މާލިއްޔަތު ގަވާއިދު ބަދަލުކޮށް، ބީލަމަކަށް ނުލައި ސަރުކާރުން ބޭނުންވާ އަމިއްލަ ކުންފުނިތަކަކަށް އިއްޔެ ބަހާލި 206 ޕްރޮޖެކްޓު އަގު 2.7 ބިލިއަން ރުފިޔާ އަށް އަރާއިރު، އޭގެ ތެރެއިން ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ ފަސް މެންބަރެއްގެ ކުންފުނިތަކަށް 746 މިލިއަން ރުފިޔާގެ ޕްރޮޖެކްޓު ދިނެވެ.
އަދަދު ނޫހުން ހޯދި މައުލޫމާތުތަކުން މިހާތަނަށް އެނގުނު ގޮތުގައި މަޖިލީހުގެ މެންބަރުންގެ މަސްލަހަތު އޮތް ހަ ކުންފުންޏަކަށް 15 މަޝްރޫއެއް ހަވާލުކުރި އެވެ.
އޭގެތެރޭގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގެ އަނބިކަނބަލުންގެ ނަމުގައި އޮތް ވައިޓު ލިންކްސް ޕްރައިވެޓް ލިމިޓެޑާއި، ތިނަދޫ އުތުރު ދާއިރާގެ މެންބަރު ސައުދުﷲ ހިލްމީގެ ދެ ކުންފުންޏެއް ކަމުގައިވާ ސްވިފްޓު އިންޖިނިއަރިން އަދި މިމްސް ކޮންސްޓަރަކްޝަން އާއި މަހިބަދޫ ދާއިރާގެ މެންބަރު އަހުމަދު ތޯރިގު މައިނާ ސްޕޯޓްސް ފީލްޑް އަދި ތުލުސްދޫ ދާއިރާގެ މެންބަރު އިބްރާހިމް ނަސީމްގެ އަލްޓެކް އަދި ގެމަނަފުށީ ދާއިރާގެ މެންބަރު އަސަދުﷲ ޝިހާބުގެ އެސް.އޭ.އެން.އެން އިންޓަނޭޝަނަލް ޕްރައިވެޓް ލިމިޓެޑް ހިމެނެ އެވެ.
މަޖިލީހުގެ ރައީސް އަބްދުއްރަހީމްގެ މަސްލަހަތު އޮތް ވައިޓު ލިންކްސްއާ ހަވާލުކޮށްފައި ވަނީ ލ. ފޮނަދޫގައި 100 ހައުސިން ޔުނިޓު ގާއިމުކުރުމަށެވެ. އެ މަޝްރޫއުގެ އަގަކީ 139.2 މިލިއަން ރުފިޔާ އެވެ.
އަލްޓެކް ކުންފުންޏާ ހަތަރު މަޝްރޫއުއެއް ހަވާލުކޮށްފައި ވަނީ 285.7 މިލިއަން ރުފިޔާ އަށެވެ. އެއީ ދ. މީދޫގައި 25 ހައުސިން ޔުނިޓު، އއ. އުކުޅަސްގައި 50 ހައުސިން ޔުނިޓު އަދި ޅ. ނައިފަރުގައި 100 ހައުސިން ޔުނިޓު އެޅުމަށެވެ. އަދި ގުރައިދޫގައި ހުންނަ ހާއްސަ އެހީ އަށް ބޭނުންވާ މީހުންގެ މަރުކަޒު އަލުން ތަރައްގީކުރަން ވެސް ހަވާލުކުރީ އަލްޓެކާއެވެ.
