މިނިވަން ނޫސްވެރިކަން ނައްތައިލުމަށް މަޖިލީހަށް މިހާރު ހުށަހަޅާފައިވާ ބިލު ފާސްކޮށްފި ނަމަ، މިނިވަން ނޫސްވެރިކަމުގެ ދިފާއުގައި ޖަލަށް ދާން ވެސް ތައްޔާރުކަމަށް ނޫސްވެެރިން ބުނެފި އެވެ.
ސަރުކާރު އަޑީގައި އޮވެގެން ރައްޔިތުންގެ މަޖިލީހަށް އެ ބިލު ހުށަހެޅުއްވީ އަމިއްލަ މެންބަރެއް ކަމުގައިވާ، ތުޅާދޫ ދާއިރާގެ މެންބަރު އަބްދުލްހައްނާން އަބޫބަކުރެވެ. މިއީ އޭނާ މި ފަދަ ބިލެއް މަޖިލީހަށް ހުށަހެޅުއްވީ ދެ ވަނަ ފަހަރެވެ.
މިނިވަން ނޫސްވެރިކަމުގެ ދިފާއުގައި މޯލްޑިވްސް ޖާނަލިސްޓް އެސޯސިއޭޝަނުން ރޭ އެކްސް ސްޕޭސްގައި ކުރިއަށް ގެންދިޔަ ލައިވްގައި ވާހަކަދައްކަމުން އެމްޖޭއޭގެ ސެކްރެޓަރީ ޖެނެރަލް، ނާއިފް އަހުމަދު ބުނީ މަޖިލީހުގައި މިހާރު އޮތް މީޑިއާ ކޮންޓްރޯލް ބިލް ފާސްކޮށްފި ނަމަ މުޒާހަރާ ކުރަން ނޫސްވެރިން ތައްޔާރު ކަމަށެވެ.
"މީޑިއާ ކޮންޓްރޯލް ބިލް މަޖިލީހުން ފާސްކޮށްފި ނަމަ މުޒާހަރާ ކުރަން މިއަދު އޮތް އަޅުގަނޑުމެންގެ ވޯކިން ގްރޫޕް ބައްދަލުވުމުގައި ނިންމާފައި ވަނީ، ބިލް ފާސްކޮށްފި ނަމަ ޖަލަށް ދާން ވެސް ތައްޔާރަށޭ ޖުންދު ބުނި އަޅުގަނޑު ކައިރީ މިއަދު، އެހެންވީމަ އެގޮތަށް އަޅުގަނޑުމެން މި ތިބީ،" ނާއިފް ބުންޏެވެ.
މިނިވަން ނޫސްވެރިކަން ނައްތައިލަން މަޖިލީހަށް މިހާރު ހުށަހަޅާފައި އޮތް ބިލް ބަލައި ނުގަތުމަށް އެމްޖޭއޭ އާއި ނޫސްވެރިންގެ އިތުރުން މީޑިއާ ކައުންސިލް މެންބަރުން ގުޅިގެން ހަދާފައިވާ ވޯކިން ގްރޫޕުން އިއްޔެ ވަނީ ނިންމައިފަ އެވެ.
އިއްޔެ ހަވީރު އޮތް އެ ބައްދަލުވުމުގައި ނިންމާފައި ވަނީ މިނިވަން ނޫސްވެރިކަން ނައްތައިލުމަށް ހުށަހަޅާފައިވާ މީޑިއާ ކޮންޓްރޯލް ބިލާ ދެކޮޅަށް ސޯޝަލްމީޑިއާ އާއި އެ ނޫން ވެސް މަންސަތަކުގައި އަޑު އުފުލައި ކަންބޮޑުވުން ފާޅު ކުރުމަށެވެ. އެ ކަންބޮޑުވުންތަކަށް ބެލުމެއް ނެތި މަޖިލީހުން އެ ބިލް ފާސްކޮށްފި ނަމަ މުޒާހަރާ ކުރުމަށް ވެސް ވޯކިން ގްރޫޕުން އިއްޔެ ވަނީ ނިންމައިފަ އެވެ.
