މުހައްމަދު މުއިއްޒު ސަރުކާރުގެ ވަފްދަކާއެކު އަންގާރަ ދުވަހު ފުވައްމުލަކަށް އަދި ބުދަ ދުވަހު އައްޑޫ ސިޓީއަށް ވަޑައިގަންނަވާ ގޮތަށް ހަމަޖެހިއްޖެ އެވެ.
އަދަދު އަށް އެނގިފައިވާ ގޮތުގައި މުއިއްޒު ފުވައްމުލަކަށް ކުރައްވާ ދަތުރުގައި އެ ރަށުގެ ކައުންސިލާއި ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފަ އެވެ. އެއަށްފަހު އައްޑޫއަށް ވަޑައިގެން އެ ސިޓީގެ ކައުންސިލާ ވެސް ބައްދަލުކުރައްވާ ގޮތަށް ވަނީ ހަމަޖެހިފަ އެވެ.
ފުވައްމުލަކަށް ކުރައްވާ ދަތުރަށްފަހު މުއިއްޒު ބުދަ ދުވަހު ވަޑައިގަތުމަށް ހަމަޖެހިފައިވަނީ އައްޑޫ ސިޓީގެ ހުޅުދޫ އާއި މީދޫއަށް ކަމަށް މައުލޫމާތު ލިބެ އެވެ.
އޭގެއިތުރުން މައުލޫމާތު ލިބޭ ގޮތުގައި އައްޑޫ ސިޓީގެ ގުޅިފައިވާ ރަށްތަކަށް މުއިއްޒު ވަޑައިގަތުމުގެ ކުރިން ޝަންގްރިއްލާއަށް ވަޑައިގެން އެ ރިސޯޓުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށް ވެސް ވަނީ ހަމަޖެހިފަ އެވެ.
އައްޑޫގެ ގުޅިފައިވާ ރަށްތަކުގެ ތެރެއިން މުއިއްޒު އެންމެ ފުރަތަމަ ވަޑައިގަތުމަށް ހަމަޖެހިފައިވަނީ ސ. މަރަދޫއަށް ކަމަށް މައުލޫމާތު ލިބެ އެވެ.
މުއިއްޒު ވަޑައިގަންނަވާތީ ފުވައްމުލަކާއި އައްޑޫގައި ޕީއެންސީގެ މަޖިލިސް މެންބަރުން ދަނީ ހަރަކާތްތެރިވެ، މަރުހަބާ ކިޔުމުގެ ކަންކަން ރާވައި އިންތިޒާމު ކުރަމުންނެވެ.
މުއިއްޒު ފުވައްމުލަކާއި އައްޑޫއަށް ކުރައްވާ ދަތުރާ ގުޅިގެން ރައީސް އޮފީހުގެ ތަރުޖަމާން، ހީނާ ވަލީދުއާ ސުވާލުކުރެއްވުމުން ވިދާޅުވީ މުއިއްޒު ކުރައްވާ ދަތުރުތަކުގެ ތަފްސީލް ހާމަކުރަމުން ގެންދާނެ ކަމަށެވެ.
މިއީ އައްޑޫ ސިޓީ ހުޅުދޫ އާއި މީދޫ އަދި ފޭދޫގައި ވަކި ކައުންސިލެއް ހެދުމަށް އާންމުންގެ ހިޔާލު ހޯދުމުގެ ވޯޓު ބޭއްވުމަށްފަހު މުއިއްޒު އެ ސިޓީއަށް ވަޑައިގަންނަވާ ފުރަތަމަ ފަހަރެވެ. އެ އާންމު ވޯޓުގައި ފޭދޫގެ ބޮޑު މެޖޯރިޓީއަކުން ވަނީ ވަކި ކައުންސިލެއް ހަދަން ބޭނުން ނުވާ ކަމަށް ވޯޓު ދީފަ އެވެ.
އައްޑޫ ސިޓީގައި ވަކި ކައުންސިލްތަކެއް ހަދަން އާންމުންގެ ހިޔާލު ހޯދުމުގެ ވޯޓު ނެގީ ރައްޔިތުން އެކަމަށް އެދުމުން ކަމަށް މުއިއްޒު ވިދާޅުވި އެވެ. އެއަށްފަހު އެ ވޯޓުގައި ސަރުކާރުގެ އެއްވެސް ސްޓޭންޑެއް ނެތް ކަމަށް ވެސް ވިދާޅުވި އެވެ.
އެކަމަކު ފޭދޫގައި ނެގި ވޯޓަށް ސަރުކާރުން ނުފޫޒު ފޯރުވައި ވަކި ކައުންސިލެއް ހެދުމަށް ބާރު އަޅައި މަސައްކަތް ކުރި ކަމަށް ތުހުމަތުތަކެއް ވަނީ އަމާޒުވެފަ އެވެ. ސަރުކާރުން ނުފޫޒު ފޯރުވުމުން ވެސް ބޮޑު މެޖޯރިޓީއަކާ އެކު ފޭދޫ ރައްޔިތުން ނިންމި ނިންމުމަށް ގިނަ ބަޔަކު ތައުރީފްކުރި އެވެ.
ލޯކަލް ކައުންސިލް އިންތިހާބު ބޯމަތިވަމުން އަންނަ ދަނޑިވަޅުގައި މުއިއްޒު އަންނަނީ ރާއްޖޭގެ އެކި އަތޮޅުތަކަށް ޒިޔާރަތް ކުރައްވައި އައު ވައުދުތަކެއް ވަމުންނެވެ.
