ރައީސް މުހައްމަދު މުއިއްޒުގެ އެޑްވައިޒަރު، ކުރީގެ ރައީސް މުހައްމަދު ވަހީދުގެ ވެރިކަމުގައި ދިވެހި ސަރުކާރަށް 500 މިލިއަން ޑޮލަރުގެ ލޯނެއް ހަމަޖައްސައިދިނުމަށް ކުޑަކުދިންނަށް ޖިންސީ ގޯނާ ކުރުމުގެ ބޮޑު ރިންގެއް ހިންގަމުންދިޔަ ޖެފްރީ އެޕްސްޓީން ގެ އެހީތެރިކަން ހޯދިކަން އެނގިއްޖެ އެވެ.
ވަހީދުގެ ވެރިކަމުގެ ތެރެއިން އެޕްސްޓީން އާއި ބައްދަލުކުރިކަން އެނގެން އޮތީ އެމެރިކާގެ ކޯޓެއްގައި ހިނގި ދައުވާއެއްގެ ލިޔެކިޔުންތަކުންނެވެ. އެއީ އެޕްސްޓީން ސެކްސް ޓްރެފިކިންގެ ބޭނުންތަކަށް އަދި އޭނާގެ ގާތް މީހުންނަށް ފައިސާ ބެހުމަށް އެހީތެރިވެދިން ކަމަށް ބުނެ ޖޭޕީ މޯގަން ޗޭސް ބޭންކް އާއި ދެކޮޅަށް ކުރި ދައުވާ އެވެ.
ޖުލައި 28، 2012 ގައި ލޯނު ހޯދުމުގައި އެހީތެރިކަމަށް އެދި ވަހީދު ފޮނުވި މެއިލްގައި ވިދާޅުވެފައިނީ ސަރުކާރުން 500 މިލިއަން ޑޮލަރުގެ ލޯނެއް ހޯދުމަށް މަސައްކަތް ކުރަމުންދާ ކަމަށެވެ. އޭރުގެ ފިނޭންސް މިނިސްޓަރު އަބްދުﷲ ޖިހާދު އާއި މަޝްވަރާ ކުރެއްވި ކަމަށާއި ލޯނު ބޭނުންވަނީ 10 އަހަރުން އަނބުރާ ދައްކާ ގޮތަށް ކަމަށް ވެސް ލިޔުއްވާފައިވެ އެވެ.
އެ ވަގުތު ދުނިޔޭގެ މާލީ ހާލަތު އޮތް ގޮތުން ލޯނު ހޯދުމުގެ އެޕްސްޓީން އަށް ކުރެވޭނެ ކަމެއް އަންގައި ދިނުމަށާއި އެހީތެރިކަމަށް ޝުކުރު ދަންނަވާ ކަމަށް ވެސް ވަހީދު ލިޔުއްވާފައިވެ އެވެ. ވަހީދުގެ މެއިލް، އެޕްސްޓީން ފޯވާޑު ކުރި ކަމަށް ކޯޓުގެ ލިޔެކިޔުންތަކުން ބުނަނީ އޭރު ޖޭޕީ މޯގަންގެ ކޯޕަރޭޓް އެންޑް އިންވެސްޓްމަންޓް ބޭންކުގެ ސީއީއޯ ޖެސް ސްޓޭލީ އަށެވެ.
ވަހީދު، އެޕްސްޓީން އަށް މެއިލް ފޮނުވިތާ މަހެއް ފަހުން އޮގަސްޓު 31، 2012 ގައި ޗައިނާއިން ރާއްޖެއަށް 500 މިލިއަން ޑޮލަރުގެ ލޯނެއް ދީފައިވެ އެވެ. އެ ހަބަރު ބައިނަލްއަގުވާމީ މީޑިއާ، ރޮއިޓާސް އިން ރިޕޯޓުކޮށްފައިވާއިރު އެ ކަމަށް ކޯޓުގައި ވަނީ ރިއާޔަތްކޮށްފަ އެވެ.
މިކަމާ ގުޅިގެން ވަހީދުގެ ބަހެއް ހޯދުމަށް ކުރި މަސައްކަތް މިހާތަނަށް ކާމިޔާބުވެފައި ނުވެ އެވެ.
މިކަން ފެންމަތިވެފައި މިވަނީ ކުޑަކުދިންނަށް ޖިންސީ ގޯނާ ކުރުމުގެ ބޮޑު ރިންގެއް ހިންގަމުންދިޔަ ޖެފްރީ އެޕްސްޓީން އާއި ރާއްޖޭގެ ކުރީގެ ރައިސަކާ އެކު ބައްދަލުވުމެއް ތާވަލުކުރިކަން އިންޓަނެޓުގައި ލީކުކޮށްލި އީމެއިލްތަކަކުން ހާމަވެފައި ވަނިކޮށެވެ.
