އިދިކޮޅު އެމްޑީޕީން އޮކްޓޯބަރު 3، ގައި ބޭއްވި ބޮޑު މުޒާހަރާގައި ހައްޔަރުކޮށް ބަންދުގެ މުއްދަތުގެ ޖެހި ހަ މީހުންނާ ގުޅޭގޮތުން ހުރި ކަންބޮޑުވުންތައް ހިއްސާކުރަން އެމްޑީޕީގެ ލީގަލް ޓީމުން ފުލުސް އޮފީހަށް ދިޔުމުން ބައްދަލުނުކުރި އެވެ.
އެމްޑީޕީގެ ލީގަލް ޓީމުން ބޭއްވި ނޫސްވެރިންގެ ބައްދަލުވުމެއްގައި އަހްމަދު މައުރޫފް ވިދާޅުވީ ބަންދުގައި ތިބި މީހުންނާ ގުޅޭ ބައެއް މައުލޫމާތުތައް ހިއްސާ ކުރުމަށް ބައްދަލުކުރަން ދިޔުމުން ގަޑިއިރެއް ފަހުން ނިކުތީ ބައްދަލުކުރާނެ މީހެއް ނެތުމުން ކަމަށެވެ.
"މިރޭ ބައެއް މައުލޫމާތު ސާފުކުރުމަށާއި ބަންދުގައި ތިބި ފަރާތްތަކުގެ ސިއްހީ ހާލަތާމެދު އަޅުގަނޑުމެންގެ އޮތް ކަންބޮޑުވުން ހިއްސާކުރުމަށްޓަކައި މި އައީ. ނަމަވެސް އަޅުގަނޑުމެން ގަޑިއެއްހާއިރު މިތަނުގައި ތިބުމަށްފަހުގައި މި ނިކުތީ. އަޅުގަނޑުމެންނަކާ މިތަނުގައި މައުލޫމާތު އެނގޭ މީހަކާ ބައްދަލެއް ނުވި،" އޭނާ ވިދާޅުވި އެވެ.
ބަންދުގައި ދާއިމީ ބައްޔަކަށް ބޭސްކުރާ ދެ މީހަކު ތިބި ކަމަށާއި ހައްޔަރުކުރުމުގެ ތެރޭގައި އަނިޔާވި މާފުށި ކައުންސިލްގެ ރައީސް، ހަސަން ސަލާހުގެ އިނގިލި ބިންދާލި ކަމަށް އޭނާ ވިދާޅުވި އެވެ. ނަމަވެސް ފަރުވާ ދިނުމުގައި ލަސްވިކަން އޭނާ ފާހަގަކުރެއްވި އެވެ.
ހައްޔަރުކޮށް، 15 ދުވަހުގެ ބަންދު ޖަހާފައިވާ މީހުން:
- މަޖިލީހުގެ ކުރީގެ މެންބަރު ޔާސިރު އަބްދުއްލަތީފު
- މަޖިލީހުގެ ކުރީގެ މެންބަރު ޔައުގޫބު އަބްދުﷲ
- މާފުށީ ކައުންސިލްގެ ރައީސް ހަސަން ސޮލާހު
- އަލީ ޖުމާން
- އަޒްމީ އަލީ
- ހަސަން ޝާކިރު
ހައްޔަރުކުރި މީހުންގެ ތެރޭގައި އައްޑޫ ސިޓީ ކައުންސިލްގެ މެންބަރު ހަސަން ޒަރީރު ހިމެނެ އެވެ. އޭނާ ކޯޓަށް ހާޒިރުނުކޮށް ބަންދުން ދޫކޮށްލި އެވެ. އަދި މުހައްމަދު ޚަލަފު އިބްރާހިމް ކިޔާ ޒުވާނަކު ބަންދުން ދޫކޮށްލީ، ތަހުގީގަށް އެއްބާރުލުން ދޭން ޝަރުތުކޮށްފަ އެވެ.
ހައްޔަރުކުރި މީހުންނާއި މުޒާހަރާގެ ތެރެއިން އަނިޔާ ލިބުނު މީހުންގެ މައްސަލަތައް ހިއުމަން ރައިޓްސް ކޮމިޝަން (އެޗްއާރްސީއެމް) އަށް ހުށަހަޅާނެ ކަމަށް އެމްޑީޕީގެ ލީގަލް ޓީމުން ބުންޏެވެ.
މުޒާހަރާއަށް އެތައް ހާސް ބަޔަކު ޖަމާވެ، ހިނގާފައި މަޖީދީ މަގުން ދާން ދިމާކުރުމުން، ރަޔަޓު ގިޔަރުގައި ފުލުހުން ނުކުމެ ބާރުގެ ބޭނުންކޮށް، ޕެޕަ ސްޕްރޭ ޖެހި އެވެ. އަދި ފުރަތަމަ ފަހަރަށް އަޑުގަދަ ހަތިޔާރު (ސޮނިކް ވެޕަން) ބޭނުންކުރި އެވެ.
