އެމްޑީޕީން ރޭ ބޭއްވި މުޒާހަރާއިން ހައްޔަރުކުރި މީހުންގެ ތެރެއިން މިވަގުތު ބަންދުގައި ތިބި ހަ މީހުން ދޫކޮށްލުމަށް ގޮވާލައި އަތޮޅު ވެހި ކައިރީގައި މުޒާހަރާކޮށްފި އެވެ.
މިރޭ ޗާންދަނީ މަގުގައި ހުންނަ ދަނޑިކޮށީ ހަރުގޭގައި ބޭއްވި ގައުމީ މަޖިލިސް ބައްދަލުވުމަށް ފަހު އެ ޕާޓީގެ ބައެއް އާންމު މެންބަރުންނާއި ގައުމީ މަޖިިލިސް މެންބަރުން އަދި އިސްވެރިން އަތޮޅު ވެހި ކައިރިއަށް ޖަމާވި އެވެ.
އެ މީހުން ގޮވާލަމުން ދިޔައީ އެއްވެސް ޝަރުތަކާ ނުލައި ހައްޔަރުގައި ތިބި މީހުން ދޫކޮށްލުމަށެވެ. އެމްޑީޕީގެ ގައުމީ މަޖިލީހުން ވެސް ވަނީ އެ މީހުން ދޫކޮށްލުމަށް ގޮވާލައި ގަރާރެއް ވެސް މިރޭ ފާސްކޮށްފަ އެވެ.
މުޒާހަރާގެ ތެރެއިން އަށް މީހުން ފުލުހުން ހައްޔަރުކުރި އެވެ. އޭގެ ތެރެއިން ދެ މީހުން ވަނީ ދޫކޮށްލާފަ އެވެ.
ހައްޔަރުކުރި މީހުން
- މަޖިލީހުގެ ކުރީގެ މެންބަރު ޔާސިރު އަބްދުއްލަތީފު (ބަންދަށް 15 ދުވަސް)
- ރައްޔިތުންގެ މަޖިލީހުގެ ކުރީގެ މެންބަރު ޔައުގޫބު އަބްދުﷲ (ބަންދަށް 15 ދުވަސް)
- މާފުށީ ކައުންސިލްގެ ރައީސް ހަސަން ސޮލާހު (ބަންދަށް 15 ދުވަސް)
- އަލީ ޖުމާން (ބަންދަށް 15 ދުވަސް)
- އަޒްމީ އަލީ (ބަންދަށް 15 ދުވަސް)
- ހަސަން ޝާކިރު (ބަންދަށް 15 ދުވަސް
މުޒާހަރާގައި އެތައް ހާސް ބަޔަކު ޖަމާވެ، މަޖީދީ މަގުން ހިނގާފައި ދާން ދިމާކުރުމުން، ރަޔަޓު ގިޔަރުގައި ފުލުހުން ނުކުމެ ބާރުގެ ބޭނުންކޮށް، ޕެޕަ ސްޕްރޭ ޖެހި އެވެ. އަދި ފުރަތަމަ ފަހަރަށް ސޮނިކް ވެޕަން ބޭނުންކުރި އެވެ.
އާޓިފިޝަލް ބީޗުގައި ތިބުމަށް ފަހު އެއްވުމުގެ ބައިވެރިން ހިނގަން ރާވާފައި އޮތީ މަޖީދީ މަގުން އިރަށެވެ. އެކަން އެގޮތަށް ކުރާކަން އަންގާފައި ވާނެ ކަމަށް އެމްޑީޕީން ބުނެފައިވެ އެވެ.
ނަމަވެސް އެކަމަށް ފުލުހުން ހުރަސް އެޅި އެވެ. އެއަށް ފަހުން، ފުލުހުންގެ ސަފުތައް ފޫއަޅުވައިލުމަށް މުޒާހަރާގެ ބައިވެރިން މަސައްކަތް ކުރި އެވެ.
ސަރުކާރަށް ރޭ ކުރި ޑިމާންޑުތަކަށް އިޖާބަ ނުދޭނަމަ ނޮވެމްބަރު 17، ގައި ބޮޑު މުޒާހަރާއެއް ކުރުމަށް އެމްޑީޕީން އަންނަނީ ތައްޔާރުވަމުންނެވެ.