މީޑިއާތައް ނައްތާލާ ބިލުގެ ގޮތުގައި މީޑިއާތަކާއި ނޫސްވެރިން ސިފަކުރަމުން އަންނަ ބިލާ މެދު ކަންބޮޑުވުންތައް ހުއްޓަސް، މި ބިލުގެ ބަހުސްގައި ބައިވެރިވި ސަރުކާރު މެންބަރުންގެ ރޫހު ހުރީ ބިލު ފާސްކުރާ ގޮތަށެވެ. އަދި ބިލު ދިރާސާކުރަމުންދާ މަރުހަލާގެ ތެރޭގައި މީޑިއާތަކުން ކަންބޮޑުވާ ކަމެއް ހުރި ނަމަ އެ ކަންކަން އޮޅުން ފިލުވަން މީޑިއާތަކާ ބައްދަލުކުރާނެ ކަމަށް ވެސް ބައެއް މެންބަރުން ވިދާޅުވި އެވެ.
މަޖިލީހުގެ މި ދައުރު ނިންމާލާ ޗުއްޓީއަށް ދިޔައީ، މި ބިލު އިތުރަށް ދިރާސާކުރުމަށް ފަހު އެ ބިލުގެ ބަހުސް ކުރިއަށް ގެންދާނެ ކަމަށް މަޖިލީހުގެ ރިޔާސަތުން ކަނޑައެޅުމަށް ފަހުގަ އެވެ.
ބިލުގައި އޮތް ގޮތުން މި ބިލު ގާނޫނަކަށް ވުމުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.
މީޑިއާ އެންޑް ބްރޯޑްކާސްޓިން ކޮމިޝަނުގައި ތިބޭނީ ހަތް މެންބަރުންނެވެ. އޭގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަން ކުރާ މެންބަރުންނެވެ. އަނެއް ހަތަރު މެންބަރުންނަކީ މީޑިއާތަކުގެ ފަރާތުން އިންތިހާބު ކުރާ މެންބަރުންނެވެ. މި އިންތިހާބުގައި ވޯޓު ލެވެނީ ރަޖިސްޓްރީ ކުރިތާ ފަސް އަހަރު ވެފައިވާ މީޑިއާތަކަށެވެ. މި ކޮމިޝަނަށް ރައީސަކު އައްޔަނުކުރުމުގެ ބާރު ލިބެނީ ރައީސުލްޖުމްހޫރިއްޔާއަށެވެ.
ބިލުގައިވާ ގޮތުން ބޮޑެތި ބާރުތަކެއް އަލަށް އުފައްދާ ކޮމިޝަނަށް ލިބޭނެ އެވެ. އޭގެ ތެރޭގައި، 100،000 ރުފިޔާއާ ހަމައަށް މީޑިއާތައް ޖޫރިމަނާ ކުރުމާއި މައްސަލައެއް ބަލައި ނުނިމެނީސް ވެސް ވަގުތީ ގޮތުން ރަޖިސްޓްރީ ބާތިލު ކުރުން ހިމެނެ އެވެ. އަދި ފަހުން ކޯޓަށް ގޮސްގެން ވެސް ނޫހެއްގެ ރަޖިސްޓްރީ ބާތިލު ކުރެވިދާނެ ކަމަށް ބުނެފައިވެ އެވެ.
އަލަށް އުފައްދާ ކޮމިޝަނަށް މެންބަރުން އައްޔަން ކުރެވެންދެން، ކޮމިޝަން ހިންގާނީ ސިވިލް ސާވިސް ކޮމިޝަނުން ކަނޑައަޅާ ފަސް މެންބަރުންގެ ކޮމިޓީއަކުންނެވެ. ސިވިލް ސާވިސް ކޮމިޝަނަކީ ސަރުކާރުގެ ކޮންޓްރޯލް އޮންނަ ކޮމިޝަނެކެވެ.
އާ ކޮމިޝަނަށް ލިބިދޭ އިތުރު ބާރުތަކުގެ ތެރޭގައި، މީޑިއާތަކުގެ ސުލޫކު ކަނޑައެޅުމާއި ނޫސްތައް ރަޖިސްޓްރީ ކުރުމާއި ނޫސްވެރިންގެ ދަފުތަރެއް އެކުލަވާލުމާއި މީޑިއާ މޮނީޓާ ކުރުމާއި ބްރޯޑްކާސްޓު ކުރުމަށް ލައިސަންސް ދޫކުރުން ހިމެނެ އެވެ.
