ލޭގެ ޕްރެޝަރު މަތިވުމަކީ އިންސާނާގެ މުޅި ސިއްހަތަށް ހުރި ބޮޑު ނުރައްކަލެކެވެ. އެކަމުގެ ސަބަބުން ހާޓް އެޓޭކް ޖެހުމާއި ސްޓްރޯކް ޖެހުމުގެ ނުރައްކާ އިތުރުވެއެވެ. އެހެންކަމުން، ލޭގެ ޕްރެޝަރު މަތިވިޔަ ނުދީ ކޮންޓްރޯލް ކުރަންޖެހެއެވެ.
ދާދި ފަހުން ކުރި ދިރާސާއެއްގައި ސައެންސްވެރިން ބުނެފައިވަނީ ތަރުކާރީގެ ތަފާތު ބާވަތްތައް ކެއުމުން ލޭގެ ޕްރެޝަރަށް ބަދަލު އަންނަ މިންވަރު ތަފާތު ކަމަށެވެ. އެގޮތުން މި ދިރާސާގައި ސައެންސްވެރިން ވަނީ ތިން ގިންތިއެއްގެ ތަރުކާރީ ބޭނުންކޮށްފައެވެ. އެއީ ފަލަމަޑީގެ (އަޑިއަށް ފައިބާ، ކައްޓަލަ، ދަނޑިއަލުވި ފަދަ....) އާއި ބޮނޑިކޮޕީ އާއިލާގެ ތަރުކާރީ އާއި ގަހުގައި އަޅާ ތަރުކާރީގެ (ބަރަބޯ، ކިޔުކަމްބާ، އަލުވި ފަދަ.....) ބާވަތްތަކެވެ.
އޮސްޓްރޭލިޔާގައި ހެދި މި ދިރާސާގައި ބައިވެރިކުރީ، އުމުރުން 56 އަހަރާއި 72 އަހަރާ ދެމެދުގެ 18 މީހުންނެވެ. މީގެ ތެރޭގައި ހިމެނެނީ ލޭގެ ޕްރެޝަރު އާދައިގެ ވަރަކަށް ދަށުގައި ހުންނަ މީހުންނާއި މެދުމިނުގައި ހުންނަ މީހުންނެވެ. މި މީހުންގެ ޑަޔަސްޓޮލިކް ޕްރެޝަރު (ހިތުގެ ދެވިންދު ދެމެދުގައި އަންނަ ހުސް ހިނދުކޮޅުގައި ލޭގެ ޕްރެޝަރު ހުންނަ މިންވަރު) ހުރީ އެވްރެޖްކޮށް 76.4 އެމްއެމްއެޗްޖީ ގައެވެ. މި މީހުންގެ ސިސްޓޮލިކް ޕްރެޝަރު (ހިތުން ލޭ ޕަމްޕު ކުރާއިރު ލޭ ހޮޅިތަކުގައި ހުންނަ ލޭގެ ޕްރެޝަރު) ހުރީ އެވްރެޖްކޮށް 135.9 އެމްއެމްއެޗްޖީ ގައެވެ.
މި 18 މީހުން ތިން ބަޔަށް ބަހާލައި ދެ ހަފުތާގެ މުއްދަތަށް ތަރުކާރީގެ ބާވަތްތައް ކާންދިނެވެ. ފުރަތަމަ ދެ ހަފުތާ ހަމަވުމުން، ދެ ހަފުތާގެ މެދުކެނޑުމަކަށް ފަހުގައި އިތުރު ދެ ހަފުތާގެ މުއްދަތަށް ތަރުކާރީ ކާންދިނެވެ. ފުރަތަމަ ގުރޫޕަށް ދިނީ ފަލަމަޑީގެ ތެރޭގައި ހިމެނޭ ތަރުކާރީ އެވެ. ދެ ވަނަ ގުރޫޕުގެ މީހުންނަށް ދިނީ އާންމު ތަރުކާރީއެވެ. އަދި ތިން ވަނަ ގުރޫޕުގެ މީހުންނަށް ދިނީ ބޮނޑިކޮޕީ އާއިލާގެ ތަރުކާރީއެވެ. އޭގެ ތެރޭގައި ބްރޮކޮލީ، ކޮލީފްލާވާ އަދި ކޮޕީފަތް ހިމެނެއެވެ.
