މާލޭ ސިޓީގެ މޭޔަރުކަމުގެ މަގާމަށް، ރައީސް ޑރ. މުހައްމަދު މުއިއްޒުގެ ތާއީދާއެކު ކުރީގެ ޗީފް އޮފް ޑިފެންސް ފޯސް މޫސާ އަލީ ޖަލީލު ކުރިމަތިލެއްވުމަކީ މާލޭ ސިޓީ ކައުންސިލަށް އޮތް ބޮޑު ނުރައްކަލެއް ކަމަށް ވ. އަތޮޅު ކައުންސިލްގެ ރައީސް ޝުޖާއު އަލީ ސިފަ ކުރައްވައިފި އެވެ.
ޝުޖާއު އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ ޖަލީލަކީ ރައީސް މުއިއްޒުގެ އިހުތިޔާރެއް ނަމަ، މާލޭ ސިޓީ ކައުންސިލަށް އެންމެ ފައިދާހުރި ގޮތަކީ އެކަމާ ދެކޮޅު ހެދުން ކަމަށެވެ.
ޝުޖާއު ފާހަގަކުރެއްވި ގޮތުގައި، މި ނިންމުމާ ދެކޮޅު ހަދަންޖެހޭ މައިގަނޑު ސަބަބަކީ ރައީސް މުއިއްޒުގެ މަސްލަހަތު ފުށުއަރާ އެތައް މައްސަލައެއް މިހާރުވެސް ސިޓީ ކައުންސިލްގެ ތެރޭގައި ހުރުމެވެ. ޖަލީލު އެ މަގާމަށް ގެނައުމުގެ އަސްލު ބޭނުމަކީ އެފަދަ މައްސަލަތައް އޮއްބާލުން ކަމަށް އޭނާ ތުހުމަތު ކުރެއްވިއެވެ.
"ޖަލީލުގެ މައިގަނޑު މަސައްކަތަކަށް އޮންނާނީ އެކަންތައްތައް (ރައީސް މުއިއްޒުގެ މަސްލަހަތު ހުރި މައްސަލަތައް) ހިމާޔަތްކުރުން،" ޝުޖާއު ވިދާޅުވިއެވެ.
ޝުޖާއުގެ މި ވާހަކަތަކުން ދޭހަވަނީ، ސަރުކާރުގެ ނުފޫޒު އޮތް ބޭފުޅަކު މޭޔަރުކަމަށް އައުމަކީ، ކައުންސިލުން މިނިވަންކަމާއެކު މައްސަލަތައް ބެލުމަށާއި ރައްޔިތުންނަށް ހިދުމަތް ކުރުމަށް އޮތް ހުރަހެއް ކަމަށެވެ. ހާއްސަކޮށް، ކުރީގެ މޭޔަރު އަދި މިހާރުގެ ރައީސްގެ ދައުރުގައި ހިނގާފައިވާ ކަންކަން ތަހުގީގު ކުރުމުގެ ފުރުސަތު ގެއްލިގެންދާނެ ކަމުގެ ބިރު އޭނާ ވަނީ ފާޅުކުރައްވާފައެވެ.
މި ފާޑުކިޔުންތަކާ ގުޅިގެން ރައީސް އޮފީހުން ނުވަތަ ޖަލީލުގެ ފަރާތުން އަދި އެއްވެސް ރައްދެއް ދީފައެއް ނުވެއެވެ.
މުއިއްޒުގެ މޭޔަރު ކަމުގައި މާލޭ ސިޓީ ކައުންސިލުން ހިންގި ކަމަށް ތުހުމަތު ކުރެވޭ ހިޔާނާތުގެ ގިނަ މައްސަލަތަކެއް ފެންމަތިވި އެވެ.
އޭރު ފެންމަތިވި މައްސަލަތަކުގެ ތެރޭގައި މާލޭގެ މަގުމަތީގެ ޕާކިން ސްލޮޓުތަކަށް ފައިސާ ނަގައިގެން ވިއްކުމާއި، މާލޭގެ އަގުބޮޑެތި ބިންތަކުން ރިޝްވަތު ނަގައި، ކުޑަ އަގެއްގައި ދޫކުރުމުގެ ތުހުމަތު ހިމެނެއެވެ. އަދި ގަސް ގަތުމުގެ ނަމުގައި ބޮޑު އިސްރާފެއް ނުވަތަ ވައްކަމެއް ކުރުމާއި، ވިލިމާލޭގައި ދުއްވަން ގެނައި ބަގީތަކުގެ މައްސަލައާއި، ސިޓީ ކައުންސިލަށް ނުފޫޒުގެ ތެރެއިން ގިނަ އަދަދެއްގެ މުވައްޒަފުން ވެއްދި މައްސަލަވެސް ހިމެނެއެވެ.
މީގެ ތެރެއިން ބައެއް މައްސަލަތައް އޭސީސީން ބަލަން ފެށިނަމަވެސް، މައްސަލަތައް ކުރިއަށް ގެންދާ މިންވަރު ހާމައެއް ނުކުރެ އެވެ.
