ލޯތްބާއި މަގުބޫލުކަން ލިބިފައިވާ އެމެރިކާގެ ކުރީގެ ފަނޑިޔާރު ފްރޭންކް ކެޕްރިއޯ، އުމުރުން 88 އަހަރުގައި ނިޔާވެއްޖެ އެވެ.
އެމެރިކާގެ ޕްރޮވިޑެންސް އަވަށުގެ ކުރީގެ ފަނޑިޔާރު ކެޕްރިއޯ ނިޔާވީ ޕެންކްރިއެޓިކް ކެންސަރަށް ފަރުވާ ހޯއްދަވަމުން ގެންދަވަނިކޮށް ކަމަށް އޭނާގެ އާއިލާގެ ނެރުނު ބަޔާނުގައިވެ އެވެ.
ޕްރޮވިޑެންސް މުނިސިޕަލް ކޯޓުގެ ފަނޑިޔާރުކަން 1985 އިން 2023 އަށް ކުރެއްވި ކެޕްރިއޯ މަޝްހޫރު ވެގެން ދިޔައީ "ކޯޓް އިން ޕްރޮވިޑެންސް (Caught in Providence)" ނަމުގައި ގެނެސްދިން ޝަރީއަތްތަކުގެ އަޑުއެހުންތަކުގެ ވީޑިއޯތަކުންނެވެ.
ޓްރެފިކްގެ ކުދި ކުދި ކުށްތަކުގައި ދޭ ދީލަތި މައާފާއި، ބަހައްޓަވާ ހަމްދަރުދީ އާއި ޖޫރިމަނާ ދެއްކުމަށް ދޭ ލުއި ފަސޭހަކަމާއި ކޯޓު ރޫމަށް ގެންނަ ކުޑަކުދިންނާމެދު ގެންގުޅުއްވި އޯގާތެރިކަމާއި ކޯޓު ރޫމުގައި ވާހަކަ ދައްކަވާ ސަކަ ގޮތުން އަދި މީހުންނަށް ދެއްވާ ހިތްވަރުން ކެޕްރިއޯގެ މަގުބޫލްކަން އިތުރުވެ، އާންމުންގެ ލޯބި ލިބުނެވެ.
އެހެންވެ، އޭނާ މަޝްހޫރު ވެގެން ދިޔައީ ދުނިޔޭގެ އެންމެ ރަނގަޅު ފަނޑިޔާރުގެ ގޮތުގަ އެވެ.
ކެޕްރިއޯ އެންމެ ފަހުން އިންސްޓަގްރާމަށް ދޫކޮށްލި ވީޑިއޯގައި އެދިވަޑައިގެންފައި ވަނީ އޭނާ އަށް ހެޔޮދުއާ ކޮށް ދިނުމަށެވެ.
