އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބަށް ކުރިމަތިލާން އިތުރު 10 ދުވަސް ދިނުމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިއަދު އެދިއްޖެ އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީން ކައުންސިލް އިންތިހާބަށް ހަމަޖައްސާފައިވާ ތަރުޖަމާން، ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ އިންތިހާބުގައި ވާދަކުރާ ކެންޑިޑޭޓުންގެ ހައްގުތައް ގެއްލިދާނެ ކަންތައްތައް ދިމާވެ، އެހެނިހެން ދަތިތައް ދިމާވަމުންދާތީ ކެންޑިޑޭޓުންނަށް އިތުރު 10 ދުވަހުގެ އިތުރުކޮށްދޭން އެދޭ ކަމަށެވެ.
"މި މުއްދަތުގެ ތެރޭގައި ހަމައެކަނި އޮންލައިންކޮށް ހުށަހެޅުމަށްޓަކައި ޖާގަ ދީފައި އޮތުމަކީ މި އިންތިހާބަށް ގިނަ ކެންޑިޑޭޓުންގެ އިންތިހާބީ ހައްގު ގެއްލިގެންދާނެ ކަމަކަށް އެބަ ފެނޭ. އެހެންވީމަ އަޅުގަނޑުމެން ވަރަށް އިހުލާސްތެރިކަމާއެކުގައި އިލެކްޝަނަށް ދަންނަވަން އޮތީ މި އިންތިހާބަށް ކުރިމަތިލުމަށްޓަކައި އިލެކްޝަނުގެ ފަރާތުން އިތުރު 10 ދުވަހުގެ މުއްދަތެއް ދިނުމަށް،" އޭނާ ވިދާޅުވި އެވެ.
ވަހީދު ވިދާޅުވީ އިންތިހާބުގައި ވާދަކުރާ ކެންޑިޑޭޓުންގެ ރެކޯޑު ސާފުކުރުމަށް މަސައްކަތްތައް ކުރަމުންދާއިރު ކަރެކްޝަނަލް ސާވިސް އާއި ޖުޑީޝަލް ސާވިސް އިން ރެކޯޑުތައް ސާފުކުރަން ލަސްތަކެއް ދިމާވާ ކަމަށެވެ.
އިންތިހާބަށް ގިނަ ބަޔަކު ކުރިމަތިލާނެކަން ދަނެ އެކަމަށް ބައެއް ތަންތަނުން ތައްޔާރުވެފައި ނެތް ކަމަށާއި ފޯމުތައް ޕްރޮސެސްކުރަން ހަތަރު ދުވަސްވެސް ނަގާ ކަމަށް ވަހީދު ވިދާޅުވި އެވެ.
"މި އިންތިހާބަށް ކުށުގެ ރެކޯޑު ސާފުކުރުމަށްޓަކައި މަސައްކަތް ކުރާއިރުގައި އެ ގުޅުންހުރި މުއައްސާތަކުން ހާއްސަކޮށް ކަރެކްޝަނަލް ސާވިސް އާއި ޖުޑީޝަލް ސާވިސް އިން އަޅުގަނޑުމެންނަށް އިންތިހާއަށް ލަސް އެބަވޭ. އެތަންތަން އިންތިހާބަށް ތައްޔާރުވެފައި އޮތް ކަމަށް ލަފައެއް ނުކުރެވޭ. ވާންޖެހޭ ތައްޔާރީތައް ވެފައޮތް ކަމަށް ލަފައެއް ނުކުރެވޭ،" އެނާ ވިދާޅުވި އެވެ.
މީގެއިތުރުން އޭނާ ވިދާޅުވީ އިންތިހާބަށް ކުރިމަތިލާން 16 ދުވަސް ދިންއިރު، އޭގެއިން ފަސްވަރަކަށް ދުވަސް ރެކޯޑުތައް ސާފުކުރަމަށް ހޭދަވާ ކަމަށެވެ. އަދި ފޯމުތައް ރިޖެކްޓްވާތީ އެކަމާ ގުޅިގެން ވެސް އޭނާ ކަންބޮޑުވުން ފާޅުކުރެއްވި އެވެ.
ވަހީދު ވިދާޅުވީ އިންތިހާބަށް ކުރިމަަތިލުމުގެ މުއްދަތު އިލެކްޝަނުން އިތުރުކޮށްނުދީފިނަމަ އެހެން ވަސީލަތްތައް މެދުވެރިކޮށް ހައްގު ހޯދުމަށް މަސައްކަތް ކުރާނެ ކަމަށެވެ.
އިންތިހާބަށް ކުރިމަތިލުމުގައި އެމްޑީޕީއަށް ދިމާވާ ދަތިތަކާ ގުޅިގެން އޮންލައިންކޮށް ފޯމުލެވުމުގެ އިތުރުން މެނުއަލްކޮށް ވެސް ފޯމު ލެވޭނެ އިންތިޒާމު ހަމަޖައްސަން އެ ޕާޓީން ކުރިން ގޮވާލި އެވެ.
އިންތިހާބަށް ކުރިމަތިލުމުގެ ފުރުސަތު ހުޅުވާލީ ފެބްރުއަރީ 1، ވާ އާދީއްތަ ދުވަހުގެ 15:00 ގެ ނިޔަލަށެވެ.
މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.
އެޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފަ އެވެ.
