ކުރިއަށް އޮތް ލޯކަލް ކައުންސިލް އިންތިހާބަށް އަމިއްލަ ގޮތުން ވާދަކުރާ ކެންޑިޑޭޓުންގެ ތާއީދު ފޯމު ފުރުމަށް ހަމައެކަނި އީފާސް ބޭނުންކުރާ މައްސަލައިގައި ކުރީގެ ރައީސް އަބްދުالله ޔާމީން އަބްދުލްގައްޔޫމް އިލެކްޝަންސްއާ ދެކޮޅަށް ދައުވާ އުފުލައިފި އެވެ.
ރޭ ބޭއްވި ޕީއެންއެފްގެ ޖަލްސާގައި ވާހަކަދައްކަވަމުން ޔާމީން ވިދާޅުވީ ޝަރުއީ ކޯޓުތަކުގައި ވެސް ހެއްކެއް ބަލައިގަންނަނީ، އޭގެ އަސްލު ކިތާބީ ނުވަތަ ޝަފަހީ ހެކި އޮންނަ ނަމަ، ކަމަށެވެ. އެހެންކަމުން، ކަރުދާހުން ކުރާ މުއާމަލާތް އެއްކޮށް ހުއްޓައިލުމުގެ ބާރު އިލެކްޝަންސް ކޮމިޝަނަށް ލިބިގެން ނުވާ ކަމަށް އެމަނިކުފާނު ވިދާޅުވި އެވެ.
އަދި، ހަމައެކަނި އީފާސް ބޭނުންކޮށްގެން ކެންޑިޑޭޓުންގެ ކަންކަން ކުރިއަށް ގެންދިޔުމަށް ގާނޫނީ ގޮތުން ވެސް އިލެކްޝަންސްއަށް ބާރު ނުލިބޭ ކަމަށް ޔާމީން ވިދާޅުވި އެވެ.
"އަޅުގަނޑުމެން މިއުޅެނީ މި މައްސަލަތައް ހިފައިގެން އިލެކްޝަންސް ކޮމިޝަން ގޮވައިގެން ކޯޓަށް ވަދެ، މި ކަންކަމަށް އަޅުގަނޑުމެން ޗެލެންޖު ކޮށްފައި އަޅުގަނޑުމެން ކޯޓަށް މި ވަނީ. އެއީ އަޅުގަނޑުމެން ކުރާނީ އެ މަސައްކަތް، އަޅުގަނޑުމެން ކޯޓުން އިރާދަކުރެއްވިއްޔާ މުހުލަތު އޮތީވިއްޔާ މިކަން ނިންމާނަން، އަޅުގަނޑުމެން ކާމިޔާބު ވެސް ވާނެ،" ޔާމީން ވިދާޅުވި އެވެ.
ޔާމީން ވިދާޅުވީ ދިވެހިރާއްޖޭގެ ޝަރުއީ ކޯޓުތަކުގައި މިނިވަންކަމެއް ނެތް ކަމަށެވެ. އެހެންކަމުން އެ މައްސަލަ ކުރިއަށް ގެންދާނެ ކަމާމެދު ސުވާލު އުފައްދަވައި އެމަނިކުފާނު ވިދާޅުވީ ކޯޓުގައި އެ މައްސަލަ ކުރިއަށް ނުގެންދިޔަ ނަމަވެސް، ހަމައެކަނި އީފާސް ބޭނުންކުރަން ނިންމުމުގެ ގާނޫނީ ބާރު އިލެކްޝަންސްއަށް ލިބިގެން ނުވާކަން ރައްޔިތުން ގަބޫލު ކުރާނެ ކަމަށެވެ.
ޔާމީންގެ އިތުރުން ވެސް، ތާއީދު ފޯމު ފުރުމަށް ހަމައެކަނި އީފާސް ބޭނުންކުރާ މައްސަލައިގައި ކުރީގެ ހޯމް މިނިސްޓަރު، އުމަރު ނަސީރު ވެސް ވަނީ ކަންބޮޑުވުން ފާޅުކުރައްވައިފަ އެވެ.
އިލެކްޝަންސްގެ ރައީސް، މުހައްމަދު ޒާހިދަށް އުމަރު މިއަދު ފޮނުއްވި ސިޓީއެއްގައި ވިދާޅުވީ، އަމިއްލަ ގޮތުން ވާދަކުރާ ކެންޑިޑޭޓުން ހޯދަންޖެހޭ 50 ސޮއި، އެ ސޮއި ދޭ ފަރާތުން އަމިއްލައަށް އީ-ފާސް މެދުވެރިކޮށް ލޮގިންވެ "ވެރިފައި" ކުރަންޖެހޭ ގޮތަށް ހަމަޖެއްސުމަކީ ބަލައިގަނެވޭނެ ކަމެއް ނޫން ކަމަށެވެ.