އިޒްރޭލުގެ ބޮޑުވަޒީރުކަން 1999 އިން 2001 އަށް ކުރި އިހުދު ބަރާކްގެ އީމެއިލްތަކެއް މީގެ ދެ ދުވަސް ކުރިން ވަނީ ޓެލެގްރާމްގައި ލީކުކޮށްލާފަ އެވެ. އެކަން ކުރި ކަމަށް ބެލެވެނީ އީރާންގެ އިންޓެލިޖެންސް ހިދުމަތްތަކާ ގުޅުން އޮތް ހެކަރުންގެ ގްރޫޕަކުންނެވެ. އޭގެ ތެރޭގައި ހިމެނެނީ 2007 އިން 2016 އަށް އޭނާ ކޮށްފައިވާ އެެއްލައްކަށްއަށްވުރެ ގިނަ އީމެއިލް އެވެ.
"އައި ހޭވް ޕީޓާ ތިއެލް އޮން ދަ 19 އިން އެންވައި، އިފް ޔޫ ލައިކް، އޭޒް ވެލް އޭޒް ދަ ފޯމާ ޕްރެޒިޑެންޓް އޮފް ދަ މޯލްޑިވްސް،" އެޕްރީލް 28، 2014 ގައި އިހުދު ބަރާކް ކުރި އީމެއިލަކަށް ހަމަ އެ ދުވަހު ފޮނުވި ޖަވާބެއްގައި ވަކި ރައީސެއްގެ ނަން ހާމަނުކޮށް އެޕްސްޓީން ލިޔުނެވެ.
އެ ތާރީހާ ހަމައަށް ރާއްޖޭގައި ރައީސަކަން ކުރެއްވި ތިން ބޭފުޅަކު ތިއްބެވި އެވެ. އެއީ، ކުރީގެ ރައީސް މައުމޫން އަބްދުލްގައްޔޫމް އާއި ކުރީގެ ރައީސް މުހައްމަދު ނަޝީދު އަދި ވަހީދު އެވެ. އޭގެ ތެރެއިން އެއްވެސް ބޭފުޅަކީ އެޕްސްޓީންއާ ގުޅުމެއް އޮތްކަން ހާމަވެފައިވާ ބޭފުޅުންނެއް ނޫނެވެ.
ނަޝީދު ވަނީ އެޕްސްޓީން އާއި ބައްދަލުކުރިކަން ދޮގުކުރައްވާފަ އެވެ. އަދި، އެކަން ކުރީ ވަހީދު ކަމަށް ބުނެ ސޯޝަލް މީޑިއާގައި މީހަކު ކޮށްފައިވާ ޕޯސްޓެއް ވެސް އެމަނިކުފާނު ވަނީ ހިއްސާ ކުރައްވާފަ އެވެ.
ކުޑަކުދިންނަށް ޖިންސީ ގޯނާކުރާ ކަމުގެ ތުހުމަތުގައި އެޕްސްޓީންއާ ދެކޮޅަށް ތަހުގީގު ފެށީ 2005 ވަނަ އަހަރު އެވެ. ޖޫން 2008 ގައި އޭނާގެ މައްޗަށް 18 މަސްދުވަހު ޖަލު ހުކުމެއް އިއްވިއިރު 13 މަސްދުވަހަށް ފަހު އޭނާ މިނިވަންވި އެވެ. އެހެންކަމުން ރާއްޖޭގެ ކުރީގެ ރައީސަކު އެޕްސްޓީން އާއެކު ބައްދަލުވުމެއް ބޭއްވިނަމަ އެ ބައްދަލުވުމެއް ބާއްވާފައިވަނީ އޭނާގެ މައްޗަށް ކުޑަކުއްޖަކަށް ހަށި ވިއްކުމަށް މަޖުބޫރު ކުރުވުމުގެ ކުށް ސާބިތުވެފައި ވަނިކޮށެވެ.
ޖުލައި 2019، ގައި ސެކްސް ޓްރެފިކިން ތުހުމަތުގައި އޭނާ އަލުން ހައްޔަރުކުރި އެވެ. އަދި، ޖެހިގެން އައި އޮގަސްޓު މަހުގެ 10 ވަނަ ދުވަހު ޖަލު ގޮޅީގައި ހުއްޓައި އޭނާ ކުއްލި ގޮތަކަށް މަރުވި އެވެ. އެއަށް ފަހު އޭނާގެ މައްޗަށް ކުރި ދައުވާތައް އަނބުރާ ގެންދިޔަ އެވެ.
