އަންނަ ހަފުތާގެ ހޯމަ ދުވަހު (ސެޕްޓެމްބަރު 15، ގައި), ޗުއްޓީގައި އޮތް ރައްޔިތުންގެ މަޖިލީހުގެ ދައުރުން ބޭރުން އިތުރު ޖަލްސާއެއް ބާއްވަން މަސައްކަތް ކުރަމުން އަންނަ ކަމުގެ މައުލޫމާތު އަދަދު އަށް ލިބިއްޖެ އެވެ.
ރައްޔިތުންގެ މަޖިލީހުގެ އިދާރާގައި މިކަމާ ގުޅޭ ގޮތުން ސުވާލުކުރުމުން ބުނީ، އެ ފަދަ މައުލޫމާތެއް އަދި ނުލިބޭ ކަމަށެވެ. ނަމަވެސް މިކަމުގެ މައުލޫމާތު އެނގޭ އިތުބާރު ހުރި މަސްދަރުތަކުން ވަނީ ދައުރުން ބޭރުން ބާއްވާ ދެ ވަނަ ޖަލްސާ ހޯމައިގައި ބާއްވާނެ ކަމަށް ބުނެފަ އެވެ.
މި ނޫހަށް މައުލޫމާތު ދިން މީހުން ބުނި ގޮތުގައި އެ ދުވަހުގެ ޖަލްސާއަށް އެޖެންޑާ ކުރަން ހަމަޖެހިފައި ވަނީ ޕީއެންސީ ޕީޖީ ލީޑަރު، އިނގުރައިދޫ ދާއިރާގެ މެންބަރު ސްޕޮންސާކޮށްގެން މަޖިލީހަށް ހުށަހަޅާފައިވާ ރެފަރެންޑަމް ބިލުގެ މަސައްކަތެވެ.
ރެފަރެންޑަމް ބިލަކީ ރައްޔިތުންގެ މަޖިލީހުގެ އުމުރު، ރައީސުލްޖުމްހޫރިއްޔާ ދައުރު، ރައީސުލްޖުމްހޫރިއްޔާ އިންތިހާބު ކުރާ ގޮތް، މަޖިލީހުން ފާސް ކުރާ ބިލު ތަސްދީގު ކުރާ ގޮތް އަދި ދިވެހިރާއްޖޭގެ ސަރަހައްދު ބަދަލު ކުރުން ފަދަ ކަންކަމުގައި އާންމުންގެ ވޯޓަށް އަހަން ފަހިކުރަން ހުށަހަޅާފައިވާ ބިލެކެވެ.
އެ ބިލުގައިވާ ގޮތުން ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގޭނީ ގާނޫނުއަސާސީގައި ބަޔާންކޮށްފައިވާ އަސާސީ ހައްގުތަކާ ގުޅޭ މާއްދާއެއް ބަދަލު ކުރާ ނަމަ ނުވަތަ ރައްޔިތުންނާ ގުޅޭ މުހިންމު ކަންކަމުގައި ނުވަތަ ގައުމީ މުހިންމު މައްސަލަތަކުގަ އެވެ.
އޭގެ އިތުރުން ރައްޔިތުންގެ މަޖިލީހަށް ލިބޭ ގާނޫނު ހެދުމުގެ ބާރުގެ ތެރެއިން ކަމެއް ނިންމުމުގައި އާންމުންގެ ވޯޓަކަށް ދިޔުމަށް މަޖިލީހަށް ނިންމިދާނެ އެވެ. އަދި ގައުމީ މުހިންމު މައްސަލައެއްގައި ރައްޔިތުން ދެކޭ ގޮތް ހޯދުމަށް ވޯޓެއް ނެގުމަށް ރައީސުލްޖުމްހޫރިއްޔާއަށް ނިންމިދާނެ އެވެ. ބިލުގައިވާ ގޮތުން ރައީސުލްޖުމްހޫރިއްޔާގެ ދައުރު ބަދަލު ކުރުމާ ގުޅޭ އާންމު ވޯޓު ނެގުމަށް ނިންމޭނީ ރައީސުލްޖުމްހޫރިއްޔާއަށެވެ.
މި ބިލު ދިރާސާކުރުމުގެ މަސައްކަތް ކޮމިޓީން ސިއްރުކޮށްގެން ކުރިއަށް ގެންގޮސްފައި ވާތީ، ބިލުގައި އިތުރު މާއްދާތަކެއް ހިމަނައި ނޫނީ ބިލަށް އެއްވެސް ބަދަލެއް ގެނައި ކަމެއް ނޭނގެ އެވެ.
މަޖިލީހުގެ ޖަލްސާ ބާއްވަން ނިންމާފައިވާ ދުވަހަކީ، މަޖިލީހުން ދިރާސާކުރަމުން އަންނަ މީޑިއާ ބިލުގެ މަސައްކަތް ނިންމަން ސުންގަޑި ކަނޑައަޅާފައިވާ ދުވަސް ވެސް މެ އެވެ. އެހާތަނަށް މި ބިލުގެ މަސައްކަތް ނިމިއްޖެ ނަމަ، އެ ދުވަހުގެ ޖަލްސާގައި މި ބިލު ފާސްކުރާނެ ކަމަށް ބެލެވެ އެވެ.
މިނިވަން މީޑިއާ ނައްތާލާ ބިލުގެ ގޮތުގައި ލޭބަލްވެފައިވާ މި ބިލު ފާސްކުރަން މަޖިލީހުން މަސައްކަތް ކުރަމުން އަންނަނީ އެކަން ނުކުރަން ގިނަ ބަޔަކު ގޮވާލަމުން އަންނަނިކޮށެވެ. މި ބިލާ މެދު ހިޔާލު ހޯދަން ބައްދަލުކުރި މޯލްޑިވްސް މީޑިއާ ކައުންސިލު (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަނާއި ނޫސްތަކާއި ނޫސްވެރިން ވެސް އެދުނީ މި ބިލު ބޭރުކޮށްލަ ދިނުމަށެވެ.
