާވުމަކީ އެމަނިކުފާނުގެ ނިޔަތެއް ނޫން ކަމަށެވެ.
"އެ ބައްދަލުވުމުގައި [ގަލޮޅުގެ ރައްޔިތުންނާއެކު ބޭއްވެވި] އެ ވާހަކަ ނެންގެވީމާ އިތުރު ގިޔަރަކަށް އަޅުގަނޑު ލީ އެކަންތައް. އިތުރު ހިތްވަރެއް އެކަމަށް ލީ ކައުންސިލުން މިކަން ނުކުރިޔަސް ސަރުކާރުން އެކަނި ވެސް ޑައިރެކްޓްލީ ވިޔަސް އެކަން ކުރަން ބޭނުންވެޔޭ،" ރައީސް ވިދާޅުވި އެވެ.
ވިދާޅުވި ނަމަވެސް ކައުންސިލް އިންތިހާބާ ދިމާކޮށް ސިނަމާލޭގެ ހަތަރު ފްލެޓާއި މާލޭ ހިޔާގެ ދެ ފްލެޓުގައި ހުންނަ ޖުމްލަ 161 އެޕާޓްމަންޓްގެ ކޮންމެ ވެރިޔަކަށް އެއް ލައްކަ ރުފިޔާ ދޭން މުއިއްޒު ނިންމެވި މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅި ބަލަން ވަނީ ފަށައިފަ އެވެ.
ފްލެޓްތަކުގެ ވެރިންނަށް ދައުލަތުން ދޭނެ ކަމަށް ބުނި ފައިސާ 16.1 މިލިއަން ރުފިޔާއަށް އަރަ އެވެ.
މުއިއްޒު ފްލެޓްތަކުގެ ވެރިންނަށް އެ ފައިސާ ދިނުމަށް ނިންމެވީ މާލެ ސިޓީގެ މޭޔަރުކަމަށް ޕީއެންސީން ވާދަކުރައްވާ ކެންޑިޑޭޓާއި ޑަބްލިއުޑީސީ ރައީސަކަށް ޕީއެންސީން ވާދަކުރައްވާ ކެންޑިޑޭޓާއެކު ފްލެޓްތަކުގެ ވެރިންނާއެކު މުލިއާގޭގައި ބޭއްވި ބައްދަލުވުމެއްގަ އެވެ.
