އިދިކޮޅު އެމްޑީޕީން މިރޭ އާޓިފިޝަލް ބީޗުގައި ބާއްވާ ބޮޑު މުޒާހަރާއާ ގުޅުވައި އެއްވެސް މީހަކު ހައްޔަރުކޮށްފިނަމަ އެމީހަކަށް ބޭނުންވާނޭ ގާނޫނީ ކަންކަން ހަމަޖެއްސުމަށް އެހީވުމަށްޓަކައި އެމްޑީޕީގެ ފަރާތުން ހެލްޕްލައިނެެއް ގާއިމުކޮށްފި އެވެ.
އެމްޑީޕީގެ ލީގަލް ޑިރެކްޓަރު އަހުމަދު މައުރޫފް ވިދާޅުވީ، މިރޭގެ މުޒާހަރާއިން އެއްވެސް މީހަކު ހައްޔަރުކޮށްފިނަމަ އެމްޑީޕީގެ ލީގަލް ޓީމުން އެމީހަކަށް ހިލޭ ގާނޫނީ އެހީތެރިކަން ފޯރުކޮށްދޭނޭ ކަމަށެވެ. ގާނޫނީ އެހީތެރިކަން ބޭނުންވާ ފަރާތްތަކުން ގުޅަންޖެހޭ ނަންބަރަކީ 7341637 އެވެ.
މިރޭގެ މުޒާހަރާއާ ގުޅިގެން އެއްވެސް މީހަކު ހުއްޓުވައި، ސުވާލުކޮށް، ނުވަތަ ބަލާފާސްކޮށްފިކަމުގެ ނުވަތަ ހައްޔަރުކޮށްފި ކަމުގެ މައުލޫމާތު ލިބިއްޖެނަމަ އެމީހެއްގެ ވަނަވަރާއެކު ވައިބާ، ވަޓްސްއެޕް ނުވަތަ ޓެލެގްރާމް މެދުވެރިކޮށް އެ ނަންބަރަށް މެސެޖުކުރުމަށް މައުރޫފު އެދިވަޑައިގަންނަވަ އެވެ.
މައުރޫފް ވިދާޅުވީ މިރޭ އެމްޑީޕީ އިން ބާއްވާ ހަރަކާތަކީ ސުލްހަވެރި ސިޔާސީ ހަރަކާތެއް ކަމަށާއި، އެހެންނަމަވެސް އެ ހަރަކާތަށް ހުރަސް އަޅައި ސަރުކާރުން ބަޔަކު ހައްޔަރުކުރުމަށް ރާވާފައިވާ ކަމުގެ މައުލޫމާތު ލިބިފައިވާ ކަމަށެވެ. އެފަދަ އެއްވެސް ކަމެއް ހިނގައިފިނަމަ ވީ އެންމެ އަވަހަކަށް ޕާޓީގެ ހެލްޕްލައިނަށް މެސެޖުކޮށް އެ މައުލޫމާތު ދިނުމަށް މައުރޫފު އެދިވަޑައިގަންނަވަ އެވެ.
މިރޭގެ މުޒާހަރާގައި ބައިވެރިވުމަށް އެ ޕާޓީއަށް ތާއީދުކުރާ އަދި މި ސަރުކާރާއި އިދިކޮޅު ރައްޔިތުންގެ އެތައް ސަތޭކަ ބަޔަކު ވަނީ މާލޭ ދަތުރުކޮށްފަ އެވެ. ލޯންޗުތަކާއި ބޯޓުތައް އަދި ދުރު ސަރަހައްދުތަކުން ވައިގެ މަގުން މާލެއަށް މީހުން ދަތުރުކުރާ ފޮޓޯތަކާއި ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ. އޭގެތެރޭގައި ރާއްޖޭގެ ދެކުނާއި އުތުރު އަދި މެދު ރާއްޖެތެރޭގެ ސަރަހައްދުތަކުން ދަތުރުކުރާ މީހުން ހިމެނެ އެވެ.
މީގެ އިތުރުން، ރެޔާއި މިއަދު ހެދުނު އަތޮޅުތެރެއިން މާލެއަށް މީހުން އައިސްފައިވެ އެވެ. ލޯންޗުތަކުގައި އައި މީހުން މާލެ އެރީ އެމްޑީޕީގެ ދިދަތައް ވެސް ހިފައިގެންނެވެ. އެމްޑީޕީން އުއްމީދު ކުރަނީ މި ފަހުގެ ތާރީހެއްގައި އެއްވުމެއްގައި ބައިވެރިނުވާ ވަރަށް މިރޭގެ އެއްވުމުގައި ބައިވެރިވާނެ ކަމަށެވެ.
