ކޭންޑީ، ސްރީ ލަންކާ (ފެބްރުއަރީ 25) - ހެރީ ބްރޫކްގެ ސައްތައާ އެކު، ދެ ވިކެޓުން ޕާކިސްތާން ބަލިކޮށް، އިންގްލެންޑުން މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގެ ސެމީ ފައިނަލުން ޖާގަ ހޯދައިފި އެވެ.
ސުޕަ 8 ގެ ގްރޫޕް ދޭއްގައި ކުޅެމުން އަންނަ އިންގްލެންޑުން ވަނީ ކުޅުނު ދެ މެޗުން ވެސް މޮޅުވެފަ އެވެ. ފުރަތަމަ މެޗުން މުބާރާތުގެ އެއް ހޯސްޓް، ސްރީ ލަންކާ އަތުން މޮޅުވީ 51 ލަނޑުންނެވެ. އަދި، ދެ ވަނަ މެޗުގައި ދެ ވިކެޓުން ޕާކިސްތާން ބަލިކޮށް، ފަހު މެޗުގައި ނިއު ޒީލެންޑާ ކުޅުމުގެ ކުރިން ސެމީ އަށް ދަތުރުކުރީ އެެވެ.
ޕަލެކޭލޭ ކްރިކެޓް ސްޓޭޑިއަމްގައި ކުޅުނު މެޗުގައި ޕާކިސްތާނަށް ޓޮސް ދިމާވުމުން ކުޅެން އެރި އެވެ. ފުރަތަމަ މެޗުގައި ވިއްސާރައިގައި ޖެހި، ޕާކިސްތާނަށް ނިއު ޒީލެންޑާ ކުޅެން އޮތް މެޗުގައި ނަތީޖާ ނެތް މެޗެއްގެ ގޮތުގައި ކަނޑައަޅާފައި އޮތުމުން، ރޭ ފުރަތަމަ ކުޅެން އަރައި، ރަނގަޅަށް ފެށޭތޯ މަސައްކަތްކުރި އެވެ. އެކަމަކު، 20 އޯވަރުގެ ތެރޭގައި ނުވަ ކުޅުންތެރިން ނުބައިވެގެން ހެދުނީ 164 ލަނޑެވެ. އެންމެ ގިނަ ލަނޑު ހެދި ޝާހިބްޒާދާ ފަރުހާނަށް ވެސް އެއްކުރެވުނީ 63 ލަނޑެވެ. މި އިނިންގްސްގައި، އިންގްލެންޑްގެ ލިއަމް ޑޯސަން ވަނީ ހަތަރު އޯވަރަށް ތިން ވިކެޓް ނަގައިފަ އެވެ. ޖޯފްރާ އާޗާ އާއި ޖޭމީ އޮވާޓަން، ކޮންމެ ކުޅުންތެރިއަކު ދެ ވިކެޓް ނެގި އެވެ.
ޖަވާބުގައި ކުޅެން އަރައި، އިންގްލެންޑުން ވަނީ 19.1 އޯވަރުގެ ތެރޭގައި، އަށް ކުޅުންތެރިން ނުބައިވިއިރު، 166 ލަނޑު ހަދައި މެޗުން މޮޅުވެފަ އެވެ. މެޗުގެ ތަރި، ބްރޫކް ވަނީ 51 ބޯޅައިން 100 ލަނޑު ހަދައިފަ އެވެ. މި އިނިންގްސްގައި ޕާކިސްތާންގެ ޝާހީން އަފްރީދީ ވަނީ ހަތަރު އޯވަރަށް ހަތަރު ވިކެޓް ނަގައިފަ އެވެ.
މި ގްރޫޕްގައި ސެމީގެ އަނެއް ޖާގަ އަށް ބާކީ އޮތް ތިން ޓީމުން ވެސް ވާދަކުރެ އެވެ. ޕާކިސްތާން ނޫން ދެން އޮތް ނިއު ޒީލެންޑާއި ސްރީ ލަންކާ އަށް ބާކީ ދެ މެޗު އެބައޮތެވެ.
