އެސްއޯއީތައް މާލީ އަނދިރިކަމެއްގައި؛ ބައެއް ކުންފުނިތައް އޮޑިޓު ނުކުރާތާ ތިން އަހަރު

ރައްޔިތުންގެ ފައިސާއިން ހިންގާ އެންމެ ބޮޑެތި ކުންފުނިތައް އޮޑިޓުނުކޮށް މާލީ ހިސާބުތައް "އަނދިރިކަމެއްގައި" އޮތްކަން ހާމަވެއްޖެ އެވެ.

ޕްރައިވަޓައިޒޭޝަން ބޯޑު (ޕީސީބީ) އިން އާންމުކުރި ކުންފުނިތަކުގެ 2024 ވަނަ އަހަރުގެ ރިޕޯޓަށް ބަލާއިރު، ސަރުކާރުގެ އެންމެ ނުފޫޒުގަދަ އަދި އެންމެ ބޮޑު ބަޖެޓެއް ގެންގުޅޭ ކުންފުނިތައް ބަރާބަރަށް އޮޑިޓެއް ނުކުރެ އެވެ.

އެ ރިޕޯޓުން ދައްކާ ގޮތުގައި އާރްޑީސީ، ވެމްކޯ، ޕީއެސްއެމް އަދި ބީސީސީ، 2022، 2023 އަދި 2024 ވަނަ އަހަރުގެ އޮޑިޓު ނިންމާފައެއް ނުވެއެވެ. ހައްޖު ކޯޕަރޭޝަނުން 2023 އަދި 2024 ގެ އޮޑިޓު ނިންމާފައެއް ނުވެ އެވެ.

މި ކުންފުނިތައް ހިމެނޭހެން ޖުމުލަ 13 ކުންފުންޏެއް، 2024 ގެ އޮޑިޓު އަދިވެސް ނިންމާފައި ނުވާކަން އެނގެ އެވެ. ރާއްޖޭގެ އެންމެ ބޮޑު އެސެޓް ބޭސް އޮންނަ އެޗްޑީސީ އާއި، ދަރަނީގެ މަޅީގައި ޖެހިފައިވާ ފެނަކަ ކޯޕަރޭޝަނުން މި ލިސްޓުގައި ހިމެނެ އެވެ.

މިދިޔަ އަހަރުގެ އޮޑިޓު ފުރިހަމަ ނުކުރާ ކުންފުނިތަކަކީ؛

1. އެޗްޑީސީ
2. އެމްޕީއެލް
3. އައްޑޫ އިންޓަނޭޝަނަލް އެއާޕޯޓް
4. ސްޓެލްކޯ
5. ޕީއެސްއެމް
6. އާރްޑީސީ
7. އެމްއެފްއެމްސީ
8. ވެމްކޯ
9. ބީސީސީ
10. ފަހި ދިރިއުޅުން ކޯޕަރޭޝަން
11. ޓްރޭޑްނެޓް
12. ފެނަކަ
13. ހައްޖު ކޯޕަރޭޝަން

ސަރުކާރުގެ ގިނަ ކުންފުނިތަކެއްގެ މާލީ ހާލަތު ގޯހުން ގޯހަށް ދާކަމަށް ރިޕޯޓުން ދައްކާއިރު، 2023 ވަނަ އަހަރަށް ވުރެ 2024 ގައި އެސްއޯއީތަކުގެ މުވައްޒަފުންގެ އަދަދު ވަނީ އިތުރުކޮށްފަ އެވެ.