ޖިންސީ ކުށްވެރިޔާ ޖެފްރީ އެޕްސްޓީންގެ ތަހުގީގާ ގުޅޭ 3 މިލިއަނަށްވުރެ ގިނަ ސަފުހާގެ ލިޔެކިޔުންތަކާއި، 2،000 އަށްވުރެ ގިނަ ވީޑިއޯ އަދި 180،000 ފޮޓޯ އާންމުކޮށްފިއެވެ.
އެމެރިކާގެ ޑިޕާޓްމަންޓް އޮފް ޖަސްޓިސް އިން ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ އެޓާނީ ޖެނެރަލް ޓޮޑް ބްލާންޗް ވިދާޅުވީ، މިއީ އެޕްސްޓީންގެ މައްސަލައިގައި ދެފުށް ފެންނަ ގޮތަށް ކަންކަން ހާމަކުރުމަށް ކޮންގްރެސްއިން ފާސްކުރި ގާނޫނާ އެއްގޮތަށް ކުރި ކަމެއް ކަމަށެވެ.
މި ފައިލްތައް އާންމުކުރުމުގައި ލަސްތަކެއް އުޅޭތީ އާއި ބައެއް މައުލޫމާތުތައް ސިއްރުކޮށްފައިވާތީ ރައީސް ޑޮނަލްޑް ޓްރަމްޕްގެ ސަރުކާރަށް ވަނީ ފާޑުކިޔުންތައް އަމާޒުވެފައެވެ.
ހާއްސަކޮށް ޓްރަމްޕާއި އެޕްސްޓީންއާ ދެމެދު އޮތް ގުޅުމާ ބެހޭ ގޮތުން ސުވާލުތައް އުފެދިފައިވާއިރު، މީގެ ކުރިން އާންމުވި ފްލައިޓް ލޮގްތަކުން ދައްކާ ގޮތުގައި 1990 ގެ އަހަރުތަކުގައި ޓްރަމްޕް ވަނީ އެޕްސްޓީންގެ އަމިއްލަ ޖެޓުގައި ދަތުރުކޮށްފައެވެ. ނަމަވެސް ޓްރަމްޕް ވަނީ އެޕްސްޓީން ހިންގި ޖިންސީ ވަގުފާރީގެ އެއްވެސް މައުލޫމާތެއް އެނގިވަޑައިނުގަންނަވާ ކަމަށް ވިދާޅުވެފައެވެ.
އަލަށް އާންމުކުރި ފައިލްތަކުގެ ތެރޭގައި ބިލިއަނަރު އިލޮން މަސްކާއި އެޕްސްޓީންއާ ދެމެދު މުއާމަލާތް ކުރެވިފައިވާ އީމެއިލްތަކާއި، ރައީސް ޓްރަމްޕްގެ ކުރީގެ އެޑްވައިޒަރު ސްޓީވް ބެނަން އާއި އެޕްސްޓީންއާ ދެމެދު ބަދަލު ކުރެވިފައިވާ މެސެޖުތަކުގެ އިތުރުން އެޕްސްޓީން ޖަލުގައި މަރުވި ހާދިސާގެ ތަހުގީގު ކަރުދާސްތައް ހިމެނެއެވެ.
ލިޔުންތަކުން ބެނަން އާއި އެޕްސްޓީންއާ ދެމެދު 2018 އާއި 2019 އާ ދެމެދު ބަދަލުކުރި އެތައް ހާސް މެސެޖުތަކެއް ހިމެނެ އެވެ.
އެޕްސްޓީންގެ އަގު ވެއްޓިފައިވަނިކޮށް، އޭނާގެ އަބުރު އިއާދަކުރުމަށް ބެނަން ވަނީ ޑޮކިއުމަންޓްރީއެއް ތައްޔާރުކުރުމަށް އެހީތެރިވެފައެވެ. އަދި ބެނަން، އެޕްސްޓީންގެ ގެއަށް ވަދެ ނުކުމެ ހެދީ މީޑިއާގެ ލޯތަކަށް ސިއްރުން ވަލު ދޮރާށިން ކަން މެސެޖުތަކުން އެނގެއެވެ.
މަސްކް، އެޕްސްޓީންއާ ގުޅުމެއް ނެތް ކަމަށް ތަކުރާރުކޮށް ބުނަމުން ދިޔަ ނަމަވެސް، 2012 އާއި 2014 އާ ދެމެދު އެޕްސްޓީންގެ ރަށަށް ޒިޔާރަތްކުރުމާ ގުޅޭގޮތުން ދެމީހުންގެ ދެމެދުގައި އީމެއިލްތަކެއް ބަދަލުކުރެވިފައިވާކަން ފައިލްތަކުން ދައްކައެވެ. އެއް އީމެއިލެއްގައި މަސްކް ވަނީ "އެންމެ ފޯރިގަދަ ޕާޓީ އޮންނާނީ ކޮން ރެއެއްގައިތޯ" ސުވާލުކޮށްފަ އެވެ. ނަމަވެސް، މަސްކް އެ ޖަޒީރާއަށް ދިޔަކަން މި ލިޔުންތަކުން ސާފެއް ނުވެއެވެ.
އެމެރިކާގެ މިހާރުގެ ކޮމާސް ސެކްރެޓަރީ ހޮވާޑް ލަޓްނިކް، 2005 ގެ ފަހުން އެޕްސްޓީންއާ ބައްދަލުނުކުރާ ކަމަށް ވިދާޅުވެފައިވީ ނަމަވެސް، 2012 ވަނަ އަހަރު އޭނާގެ އާއިލާއާއެކު އެޕްސްޓީންގެ ޖަޒީރާ "ލިޓްލް ސެއިންޓް ޖޭމްސް" އަށް މެންދުރުގެ ކެއުމަކަށް ދިއުމަށް ރޭވިކަން އީމެއިލްތަކުން ވަނީ ހާމަވެފައެވެ. އޭގެ އަނެއް ދުވަހު އެޕްސްޓީން ވަނީ "ބައްދަލުވީތީ އުފާކުރާ" ކަމަށް ބުނެ ލަޓްނިކަށް މެސެޖެއް ފޮނުވާފައެވެ.
ޖަސްޓިސް ޑިޕާޓްމަންޓުން ބުނި ގޮތުގައި، އެޕްސްޓީންގެ ޝިކާރައަކަށްވި މީހުންގެ ވަނަވަރު ރައްކާތެރިކުރުމުގެ ގޮތުން ގިލެއިން މެކްސްވެލް ފިޔަވައި އެހެން ހުރިހާ އަންހެނުންގެ މައުލޫމާތު ވަނީ ވީޑިއޯތަކާއި ފޮޓޯތަކުން އުނިކޮށްފައެވެ.
މި މައްސަލައިގައި މިހާތަނަށް ޖިނާއީ ދައުވާއެއް އުފުލިފައިވަނީ ހަމައެކަނި އެޕްސްޓީންގެ ކުރީގެ ލޯބިވެރިޔާ މެކްސްވެލްގެ މައްޗަށެވެ. އެޕްސްޓީން 2019 ވަނަ އަހަރު ޖަލުގައި އަމިއްލައަށް މަރުވެފައިވާއިރު، އޭނާގެ މައްޗަށް ތުހުމަތުކުރި ވާޖިނިއާ ރޮބާޓްސް ގިފްރޭ ވަނީ 2025 ވަނަ އަހަރުގެ އޭޕްރީލް މަހު މަރުވެފައެވެ.
