މެންޗެސްޓާ (އޮގަސްޓް 22) - މެންޗެސްޓާ ޔުނައިޓެޑް މިހާރު ކުރިއަށްދަނީ ރަނގަޅު މިސްރާބުން ކަމަށާއި މި ވަގުތު އެ ޓީމު ދޫކޮށްލުން ވާނީ މޮޔަ ކަމަކަށް ކަމަށް އިނގިރޭސި ޑިފެންޑަރު، ހެރީ މެގުއާ ބުނެފި އެވެ.
މީގެ ފަސް ވަރަކަށް އަހަރު ކުރިން، 2019 ވަނަ އަހަރު ލެސްޓާ ސިޓީ އިން 93 މިލިއަން ޑޮލަރަށް، ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާ ގުޅުނު މެގުއާ، 32، ދޫކޮށްލަން މިދިޔަ ދެ ސީޒަނުގައި ވެސް ޔުނައިޓެޑުން މަސައްކަތް ކުރި އެވެ.
މިދިޔަ އަހަރު ޔުނައިޓެޑުން ވަނީ ވެސްޓް ހޭމް ޔުނައިޓެޑަށް މެގުއާ ވިއްކާލަން އަގަކާ މެދު ވެސް އެއްބަސްވެފަ އެވެ. އެކަމަކު، އެ ޑީލަށް މެގުއާގެ ރުހުން ނުލިބިގެން އެ ޓްރާންސްފާ ނުހިނގި އެވެ.
ޔުނައިޓެޑްގައި އޭނާގެ ކެރިއަރާއި އެ ކްލަބްގެ މިހާރުގެ ހާލަތާ ބެހޭގޮތުން ވާހަކަދައްކަމުން މެގުއާ ބުނީ، ޔުނައިޓެޑްގައި މިހާރު ކަންކަން ބަދަލުވަމުން އަންނަ ކަމަށާއި އާ ކޯޗު ރުބެން އަމޮރިމް ބޭނުންވާ ސިސްޓަމަކަށް ކަންކަން ހޭނެމުން އަންނަ ކަމަށެވެ.
"އަހަންނަށް މި ކްލަބްގައި ވަރަށް ކަންކަން ފެނިއްޖެ، މިހާރު އާ ކޯޗު (އަމޮރިމް) ބޭނުންވާ ކަންކަން ޔަގީނުން ވެސް މިދިޔަ ސީޒަނުގައެއް ނުދޭ. ވަރަށް ގިނަ ކަންކަމަށް ހައްލު ގެނެސްގެން އޭނާ މަސައްކަތް ކުރަމުން އެ އަންނަނީ، މިހާރު މި ޓީމު މިދާ މިސްރާބު އަހަންނަށް ފެންނަނީ ރަނގަޅަށް، އެހެންވީމަ ގަބޫލުކުރެވެނީ މި ވަގުތު މި ޓީމު ދޫކޮށްލުމަކީ މޮޔަ ކަމަކަށް ވާނީ،" އަންނަ ސީޒަނުގެ ނިޔަލަށް ޔުނައިޓެޑްގެ ކޮންޓްރެކްޓްގައި ހުރި މެގުއާ ބުންޏެވެ.
މެގުއާ ބުނީ، އާ ކޮންޓްރެކްޓެއްގެ ވާހަކަ ޔުނައިޓެޑުން އަދި ދައްކާފައިނުވި ނަމަވެސް އެ ކަމަށް ވަގުތު އެބައޮތް ކަމަށެވެ. އަދި، މި ފަހަރުގެ ޓްރާންސްފާގައި ޔުނައިޓެޑުން އެއްވެސް ޑިފެންޑަރަކު ނުވިއްކާނެކަން ކްލަބުން އަންގާފައިވާ ކަމަށާއި ޖެނުއަރީ ޓްރާންސްފާ ތެރޭގައި ކަންކަން ބަދަލުވުމުގެ ފުރުސަތު އެބައޮތް ކަމަށް މެގުއާ ވަނީ ބުނެފަ އެވެ.
ހަލް ސިޓީ އާއި ލެސްޓާ ސިޓީ އަށް ކުރިން ކުޅުނު މެގުއާ ވަނީ ޔުނައިޓެޑާ ގުޅުނު ފަހުން އެ ޓީމަށް 247 މެޗު ކުޅެދީފަ އެވެ. މީގެ ކުރިން، މެގުއާ ވަނީ ޔުނައިޓެޑްގެ ކެޕްޓަންކަން ކޮށްފަ އެވެ. އެކަމަކު، އޭނާގެ ޓްރާންސްފާ ކަންތައްތަކެއް ކުރިއަށްދާތީވެ، މީގެ އެއް އަހަރު ކުރިން، ކެޕްޓަންކަން ބްރޫނޯ ފެނާންޑޭސް އަށް ދޭން ޔުނައިޓެޑުން ނިންމީ އެވެ.
