ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު އާޒިމް އަބްދުލްއަޒީޒަށް އަހަރެއްގެ ތެރޭގައި ކުލި އާމްދަނީގެ ގޮތުގައި 10 މިލިއަނަށް ވުރެ ގިނަ ރުފިޔާ ލިބުނު ކަމަށް އޭނާގެ މާލީ ބަޔާނުން ދައްކައިފި އެވެ.
މީގެ ދޮޅު އަހަރު ކުރިން ހުވާކުރި 20 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް، މަޖިލިސް އިދާރާއިން ހާމަކުރީ އިއްޔެ އެވެ. އެ ބަޔާންތަކުގައި ވަނީ މިދިޔަ އަހަރުގެ މެއި 28، އިން މި އަހަރުގެ މެއި 27، އާ ހަމައަށް މެންބަރުންގެ އަތުގައި ހުރި ފައިސާ އާއި ދަރަންޏާއި މުދަލުގެ ތަފުސީލުތަކެކެވެ.
އެ މުއްދަތުގައި އާޒިމަށް އާމްދަނީގެ ގޮތުގައި ޖުމްލަ 10.9 މިލިއަން ރުފިޔާ ލިބުނެވެ. އެއީ މުސާރައިގެ ގޮތުގައި ލިބުނު 914،375ރ. އާއި ރިއަލް އެސްޓޭޓް އުސޫލުން ކުއްޔަށް ދީފައި ހުރި ތަންތަނުން ލިބުނު 10،056،800ރ. އެވެ.
އޭގެ އިތުރުން ބީއެމްއެލް، އެމްއައިބީ އަދި އެސްބީއައި ގައި ހުރި އާޒިމްގެ އެކައުންޓުތަކުގައި 262،693ރ. އާއި 28 ޑޮލަރު އެބަހުއްޓެވެ. ތައިލެންޑުގެ ދެ ބޭންކެއްގައި ހުޅުވާފައި ހުރި އެކައުންޓުތަކުގައި 1743 ތައި ބާތު އެބަހުއްޓެވެ.
އާޒިމްގެ އަތުގައި ނަގުދު ފައިސާގެ ގޮތުގައި 695،000ރ. އާއި 55،800 އެމެރިކާ ޑޮލަރާއި 45،975 ތައި ބާތު ވެސް އެބަހުއްޓެވެ. އާޒިމްގެ އަމިއްލަ ނަމުގައި ބީއެމްއެލް އިސްލާމިކް ގައި އަދި އެސްބީއައި ގައި ދެ ލޯނެއް އެބަ އޮތެވެ. އެ ދެ ލޯނަށް ނުދައްކާ 26.8 މިލިއަން ރުފިޔާ އެބަ އޮތެވެ.
އާޒިމްގެ އަމިއްލަ ވިޔަފާރިއެއްގެ ގޮތުގައި މާލީ ބަޔާނުގައި އޮތީ ބިލްޑް ބެންޗް ކުންފުންޏެވެ. އިކޮނޮމިކް މިނިސްޓްރީގައި ކުރާ ވިޔަފާރިއެއް ރަޖިސްޓްރީކޮށްފައި ނެތުމުން އަދި ވެބްސައިޓެއް ހާ ހިސާބު ވެސް ފެންނަން ނެތުމުން މި ކުންފުނިން ކުރާ މަސައްކަތެއް ސާފެއް ނޫނެވެ.
އާޒިމްގެ ނަމުގައި ރާއްޖޭގައި ތިން ކާރާއި ދެ ސައިކަލު އޮތްއިރު، ބެންކޮކުގައި ވެސް އޭނާގެ އަމިއްލަ ކާރެއް އެެބަ އޮތެވެ.
މަޖިލީހުގައި 93 މެންބަރުން ތިބޭއިރު އޭގެ ތެރެއިން އިއްޔެ މަޖިލީހުގެ ވެބްސައިޓަށް އަޕްލޯޑުކުރީ 88 މެންބަރެއްގެ މާލީ ބަޔާނެވެ. ބާކީ ފަސް މެންބަރުންގެ މާލީ ބަޔާން މަޖިލީހުގެ ވެބްސައިޓަށް އަޕްލޯޑު ނުކުރަނީ އެ މާލީ ބަޔާންތައް މުއްދަތުގެ ތެރޭގައި ނުފޮނުވާތީ އެވެ.
މަޖިލީހުން އާންމުކޮށްފައިވާ މާލީ ބަޔާންތަކުގައި ހިމަނާފައި ވަނީ އަހަރެއްގެ ތެރޭގައި ލިބުނު އާމުދަނީ އާއި ބޭންކު އެކައުންޓުތަކުގައި ހުރި ފައިސާ އާއި އަމިއްލަ ނަމުގައި ހުރި ދަރަނި/ލޯނުތަކާއި އަމިއްލަ ނަމުގައި ހުރި މުދަލުގެ ތަފުސީލެވެ.
އެއްވެސް ކުންފުންޏެއްގައި ހިއްސާއެއް އޮތް ނަމަ އޭގެ ތަފުސީލާއި ނަގުދު ފައިސާގެ ގޮތުގައި ހުރި ފައިސާގެ އަދަދާއި ވިއްކާލާފައިވާ ބައެއް ކެޓަގަރީތަކުގެ މުދަލުގެ ތަފުސީލާއި އިންޓެލެކްޗުއަލް ޕްރޮޕަޓީގެ ގޮތުގައި ބެލެވޭ އެއްވެސް އެއްޗެއްގެ ތަފުސީލު ވެސް ބަޔާންތަކުގައި ހިމަނަން ޖެހެ އެވެ.
