ހުރިހާ ފައިސާއެއް ހަރަދު ކުރަނީ ސިޔާސީ މުވައްޒަފުންނަށް މުސާރަ ދޭން: އައްބާސް

ދައުލަތަށް ވަންނަ ހުރިހާ ފައިސާއެއް ހަރަދު ކުރަމުން ދަނީ ރައީސް މުހައްމަދު މުއިއްޒު ބޭނުންވާ ސިޔާސީ މުވައްޒަފުންނަށް މުސާރަ ދިނުމަށް ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

ދައުލަތުގެ ބަޖެޓުން މި އަހަރުގެ މިހާތަނަށް މުސާ ރައާއި އިނާޔަތްތަކަށް އަދި ޕެންޝަނަށް ކުރި ހަރަދު އެތައް ސަތޭކަ މިލިއަނުން އިތުރުވެފައިވާކަން ވަނީ ހާމަވެފަ އެވެ. އެ ކަމަށް އިޝާރާތް ކުރައްވައި އައްބާސް ވަނީ ދަރަނި ނުދެއްކާ ހިސާބަށް ގައުމުގެ ކަންކަން ގޮސްފައިވާ ކަމަށް ވިދާޅުވެފަ އެވެ.

"ދައުލަތަށް ވަންނަހާ ފައިސާ އާއި ބޭރު ގައުމުތަކުން ދަރަންޏަށް ނެގިހާ ފައިސާއިން ރައީސް މުއިއްޒު ބޭނުންފުޅުވާ ސިޔާސީ ބޭފުޅުންނަށް މުސާރަ ދިނުން ނޫން ކަމެއް ނުކުރެ. ދައުލަތުގެ ދަރަނި ބޮޑުވެ ޑޮލަރުގެ އަގު ބޮޑު، ތަކެތީގެ އަގު މަތިވެ ރައްޔިތުންގެ އަތްމަތި ދަތިވެ ގޮތްހުސްވާ ހިސާބަށް ގައުމުގެ ހާލަތު މިވަނީ ގޮސްފައި،" އައްބާސް ލިޔުއްވި އެވެ.

ފިނޭންސުން މިއަދު އާންމުކޮށްފައިވަނީ މި މަހުގެ ހަތަރަކާއި ހަމައަށް ދައުލަތުން ކުރި ހަރަދުތަކާއި ލިބުނު އާމްދަނީގެ ހިސާބުތަކެވެ.

އެ ހިސާބުތަކުން ދައްކާ ގޮތުގައި ސެޕްޓެމްބަރު 4، އާއި ހަމައަށް މުސާރައާއި އިނާޔަތްތަކަށް އަދި ޕެންޝަނަށް ކުރި ހަރަދު ކުރީ ޖުމްލަ 9.5 ބިލިއަން ރުފިޔާ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 575.4 މިލިއަން ރުފިޔާއިން އިތުރުވެފަ އެވެ.

މީގެ ތެރެއިން ވަކި ވަކި ހަރަދުތަކަށް ބަލާއިރު؛

• މި އަހަރު މުސާރައަށް ހަރަދުކުރީ 4.3 ބިލިއަން ރުފިޔާ. މިއީ މިދިޔަ އަހަރަށް ވުރެ 300 މިލިއަން ރުފިޔާ އިތުރު އަދަދެއް.
• އިނާޔަތްތަކަށް މި އަހަރު ހަރަދުކުރީ 3.8 ބިލިއަން ރުފިޔާ. މިއީ މިދިޔަ އަހަރަށް ވުރެ 200 މިލިއަން ރުފިޔާ އިތުރު އަދަދެއް.

• 65 އަހަރު ފުރުމުން ދޭ އިނާޔަތް ހިމެނޭހެން ޕެންޝަނަށް މި އަހަރަ ހަރަދުކުރީ 1.4 ބިލިއަން ރުފިޔާ.

މުސާރަ އާއި އިނާޔަތްތަކަށް ކުރި ހަރަދު އިތުރުވެފައި މިވަނީ، މި ސަރުކާރުން ސިޔާސީ މުވައްޒަފުންގެ އަދަދު ދަމަހައްޓާނެ ކަމަށް ބުނި އަދަދު ކަމަށްވާ 700 އަށްވުރެ ގިނައިން މުވައްޒަފުން ނަގާފައި ވަނިކޮށެވެ. ސިޔާސީ މުވައްޒަފުންގެ ރަސްމީ އަދަދުގެ ގޮތުގައި ސަރުކާރުން ބުނަނީ 922 އެވެ.

ނަމަވެސް، އިދިކޮޅު ފަރާތްތަކުން ބުނަނީ ސިޔާސީ މުވައްޒަފުންގެ އަސްލު އަދަދު ހުރީ 2،000 އިން މަތީގަ ކަމަށެވެ. ސަރުކާރުން ސިޔާސީ މުވައްޒަފުންގެ އަދަދު ގުނީ ރައީސް އޮފީހާއި މުލީއާގެ އަދި ހިލާލީ ގޭގެ މުވައްޒަފުން ނުހިމަނަ އެވެ.