މި މީހުން މި ތަރުކާރީ ބޭނުންކުރަނީ ސޫޕުގެ ގޮތުގައި ތައްޔާރުކޮށް، މެންދުރުގެ ކެއުމުގަޔާއި ރޭގަނޑުގެ ކެއުމުގައެވެ. މި ދިރާސާގައި ބައިވެރިވި މީހުންގެ 72 އިންސައްތަ މީހުން، އެމީހަކަށް ހާއްސަކޮށްފައި ހުންނަ ސޫޕުތަށި ކޮންމެ ވަގުތަކު ވެސް ހުސްކުރެއެވެ. ދެ ހަފުތާގެ އަޖުމަބެލުމުގެ މުއްދަތަށް ފަހުގައި، މި 18 މީހުންގެ ލޭގެ ޕްރެޝަރު ބެލުމުން، އެމީހުންގެ ލޭގެ ޕްރެޝަރަށް ހެޔޮ ބަދަލުތަކެއް އައިކަން ފާހަގަކުރެވުނެވެ.
ނަމަވެސް މި ތިން ގުރޫޕުގެ ތެރެއިން، ހަމައެކަނި ބޮނޑިކޮޕީ އާއިލާގެ ތަރުކާރީ ކެއި މީހުންގެ ސިސްޓޮލިކް ޕްރެޝަރު، ދުވާލުގެ ވަގުތުގައި އެކަށީގެންވާ މިންވަރަކަށް ދަށްވިކަން ފާހަގަކުރެވުނެވެ. ނަމަވެސް، ރޭގަނޑުގެ ވަގުތުގައި އެމީހުންގެ ސިސްޓޮލިކް ޕްރެޝަރަށް މާ ބޮޑު އެދެވޭ ބަދަލެއް ނާދެއެވެ.
މީގެ އިތުރުން މި ދިރާސާއިން ފާހަގަވި އަނެއް ކަމަކީ، މި ތިން ގުރޫޕުގެ މީހުންގެ ވެސް ބަރުދަން ލުއިވި ކަމެވެ. ލޭގެ ޕްރެޝަރު މަތީގައި ހުންނަ މީހުން، ހަށިގަނޑުގެ ބަރުދަން ލުއި ކުރުމަކީ ކޮންމެހެން ބޭނުންތެރި ކަމެކެވެ. ނަމަވެސް އެމީހުންގެ ލޭގެ ޕްރެޝަރު ދަށްވީ، އެމީހުންގެ ބަރުދަން ލުއިވުމުން ކަމަށް ސައެންސްވެރިން ނުދެކެއެވެ.
މި ނަތީޖާއަށް ބަލައި، ދިރާސާގެ ސައެންސްވެރިން ދެކޭ ގޮތުގައި ބޮނޑިކޮޕީ އާއިލާގެ ތަރުކާރީގެ ބާވަތްތައް ގަވާއިދުން ކެއުމަކީ، ހާޓް އެޓޭކެއް ނުވަތަ ސްޓްރޯކެއް ފަދަ، ހިތުގެ ނުރައްކާތެރި ހާލަތެއް މެދުވެރިވުމުގެ ނުރައްކާ ފަސް ޕަސެންޓް ކުޑަކޮށްދޭނެ ކަމެކެވެ. މިހާރުގެ އާދަ ހުރި ގޮތަށް ބަލާއިރު، ބޮނޑިކޮޕީ އާއިލާގެ ތަރުކާރީގެ ބާވަތްތައް އާންމު ގޮތެއްގައި ބޭނުންކުރަނީ، އެހެން ބާވަތްތަކުގެ ތަރުކާރީއާ އެކުގައި ވަރަށް މަދު ނިސްބަތަކުންނެވެ.
އެހެންކަމުން، އާންމުކޮށް ކެއުމުގައި މި ބާވަތުގެ ތަރުކާރީ ބޭނުންކުރާ މިންވަރު އިތުރުކުރުމަކީ، ހިތުގެ ނުރައްކާތެރި ބަލިތަކުން ރައްކާތެރިވުމަށްޓަކައި މުހިންމު ކަމެކެވެ.
