ރައްޔިތުންގެ މަޖިލީހުގެ މެންބަރުން ވެސް އިސްލާމްދީނުގެ އަސްލަކާ ހިލާފުވެއްޖެ ނަމަ ހައްޔަރުކޮށް ދައުވާ އުފުލޭނެ ކަމަށް ކުރީގެ ބަންޑާރަނައިބު ޑރ. އަލީ ސަވާދު ވިދާޅުވެއްޖެ އެވެ.
އެކްސްގައި ސަވާދު ކުރެއްވި ޕޯސްޓެއްގައި ވަނީ ބައެއް ނޫސްވެރިން އުލުބައިންދަންޖެހޭ ކަމަށް ވިދާޅުވެ ފަލާހު ދެއްކެވުމުން ވެސް މަޖިލިސް މެންބަރުންނަށް ލިބިދޭ އިމްތިޔާޒާއި ބާރުގެ ދަށުން އޭނާއަށް ހިމާޔަތް ލިބޭތޯ ސުވާލު އުފައްދަވައިފަ އެވެ.
"މީހުންގެ އަބުރު ކަތިލާ ނޫސްވެރިން އުލުބައިންދަންޖެހޭ ކަމަށް މަޖިލީހުގެ މެންބަރަކު ވިދާޅުވުމުން ވެސް މަޖިލީހުގެ އިމްތިޔާޒުގެ ދަށުން ހިމާޔަތް ލިބޭނެތޯ؟ އިސްލާމްދީނުގެ އަސްލަކާ ހިލާފަށް ވޯޓެއް ދެއްވިޔަސް ބިލެއް ހުށަހެޅުއްވިޔަސް ވާހަކައެއް ދެއްކިޔަސް މަޖިލިސް މެންބަރުން ހާޒިރުކޮށް، ހައްޔަރުކޮށް ތަހުގީގުކޮށް ދައުވާ ވެސް އުފުލޭނެ،" ސަވާދު ވިދާޅުވި އެވެ.
މަޖިލިސް ގަވާއިދުގެ 64 ވަނަ މާއްދާގައި ބަޔާން ކޮށްފައި އޮޮންނަނީ މަޖިލީހުގައި މެންބަރުން ވާހަކަދައްކަވަން ޖެހޭނީ އިސްލާމްދީނުގެ އަސްލަކާ ހިލާފު ނުވެ ކަމަށެވެ.
ގާނޫނުއަސާސީގެ 274 ވަނަ މާއްދާގައި "އިސްލާމްދީނުގެ އަސްލު" ވަރަށް ތަފުސީލުކޮށް މާނަ ކޮށްދީފައިވެ އެވެ.
titledesc
ސަވާދު ވިދާޅުވީ މީހުންނަށް ލާއިންސާނީ އަދަބު ދިނުމާ ދެކޮޅަށް ދީނީ އެތައް ފަތުވާއެއް ނެރެފައިވާ ކަމަށެވެ. އަދި އެކަމަކީ ނަހީ ކުރައްވާފައިވާކަން ބަޔާން ކުރައްވައި ރަސޫލާ ހަދީސް ވެސް ކުރައްވާފައިވާ ކަމަށް ސަވާދު ވިދާޅުވި އެވެ.
"ކޮންމެ މީހެއްގެ ވެސް އާއިލާ އާއި ނަމާއި އަބުރު ރައްކާތެރި ކުރުމަކީ މުހިންމު ކަމެއް، އަދި ކުރަން ވެސް ޖެހޭ ކަމެއް، އެކަމަކު އެއީ އަދި އެހެން ބަޔަކަށް ލާއިންސާނީ އަދަބު ދިނުމަށް ގޮވައިލަން ލިބޭ ލައިސެންސެއް ނޫން،" ސަވާދުގެ ޕޯސްޓުގައި ލިޔުއްވާފައިވެ އެވެ.
އެތައް ބަޔަކު ނުރުހުންވެ ފާޑުކިޔަމުން ދަނީ ބައެއް މީޑިއާތަކުން މަސައްކަތް ކުރާ ގޮތުން އެ މީޑިއާގެ މުވައްޒަފުން އުލުބައިންދަން ޖެހޭ ކަމަށް ވެރިކަން ހިންގާ ޕްރޮގްރެސިވް ޕާޓީ އޮފް މޯލްޑިވްސްގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު އިއްޔެ މަޖިލީހުގައި ވިދާޅުވުމުންނެވެ.
މިނިވަން މީޑިއާ ނެތިކޮށްލަން ހުށަހަޅާފައިވާ ބިލަށް ވާހަކަ ދައްކަވަމުން ފަލާހު ވިދާޅުވީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް މީގެ ކުރިން ފަތުރާފައިވާ ކަމަށެވެ. އަދި ވިދާޅުވީ އެގޮތަށް މަސައްކަތް ކުރާ މީޑިއާގެ މުވައްޒަފުން އުލުބައިންދަންޖެހޭ ކަމަށެވެ.
"... މި ލެވެލުގައި މަސައްކަތް ކުރީމަ މީޑިއާ ގެންގޮސް ޖަލަކަށް ނޫން [ލާންވީ]، އުލުބައިންދަންވަނީ. އުލުބައިންދަންވީ،" ފަލާހު ވިދާޅުވި އެވެ.
ދިވެހި ރަދީފުގައި ބުނެފައިވާ ގޮތުން އުލުބޭންދުމަކީ އިހު ޒަމާނުގައި މީހުން މަރަން ގެންގުޅުނު ލާއިންސާނީ އުކުޅެކެވެ. އުލުބައިންދާއިރު ތޫނުކޮށްފައި ހުންނަ ދަގަނޑު އުލެއްގައި މަރާލަން ބޭނުންވާ މީހާ ބައިންދާ ފުރަގަސް ފަރާތުން އޫ ހަރާލުމަށްފަހު ބޮލުން ދަގަނޑު ނެރެނީ އެވެ.
