ބީލަމަކަށް ނުލައި 2.7 ބިލިއަން ރުފިޔާގެ މަޝްރޫއު ސިއްރުން ބަހާލާފައި ވާއިރު، ރާއްޖެއަކީ ހާމަކަން ބޮޑު ނިޒާމެއް އޮތް ގައުމެއް ކަމަށް ރައީސް މުހައްމަދު މުޢިއްޒު މިއަދު ވިދާޅުވެއްޖެ އެވެ.
ބައިނަލްއަގުވާމީ އެންޓި-ކޮރަޕްޝަން ދުވަހުގެ މުނާސަބަތާ ގުޅިގެން މުއިއްޒުއާ ހަވާލާދީ ރައީސް އޮފީހުގެ ވެބްސައިޓުގައި ބުނީ "ދިވެހިރާއްޖެ ސާބިތުވެ އޮތީ، ހާމަކަން ބޮޑު، ދެފުށްފެންނަ ނިޒާމެއްގެ އިތުރުން، ޖަވާބުދާރީކުރުވުމާއި ނަޒާހާތްތެރިކަމަށް ހާއްސަ އަހަންމިއްޔަތުކަމެއް ދޭ ގައުމެއްގެ ގޮތުގައި" ކަމަށެވެ.
ނަމަވެސް ސަރުކާރުން ހިންގާ ތަރައްގީގެ އެންމެ ބޮޑެތި މަޝްރޫއުތަކުގެ ތަފްސީލު ހާމަކުރުމަށް ސަރުކާރުން ވަނީ ދެކޮޅު ހަދާފައެވެ. ހާއްސަކޮށް 2.7 ބިލިއަން ރުފިޔާގެ އަގުހުރި މަޝްރޫޢުތައް، ވާދަވެރި ބީލަމަކަށް ނުލައި، އެ މަޝްރޫޢުތައް ކުދިކުދި ބައިތަކަށް ބަހާލައިގެން "ސިއްރުވެރި" ގޮތަކަށް ވަކި ބަޔަކަށް މަންފާ ވާ ގޮތަށް ހަވާލުކޮށްފައި ވާތީ އާންމުންގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.
މުއިއްޒު ވިދާޅުވީ "ކޮރަޕްޝަނަށް މި ސަރުކާރުން އެއްވެސް ޖާގައެއް ނުދެއްވާ" ކަމަށާއި، ކޮރަޕްޝަނާއި ފަސާދައިގެ ނުރައްކަލާ ދެކޮޅަށް ރާއްޖެއިން މަސައްކަތް ކުރައްވަމުން ގެންދަވާ ކަމަށެވެ.
ނިޒާމީ ކޮރަޕްޝަނުގެ ނުރައްކާތެރިކަން ފާހަގަކުރައްވައި މުއިއްޒު ވިދާޅުވީ "ނިޒާމީ ކޮރަޕްޝަނުގެ ސަބަބުން ގާނޫނުގެ ވެރިކަން ފުނޑުފުނޑުވެ، ދެމެހެއްޓެނިވި ތަރައްގީއަށް ހުރަސްއެޅި، ޑިމޮކްރެޓިކް ނިޒާމު ބަލިކަށިވެ، ރައްޔިތުންގެ އަސާސީ ހައްގުތައް ނިގުޅައިގަނެވޭ،" ކަމަށެވެ.
ސަރުކާރުގެ މުއާމަލާތްތައް ދެފުށް ފެންނަ ގޮތަށް ހެދުމަށްޓަކައި "މޯލްޑިވްސް 2.0 ޑިޖިޓަލް ޓްރާންސްފޯމޭޝަން" ގެ ނަމުގައި މަޝްރޫޢެއް ހިންގަވާކަމަށާއި، "ހިންމި" ގެ ނަމުގައި ކޮރަޕްޝަން ރިސްކް އެސެސްމަންޓް ޓޫލްކިޓެއް ތައާރަފްކޮށް، އެންޓި-ކޮރަޕްޝަން އެކަޑަމީއެއް އުފެއްދެވުން ފަދަ ކަންކަން ރާވާފައިވާކަން މުއިއްޒު ވިދާޅުވެފައިވެ އެވެ.
