ނޫސްވެރިން އުޅެނީ ސީނެއް ކްރިއޭޓުކުރަން ކަމަށް ބުނެ ނޫސްވެރިންނާ ދެކޮޅަށް ވާހަކަ ދެއްކެވީ މަޖިލީހުގެ އަމީން އާންމު ފާތުމަތު ނިއުޝާ ކަން ރައްޔިތުންގެ މަޖިލީހުން މައުލޫމާތުދޭ ބައެއް މަސްދަރުތަކުން ކަށަވަރުކޮށްދީފި އެވެ.
މިނިވަން ނޫސްވެރިކަން ނެތިގެންދާ ގޮތަށް، ސަރުކާރުގެ ތާއީދާއެކު ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅާފައިވާ މީޑިއާ އެންޑު ބްރޯޑްކާސްޓިން ރެގިއުލޭޝަން ބިލް ދިރާސާކުރުމުގެ ގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނޫސްވެރިންނާއެކު ހޯމަ ދުވަހު ބޭއްވި ބައްދަލުވުން ފެށުމުގެ ކުރިން މަޖިލީހުގެ ރަސްމީ ޔޫޓީއުބް ޗެނަލްއިން ލައިވްކުރި އޯޑިއޯއެއްގައި ނޫސްވެރިން އުޅެނީ ސީނެއް ކްރިއޭޓުކުރަން ކަމަށް މަޖިލީހުގެ މުވައްޒަފު ބުނެ އެވެ.
އަދަދު ނޫހާ ވާހަކަ ދެއްކި ބައެއް މަސްދަރުތަކުން ބުނީ ނޫސްވެރިންނާ ދެކޮޅަށް ވާހަކަ ދެއްކެވީ ނިއުޝާ ކަމަށެވެ. މިކަމާ ގުޅިގެން މި ނޫހުން ނިއުޝާއާ ސުވާލުކުރުމުން އެކަން ދޮގެއް ނުކުރެ އެވެ. ކުރި މެސެޖުތައް ބެއްލެވުމަށް ފަހު އެއްވެސް ޖަވާބެއް ނުދެއްވަ އެވެ.
އެ އޯޑިއޯއިން އިވޭ ގޮތުގައި މި ވާހަކަ ދެއްކި މީހާ ސީން ކްރިއޭޓު ކުރުމުގެ ތުހުމަތު ކުރީ މީޑިއާ ބިލުގެ ބަހުސް ކުރިއަށް ދިޔަ ވަގުތު މަޖިލީހުގެ ގެލަރީއަށް ވަން ނޫސްވެރިންނަށެވެ.
"މިހާރު އަޅުގަނޑުމެން މީޑީއާ [ބުނާ އެއްޗެއް ސާފެއް ނޫން] އަޅުގަނޑުމެންގެ މީޑީއާއިން އަޅުގަނޑުމެން ބުނިން ރެކޯޑު ކުރާށޭ އަޅުގަނޑުމެން ލައިވް ސްޓްރީމެއް ނުކުރާނެޔޭ. އެކަހަލަ ކަމެއް ވެދާނެތީ އަޅުގަނޑުމެން އަތުގައި އެވިޑެންސް އިންނަން ޖެހޭނެތާ،" މުވައްޒަފަކު ބުނާ އަޑުއިވެ އެވެ.
"އެހެންވެގެން ދެން އެންމެ ވާސްޓް ސިނާރިއޯ މި ވިސްނަނީ މިއަދު އިނގޭ. އެ މީހުން ބޭނުން ވަނީ ސީން ކްރިއޭޓު ކުރަން. ކުރިން ދުވަހު ގެލަރީއަށް ވަދެފައި ވެސް."
އެ ލައިވްސްޓްރީމް ވަނީ މަޖިލީހުގެ ޔޫޓިއުބް ޗެނަލްތަކުން ޑިލީޓުކޮށްފަ އެވެ.
ނިއުޝާ މި ގޮތަށް މުވައްޒަފުން ވާހަކަ ދެއްކިއިރު، މަޖިލީހުގެ ގެލަރީއަށް އެ ދުވަހު ވަން ނޫސްވެރިން އެ ތަނުގައި ތިބެ ކުރީ ހިމޭނެ އިހުތިޖާޖެކެވެ. އެއްވެސް އިރެއްގައި އެތަނުގައި ހިނގަމުންދިޔަ ޖަލްސާއަށް އުނދަގޫވާ ގޮތަށް އުޅެގެން އެއްވެސް ފިޔަވަޅެއް ނާޅާ ކަމަށް މަޖިލީހުގެ އިދާރާއިން ވެސް ވަނީ އަދަދު އިން ސުވާލުކުރުމުން ކަށަވަރުކޮށްދީފަ އެވެ.
