ސަރުކާރުގެ އައިނު ފިހާރަ, އެމްސީޖީއެޗް އޮޕްޓިކަލްސްގެ ފިހާރައެއް ހުޅުމާލެ ހޮސްޕިޓަލުގައި ހުޅުވައިފި އެވެ.
މިދިޔަ ހަފްތާގެ ބުދަ ދުވަހު "އެމްސީޖީއެޗް އޮޕްޓިކަލްސް ހުޅުމާލެ" ގެ ނަމުގައި ހުޅުވި އެ އައިނު ފިހާރައިން ލޮލުގެ ނަންބަރު ނެގުމާއި އައިނު ހެއްދުމުގެ ހުރިހާ ހިދުމަތެއް ލިބޭނެ އިންތިޒާމު ވަނީ ހަމަޖައްސާފަ އެވެ.
ހުޅުމާލެ ހޮސްޕިޓަލުގެ އިންފޮމޭޝަން އޮފިސަރު، އަބްދުﷲ މައުރޫފް އަދަދު އަށް ވިދާޅުވީ އައިނު ފިހާރައިން ލޮލުގެ ނަންބަރު ނެގުމަށް ޖެހޭނީ ނަން ނޯޓު ކުރަން ކަމަށެވެ. އެގޮތުން މިހާތަނަށް 50 އަށްވުރެ ގިނަ މީހުންނަށް ލޮލުގެ ނަންބަރު ނަގައި އައިނު ހައްދަން ފޮނުވާފައިވާ ކަމަށް އޭނާ ވިދާޅުވި އެވެ.
ނަމަވެސް ހުޅުމާލޭގެ އެމްސީޖީއެޗް އޮޕްޓިކަލްސް އިން އައިނު ހައްދާ މީހުންނަށް އައިނުތައް އަތަށް ލިބެން ނަގާ މުއްދަތެއް މައުރޫފަކަށް ވިދާޅެއް ނުވެވުނެވެ.
އަދަދު އިން ކުރި ސުވާލަކަށް ޖަވާބު ދެއްވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ، އިބްރާހިމް އަބްދުއްރައްޒާގް ހަލީމް ވިދާޅުވީ ހުޅުމާލޭގައި ހުޅުވި އައިނު ފިހާރައިގައި ވެސް ވޯކްޝޮޕެއް ގާއިމުކޮށްފައިވުމުން، އައިޖީއެމްއެޗްގެ އެމްސީޖީއެޗް އޮޕްޓިކަލްސްގެ ކިއު ކުޑަވެގެންދާނެ ކަމަށެވެ.
އައިޖީއެމްއެޗްގައި ހުންނަ އެމްސީޖީއެޗް އޮޕްޓިކަލްސް އިން ހައްދާ އައިނު ނުލިބި ގިނަދުވަސްވާ މައްސަލަ ވަނީ ބޮޑުވެފަ އެވެ. އެގޮތުން މި ނޫހަށް މައުލޫމާތު ދިން މީހަކު ބުނީ އައިނު ހައްދަން ނަންބަރު ދިންތާ މަހެއް ފާއިތުވި އިރުވެސް އައިނު ނުލިބޭ ކަމަށެވެ.
އެމްސީޖީއެޗް އޮޕްޓިކަލްސް އިން ބުނާ ގޮތުގައި ލޮލުގެ ނަންބަރު ބެލުމަށް އެކަނިވެސް ތިން ހަފުތާ އާއި ހަތަރު ހަފުތާގެ މުއްދަތެއް ނަގަ އެވެ. އެހެންވެ، ލޮލުގެ ނަންބަރު ނަގައިގެން އައިނު ހައްދަން މިހާރު ދޮޅު މަހެއްހާ ދުވަސް ނަގާނެ ކަމަށް ބެލެވެ އެވެ.
ރައްޒާގު ކުރިން ވިދާޅުވީ އެމްސީޖީއެޗް އޮޕްޓިކަލްސްއަށް އުންމީދު ކުރިވަރަށްވުރެ ޑިމާންޑު ބޮޑުވުމުން އެ ލޯޑު، އެތަނުން ދޭ ހިދުމަތަށް ވެސް އަންނަމުންދާ ކަމަށެވެ.
ސަރުކާރުން ހުޅުވާ އައިނު ފިހާރަތަކަށް ބޭނުންވާ ތަކެތި ސަޕްލައި ކުރަނީ ލަންކާގެ ކުންފުންޏަކުން ކަމަށްވާއިރު، އެ ކުންފުނީގެ މުވައްޒަފުން ދަނީ ރާއްޖޭގައި ހަރަކާތްތެރިވަމުންނެވެ. އައިނު ފިހާރަތައް ގާއިމުކުރުމަށް ހިނގާ ހަރަދެއް މިހާތަނަށް ވެސް ސަރުކާރުން ހާމަކޮށްފައެއް ނުވެ އެވެ.
އާސަންދައިން އައިނު ހެއްދުމަށް ހޭދަކުރާ 2،000ރ. އިން ކޮންމެ ދިވެހި ރައްޔިތަކަށް ވެސް އައިނު ފިހާރަ މެދުވެރިކޮށް ހިލޭ އައިނު ހެއްދޭނެ އެވެ.
ސަރުކާރުން އައިނު ވިޔަފާރީގެ ތެރެއަށް ވަންނަން ނިންމީ ވިޔަފާރިވެރިން ރައްޔިތުންނަށް "ދެރަ ނިކަމެތިކަން" ދެމުންދާ ކަމަށާއި އެ އާދަ ރާއްޖެއިން ފިލުވާލަން ބޭނުންވާ ކަމަށް ރައީސް މުހައްމަދު މުއިއްޒު ވިދާޅުވުމަށްފަހު އެވެ. އެކަމާ ގުޅިގެން ޕްރައިވެޓް ސެކްޓަރުގައި އައިނު ވިޔަފާރި ކުރާ މީހުން ކިތަންމެ ހިތްހަމަނުޖެހުނަސް ހެޔޮ ކަމަށް މުއިއްޒު ވިދާޅުވި އެވެ.