ރާއްޖެއިން 2007 ވަނަ އަހަރު އ.ދ.ގެ ކޮންވެންޝަން އަގެއިންސްޓް ކޮރަޕްޝަން (ޔޫ.އެން.ސީ.އޭ.ސީ) ގައި ބައިވެރިވެފައިވުމަކީ ކޮރަޕްޝަނާ ދެކޮޅަށް ރާއްޖެއިން ދޭ އަހަންމިއްޔަތުކަން ހާމަވާކަމެއް ކަމަށް ވެސް މުއިއްޒު ސިފަކުރެއްވި އެވެ. އަދި ވިދާޅުވީ "މި މުއާހަދާގެ އުސޫލުތައް، ހާމަކަން ބޮޑު، އަދި ސާބިތުކަމާއެކު ނެގެހެއްޓުމަށް ރާއްޖެއިން އަބަދުވެސް މަސައްކަތްކުރަމުންދާނެ" ކަމަށެވެ.
ނަމަވެސް، ބައިނަލްއަޤްވާމީ މުއާހަދާތަކުގެ ވާހަކަ ދައްކަވައި، ނަޒާހަތްތެރިކަމަށް ވަކާލާތު ކުރައްވާއިރު، ގައުމުގެ މާލީ ބޮޑެތި މުއާމަލާތްތައް ހިންގަވަމުން ގެންދަވާ ގޮތާއި ރައީސް ދައްކަވާ ވާހަކަފުޅާ ދިމާނުވާކަން ފާހަގަކޮށް ސަރުކާރަށް ފާޑުކިޔުން ވަނީ އަމާޒުވެފަ އެވެ.
ރައީސްގެ މެސެޖު ނިންމަވާލައްވަމުން ވިދާޅުވެފައިވަނީ ނަޒާހަތްތެރިކަމާއި، ޑިމޮކްރެޓިކް ވެރިކަން ހަރުދަނާކޮށް، ޤާނޫނުގެ ވެރިކަން ނަގަހައްޓައި، ހަމަހަމަކަމާއެކު ޢަދުލު އިންސާފު ގާއިމުކުރާ ގައުމެއްގެ ގޮތުގައި މި ސަރުކާރުން އަބަދުވެސް މަސައްކަތް ކުރައްވާނެކަމުގެ ޔަގީންކަން ތަކުރާރު ކުރައްވަމުންނެވެ.
ނަމަވެސް މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީ ބަދަލުކުރި މައްސަލަ ބެލޭނެ ކަމަށް ސުޕްރީމް ކޯޓުން ނިންމުމުން، އޭސީސީ އާއި ޖޭއެސްސީ މެދުވެރިކޮށް ސުޕްރީމް ކޯޓުގެ ބެންޗުން ތިން ފަނޑިޔާރަކު ސަސްޕެންޑުކުރި އެވެ.
މުއިއްޒު އާއި އޭޖީ އުޝާމް ކޯޓަށް ނުފޫޒު ފޯރުވާ ކަމަށް ވިދާޅުވެ ފަނޑިޔާރު ކަމުން ހުސްނުއްސުއޫދު އިސްތިއުފާ ދެއްވި އެވެ. ފަނޑިޔާރު މަހާޒު އަލީ ޒާހިރު އާއި ފަނޑިޔާރު އަޒްމިރާލްދާ ޒާހިރު މަގާމުން ވަކިކުރި އެވެ. ނަމަވެސް އެ ދެ ބޭފުޅުން ވެސް ވިދާޅުވީ ޖަވާބުދާރީވާން ފުރިހަމައަށް ފުރުސަތު ނުލިބޭ ކަމަށެވެ.
