ލަންޑަން (ޖެނުއަރީ 26) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން އާސެނަލް ދަނޑުގައި އެ ޓީމާ ދެކޮޅަށް ކުޅެ 3-2 އިން މޮޅުވެއްޖެ އެވެ.
ރުބެން އަމޮރިމް ޔުނައިޓެޑްގެ ކޯޗުކަމުން ވަކިކޮށް، ފުރަތަމަ ގެނައި، ވަގުތީ ކޯޗު ޑަރެން ފްލެޗާ އަށް ވެސް އެކަށީގެންވާ މަސައްކަތެއް ނުކުރެވުނެވެ. އޭގެ ފަހުން، ހަވާލުވި، ވަގުތީ ކޯޗު، މައިކަލް ކެރިކް ހަވާލުވި ފަހުން ޔުނައިޓެޑުން މި ވަނީ ލީގުގެ އެއް ވަނައިގައި އޮތް އާސެނަލާއި ދެ ވަނައިގައި އޮތް މެންޗެސްޓާ ސިޓީ ބަލިކޮށްފަ އެވެ.
އާސެނަލް ދަނޑުގައި ރޭ ކުޅުނު މެޗުގައި ނުކުތް ނަތީޖާ އަށް ފަހު، އެއް ވަަނައިގައި އެ ޓީމުގެ ލީޑު ވަނީ ހަތަރު ޕޮއިންޓަށް ކުޑަވެފަ އެވެ. އެންމެ ފަހުން ކުޅުނު ތިން މެޗުން ވެސް މޮޅެއް ނުލިބުނު އާސެނަލް އެއް ވަަނައިގައި އޮތީ 23 މެޗުން 50 ޕޮއިންޓާ އެކު އެވެ. ދެ ވަނައިގައި އޮތް ސިޓީ އާއި ތިން ވަނައިގައި އޮތް އެސްޓަން ވިލާ އަށް ވަނީ 23 މެޗުން 46 ޕޮއިންޓް ލިބިފަ އެވެ. ވިލާ އިން ރޭ ވަނީ ނިއުކާސަލް އަތުން 2-0 އިން ކުރިހޯދައި، 21 އަހަރު ތެރޭ ނިއުކާސަލް ދަނޑުގައި ފުރަަތަމަ ފަހަރަށް މޮޅުވެފަ އެވެ.
އެމިރޭޓްސް ސްޓޭޑިއަމްގައި އާސެނަލުން ރޭ ލީޑުނެގީ 29 ވަނަ މިނިޓްގައި ޔުނައިޓެޑްގެ ލިސަންދްރޯ މާޓިނޭޒް އަތުން ބައިކޮޅަށް ވަން ގޯލުންނެވެ. އެކަމަކު، އާސެނަލްގެ މާޓިން ޒުބިމެންޑީ އަތުން ހެދުނު ގޯހެއްގައި، ބްރަޔާން އެމްބެއުމޯ ވަނީ ފުރަތަމަ ހާފުގައި ޔުނައިޓެޑަށް އެއްވަރުކޮށްދީފަ އެވެ. ދެ ވަނަ ހާފުގައި ޕެޓްރިކް ޑޯގޫ އޭރިއާ ބޭރުން ޖެހި ހިތްގައިމު ގޯލަކުން، ޔުނައިޓެޑުން އެއްވަރުކުރިއިރު، މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައި ހުއްޓައި، ކޯނަރެއްގައި ތަނަވަސްވި ފުރުސަތަކުން، މިކޭލް މެރީނޯ އާސެނަލަށް އެއްވަރުކޮށްދިނެވެ.
ބަދަލަކަށް ކުޅެން އެރި މަޓެއުސް ކޫންޏާ ވަނީ، އޭރިއާބޭރުން ގޯލުގެ ދުރު ކަނަށް ބޯޅަ އަމާޒުކޮށްލައިގެން، 87 ވަނަ މިނިޓްގައި ޔުނައިޓެޑް މޮޅުކޮށްދިން ލަނޑު ޖަހައިފަ އެވެ.
މި ނަތީޖާއާ އެކު، ޔުނައިޓެޑް ވަނީ ލީގުގެ ހަތަރު ވަނަ އަށް ޖެހިލައިފަ އެވެ. ކްރިސްޓަލް ޕެލަސް ދަނޑުގައި ރޭ 3-1 އިން މޮޅުވި، ޗެލްސީ ވަނީ ފަސް ވަނަ އަށް އަރައިފަ އެވެ. ޔުނައިޓެޑަށް 23 މެޗުން 38 ޕޮއިންޓް ލިބިފައިވާއިރު، ފަސް ވަނައިގައި އޮތް ޗެލްސީ އަށް ވަނީ 23 މެޗުން 37 ޕޮއިންޓް ލިބިފަ އެވެ. ހަ ވަނަ އަށް ވެއްޓުނު ލިވަޕޫލްގެ 23 މެޗުން އޮތީ 36 ޕޮއިންޓެވެ.
