އަންނަ އެޕްރީލް 4، ގައި ބާއްވާ ލޯކަލް ކައުންސިލް އިންތިހާބަށް ކުރިމަތިލުމުގައި ހުރި ދަތިތަކާ ގުޅިގެން އިންތިހާބަށް އެތައް ބަޔަކަށް ކުރިމަތިނުލެވިދާނެތީ އިދިކޮޅު އެމްޑީޕީން މިއަދު ކަންބޮޑުވުން ފާޅުކޮށްފި އެވެ.
އެމްޑީޕީން ބުނީ އިންތިހާބަށް ކުރިމަތިލުމަށް އިލެކްޝަންސް ކޮމިޝަނުން ދީފައިވާ މުއްދަތު ކުޑަވުމުން ދަތިތައް ދިމާވަމުންދާ ކަމަށެވެ.
މިގޮތުން ރިކޯޑު ސާފުކުރުމާއި އެހެނިހެން ކަންކަން ފުރިހަމަކުރަން ދުވަސްތައް ނަގާތީ، އިލެކްޝަނުން އިންތިހަބަށް ކުރިމަތިލާން ދިނީ އެކަށީގެންވާ މުއްދަތެއް ނޫން ކަމަށް އެމްޑީޕީން ބުންޏެވެ.
"ދައުލަތުގެ އިދާރާތަކުން ރިކޯޑް ސާފުކުރުމާއި އެހެނިހެން ކަންކަން ފުރިހަމަކުރުމަށް އެތަކެއް ދުވަހެއް ނަގާތީ، މިއީ ފޯމު ހުށަހެޅުމަށް އެކަށީގެންވާ މުއްދަތެއް ނޫންކަން ފާހަގަކޮށް، މިކަމުގެ ސަބަބުން އެތައް ބަޔަކަށް އިންތިޚާބަށް ކުރިމަތިލުމުގެ ފުރުސަތު ގެއްލިދާނެކަމުގެ ކަންބޮޑުވުން ފާޅުކުރަން،" އެމްޑީޕީން ބުންޏެވެ.
އެމްޑީޕީން ވަނީ އެ ޕާޓީގެ ކެންޑިޑޭޓުންނަށް އިންތިހާބުގައި ވާދަކުރުމަށް ކުރިމަތިވަމުން އަންނަ ދަތިތައް ހައްލުކޮށްދިނުމަށް އިލެކްޝަންސްއަށް ގޮވާލާފަ އެވެ.
އިންތިހާބަށް ކުރިމަތިލުމަށް ދީފައިވާ މުއްދަތު ކުޑަކަމުން މެނުއަލްކޮށް ވެސް އިންތިހާބަށް ކުރިމަތިލުމުގެ ފުރުސަތު ދިނުމަށް އެމްޑީޕީން މީގެ ކުރިން ގޮވާލާފައިވެ އެވެ. އޭގެއިތުރުން 24 ގަޑިއިރު އޮންލައިންކޮށް އިންތިހާބަށް ކުރިމަތިލެވޭނެ އިންތިޒާމު ހަމަޖައްސަން ވެސް އެ ޕާޓީން ގޮވާލި އެވެ.
އިންތިހާބަށް ކުރިމަތިލުމުގެ ފުރުސަތު ހުޅުވާލީ ފެބްރުއަރީ 1، ވާ އާދީއްތަ ދުވަހުގެ 15:00 ގެ ނިޔަލަށެވެ.
މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.
އެޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފަ އެވެ.