- ދ. މީދޫގައި 25 ހައުސިން ޔުނިޓު - 33.7 މިލިއަން ރުފިޔާ
- އއ. އުކުޅަހުގައި 50 ހައުސިން ޔުނިޓު - 67.5 މިލިއަން ރުފިޔާ
- ޅ. ނައިފަރުގައި 100 ހައުސިން ޔުނިޓު - 135 މިލިއަން ރުފިޔާ
- ހާއްސަ އެހީއަށް ބޭނުންވާ މީހުންގެ މަރުކަޒު - 49.4 މިލިއަން ރުފިޔާ
ސައުދުﷲގެ މިމްސް ކޮންސްޓަރަކްޝަންއާ ހަވާލުކުރީ ގދ. މަޑަވެލީގައި 50 ހައުސިން ޔުނިޓާއި ވާދޫ ސިއްހީ މަރުކަޒު ތަރައްގީ ކުރުމަށެވެ. އެ ދެ މަޝްރޫއުގެ އަގަކީ 71.5 މިލިއަން ރުފިޔާ އެވެ. ސްވިފްޓު އިންޖިނިއަރިންނާ ހަވާލުކުރި ފަސް މަޝްރޫއުގެ އަގަކީ 157.3 މިލިއަން ރުފިޔާ އެވެ. އެއީ؛
- ގދ. ތިނަދޫގައި 50 ހައުސިން ޔުނިޓު - 64.79 މިލިއަން ރުފިޔާ
- ށ. ފުނަދޫގައި ޔުނިވާސިޓީ ކެމްޕަހަކާއި ދަނާލެއް - 23.1 މިލިއަން ރުފިޔާ
- ޅ. ނައިފަރުގައި ކެމްޕަހަކާއި ދަނާލެއް - 23.1 މިލިއަން ރުފިޔާ
- ޅ. ހިންނަވަރުގައި ކެމްޕަހަކާއި ދަނާލެއް - 23.1 މިލިއަން ރުފިޔާ
- ތ. ވޭމަންޑޫގައި ކެމްޕަހަކާއި ދަނާލެއް - 23.1 މިލިއަން ރުފިޔާ
ތޯރިގުގެ މައިނާ ސްޕޯޓްސް ފީލްޑްއާ ހަވާލުކުރީ ކުޅުދުއްފުށީގައި ހޭންޑް ބޯލް އަދި ފުޓްސަލް ކުޅެވޭ މަލްޓުޕާޕަސް ކޯޓަކާއި ރޮސްޓްރޮމްއަކާއެކު ފުޓްބޯޅަ ދަނޑެއް ތަރައްގީކުރުމެވެ. އެ ދެ މަޝްރޫއުގެ އަގަކީ ތިން މިލިއަން ރުފިޔާ އެވެ.
އަސަދުﷲ ގެ އެސް.އޭ.އެން.އެން އިންޓަނޭޝަނަލް ޕްރައިވެޓް ލިމިޓެޑާ ހަވާލުކުރީ ގދ. ފިޔޯރީގެ ބިން ހިއްކުމާއި ބަނދަރު ތަރައްގީކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއު އެވެ. އެ މަޝްރޫއުގެ އަގަކީ 87.3 މިލިއަން ރުފިޔާ އެވެ.
މި މަޝްރޫއުތަކުގެ އިތުރުން ވެސް މެންބަރުންނާ ގާތް ގުޅުން އޮތް ބައެއް ކުންފުނިތަކަށް، އެ ކުންފުނިތަކުގެ ތަޖުރިބާއެއް ނެތް ދާއިރާތަކުގެ މަޝްރޫއުތައް ހަވާލުކޮށްފައިވެ އެވެ. އަދި ސަރުކާރުގެ ބައެއް ވެރިންގެ ކުންފުނިތަކަށް ވެސް މަޝްރޫއުތައް ދީފައިވެ އެވެ.
ބަހާލި 206 މަޝްރޫއުގެ ޖުމުލަ އަގަކީ 2.7 ބިލިއަން ރުފިޔާ އެވެ. އޭގެ ތެރެއިން ބޯހިޔާވަހިކަމާއި ބަނދަރު ތަރައްގީކުރުމުގެ 13 މަޝްރޫއުއަކަށް 997 މިލިއަން ރުފިޔާ އަރާއިރު، ތައުލީމީ ދާއިރާގެ 26 މަޝްރޫއު އަށް 397 މިލިއަން ރުފިޔާ، ސިއްހީ ދާއިރާގެ 30 މަޝްރޫއުއަކަށް 312 މިލިއަން ރުފިޔާ އަރަ އެވެ.
މަޝްރޫއުތަކުގެ އަދަދު އެންމެ ގިނައީ ކުޅިވަރާއި ހަށިހެޔޮކަމުގެ ދާއިރާގަ އެވެ. އެ ދާއިރާއިން ސޮއިކުރި 52 މަޝްރޫއުތަކުގެ އަގު 197 މިލިއަން ރުފިޔާއަށް އަރަ އެވެ.
ފުލުހުންގެ މަރުކަޒުތައް ހެދުމަށް ހަވާލުކުރި 39 މަޝްރޫއުގެ އަގު 114.9 މިލިއަން ރުފިޔާއަށް އަރަ އެވެ. އަދި ކުނި މެނޭޖުކުރުމުގެ 24 މަޝްރޫއުއެއްގެ އަގު 204 މިލިއަން ރުފިޔާ އަށް އަރައެވެ.
ރައީސް މުއިއްޒުގެ މި ވައުދުތައް ފުއްދޭނެ ވަރަށް ސަރުކާރުގައި ލާރި ނެތިގެން މި މަޝްރޫއުތައް ހިންގަނީ ސަރުކާރުން ޔަގީންކަން ދީގެން، ބީއެމްއެލްއިން ކުންފުނިތަކަށް ދޭ ލޯނުންނެވެ. އެ ލޯނުތައް ދޫކުރަނީ 9 ޕަސެންޓު އިންޓަރެސްޓު ރޭޓުގަ އެވެ.
