ކޮލޮމްބޯ، ސްރީލަންކާ (އޮގަސްޓު 22) - އަމިއްލަ ދަތުރެއްގެ ހަރަދުތައް ހަމަޖައްސަން ދައުލަތުގެ ފައިސާ ބޭނުންކުރި މައްސަލެއްގެ ތުހުމަތުގައި ލަންކާގެ ކުރީގެ ރައީސް ރަނިލް ވިކްރަމަސިންހަ މިއަދު ހައްޔަރުކޮށްފި އެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި ރަނިލް ހައްޔަރުކުރީ އޭނާއާ ސުވާލުކުރަން ކޮލަމްބޯގައި ހުންނަ ކްރިމިނަލް އިންވެސްޓިގޭޝަން ޑިޕާޓުމަންޓަށް ހާޒިރުވުމުންނެވެ.
ދައުލަތުގެ ފައިސާ ނަހަމަ ގޮތުގައި ބޭނުންކުރި ކަމުގެ ތުހުމަތު އަމާޒުވާ ދަތުރުގައި ރަނިލް ވަޑައިގެންނެވީ އިނގިރޭސިވިލާތުގެ ލަންޑަނުގައި އޮތް ޔުނިވާސިޓީއެއްގެ ދަސްވެނިވުމުގެ ރަސްމިއްޔާތަކަށެވެ. އޭނާ މި ރަސްމިއްޔާތަށް ވަޑައިގެންނެވީ ސެޕްޓެމްބަރު 23، 2023 ގަ އެވެ.
މި މައްސަލަ ތަހުގީގުކުރަމުންދާ އިންވެސްޓިގޭޓަރުންނާ ހަވާލާދީ ލަންކާގައި ނިއުސްވަޔާގައި ވަނީ، ރަނިލް ލަންޑަނަށް ވަޑައިގެންނެވީ އެހެން ގައުމުތަކަކަށް ކުރެއްވި ރަސްމީ ދަތުރެއްގެ ތެރެއިން ކަމަށެވެ.
ރަނިލްއަކީ ލަންކާގައި ސިޔާސީ ގޮތުން ވަރަށް ނުފޫޒުގަދަ ބޭފުޅެކެވެ. އޭނާ ވަނީ އެ ގައުމުގެ ބޮޑުވަޒީރު ކަން ފަސް ފަހަރެއްގެ މަތިން ކުރައްވާފަ އެވެ.
ލަންކާގައި މިހާރު ވެރިކަން ކުރަމުން އަންނަ ސަރުކާރުން އަންނަނީ އެ ގައުމުގައި ހިންގާފައި ހުރި ހިޔާނާތްތަކަށް ހާއްސަ ސަމާލުކަމެއް ދީގެން ތަހުގީގުކުރަމުންނެވެ.
މީގެ ކުރިން ވަނީ ޕާލިމެންޓުގެ ކުރީގެ ބައެއް މެންބަރުން ވެސް ހައްޔަރުކޮށްފަ އެވެ. މި ގޮތުން ހައްޔަރު އަމަރު ނެރުނު މެންބަރުންގެ ތެރޭގައި ލަންކާގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން، ނަމަލް ރާޖަޕަކްސަ ވެސް ހިމެނިވަޑައިގަންނަވަ އެވެ.
