ލަންޑަން (އޮގަސްޓް 16) - އިނގިރޭސި ޕްރިމިއާ ލީގުގެ އާ ސީޒަނުގައި މެންޗެސްޓާ ސިޓީ އާއި ޓޮޓެންހަމް ހޮޓްސްޕާސް އިން ކުޅުނު ފުރަތަމަ މެޗުތަކުން ތަފާތު ބޮޑުކޮށް މޮޅުވެ، ފެށުން ވަރުގަދަކޮށްފި އެވެ.
ޓޮޓެންހަމް އިން 3-0 އިން ބާންލީ ބަލިކުރިއިރު، ރަށުންބޭރުގައި ސިޓީން ވަނީ 4-0 އިން ވުލްވްސްގެ މައްޗަށް ބޮޑު މޮޅެއް ހޯދައިފަ އެވެ.
އަމިއްލަ ދަނޑުގައި ކުޅުނު ޓޮޓެންހަމް އިން މި ފަހަރު ޕްރޮމޯޓްވި ބާންލީ ބަލިކުރިއިރު، ތަރި އަކީ ރިޗާލިސަން އެވެ. މި މެޗުގައި ރިޗާލިސަން ދެ ގޯލު ޖެހިއިރު، މި ދެ ލަނޑަށް ވެސް ފުރުސަތު ތަނަވަސްކޮށްދިނީ ވެސްޓް ހޭމް ޔުނައިޓެޑް އިން ޓޮޓެންހަމާ ގުޅުނު ގާނާގެ ފޯވާޑް މުހައްމަދު ކުޑޫސް އެވެ.
މެޗުގެ ދެ ވަނަ ހާފުގައި ޓޮޓެންހަމްގެ ފަހު ގޯލު ޖެހީ، ޕަޕޭ މަޓަ ސާ ދިން ބޯޅައަކުން ބްރެނަން ޖޯންސަން އެވެ.
ވުލްވްސް ދަނޑުގައި ސިޓީގެ އާލިން ބްރައުޓް ހާލަންޑް ދެ ގޯލު ޖެހިއިރު، މީގެ ތެރެއިން އެއް ލަނޑު ޖަހަން ފުރުސަތު ތަނަވަސްކޮށްދިނީ، މި މެޗުގައި ލަނޑެއް ވެސް ޖެހި، ނެދަލެންޑްސްގެ ޓިޖާނީ ރައިންޑާސް އެވެ. އޭސީ މިލާން ދޫކޮށް ސިޓީއާ ގުޅުނު ރައިންޑާސް ވަނީ މި މެޗުގައި މޮޅު ކުޅުމެއް ދައްކައިފަ އެވެ.
ސިޓީން މި މެޗުގައި ޖެހި ފަހު ގޯލު ކާމިޔާބުކުރީ ލިޔޯން ދޫކޮށް އެ ޓީމަށް މި ފަހަރު ބަދަލުވި ފްރާންސްގެ ފޯވާޑް، ރަޔާން ޗާކީ އެވެ. ވުލްވްސް އިން ފޮނުވާލި ރަނގަޅު ހަމަލާތަކެއް މި މެޗުގައި ސިޓީގެ ގޯލު ބެލެހެއްޓި ޖޭމްސް ޓްރަފޯޑް ވަނީ މަތަކޮށްފަ އެވެ.
އަލަށް ޕްރޮމޯޓްވި ސަންޑަލެންޑުން ވަނީ އަމިއްލަ ދަނޑުގައި، 3-0 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. ބްރައިޓަން އިން މޮޅުވާން ދަނިކޮށް އިތުރު ވަގުތުގައި ލަނޑު ޖަހައި، ފުލަމް އިން ވަނީ 1-1 އިން އެއްވަރުކޮށްފަ އެވެ. އަދި، ނިއުކާސަލް ޔުނައިޓެޑާއި އެސްޓަން ވިލާގެ މެޗު ނިމުނީ 0-0 އިން އެއްވަރުވެގެންނެވެ.
