ޕެރިސް (އޮގަސްޓް 10) - ޕީއެސްޖީން ލިލް އަށް ކުޅޭ ފްރާންސް ގައުމީ ޓީމުގެ ގޯލްކީޕަރު، ލޫކަސް ޝެވަލިއޭ ގަނެފައިވާއިރު، ޕީއެސްޖީގެ އިޓަލީ ގޯލްކީޕަރު، ޖިއަންލުއީޖީ ޑޮނަރުންމާ، އެ ޓީމު ދޫކޮށްލުމުގެ ފުރުސަތު ބޮޑުވެއްޖެ އެވެ.
އުމުރުން 23 އަހަރުގެ ޝެވަލިއޭ ގަންނަން ޔޫރަޕްގެ ޗެމްޕިއަން، ޕީއެސްޖީން ޖުމްލަ އެކު، 60 މިލިއަން ޑޮލަރު ހަރަދުކުރާނެ އެވެ. އެއީ، އެންމެ ފުރަތަމަ ލިލް އަށް ދޭ 45 މިލިއަން ޑޮލަރާއި، އޭގެ އިތުރުން ބަހާލައިގެން ދައްކަން އެއްބަސްވި 15 މިލިއަން ޑޮލަރެވެ.
ޝެވަލިއޭ، ޕީއެސްޖީއާ އެކު ސޮއިކޮށްފައިވަނީ، ފަސް އަހަރުގެ ކޮންޓްރެކްޓެއްގަ އެވެ.
ޕީއެސްޖީން އޭނާ އަށް އިތުބާރުކޮށް، އެންމެ މަތީ ލެވަލްގައި ކުޅެން ފުރުސަތު ފަހިކޮށްދިނީތީވެ، ޝެވަލިއޭ ވަނީ ޕީއެސްޖީގެ މެނޭޖްމަންޓަށް ޝުކުރު އަދާކޮށްފަ އެވެ. އަދި، އޭނާގެ ކެރިއަރުގައި ކުރިއަށްދިއުމަށް މުހިންމު ކަންތައްތަކެއް ހާސިލްކުރަން މަގުފަހިކޮށްދީފައިވާތީ، ލިލް އަށް ވެސް ޝެވަލިއޭ ވަނީ ޝުކުރުއަދާކޮށްފަ އެވެ.
ލިލްގައި ކެރިއަރުގެ ބޮޑުބައި ހޭދަކުރި ޝެވަލިއޭ ވަނީ ލޯން އެއްބަސްވުމެއްގެ ދަށުން ވެލެންސިއެނެސް އަށް ކުޅެފަ އެވެ.
ޕީއެސްޖީން ޝެވަލިއޭ ގަތުމާ އެކު، ޑޮނަރުންމާގެ މުސްތަގުބަލާ ގުޅޭ ސުވާލުތައް ވަނީ އިތުރުވެފަ އެވެ. .
އުމުރުން 26 އަހަރުގެ ޑޮނަރުންމާއާ އެކު، ޕީއެސްޖީން ހަދާފައި އޮތް ކޮންޓްރެކްޓް އޮތީ އަންނަ އަހަރުގެ ޖޫން މަހުގެ ނިޔަލަށެވެ.
ޑޮނަރުންމާ، މި ވަގުތު ޕީއެސްޖީގައި ހުރީ ސީޒަނަކު 11 މިލިއަން ޑޮލަރުގެ މުސާރަ އަކަށެވެ. ޕީއެސްޖީން އެންމެ ފުރަތަމަަ، އާ ކޮންޓްރެކްޓާ އެކު ހުށަހެޅި ޑީލުގައި ބޯނަހާ އެކު ވެސް ޑޮނަރުންމާ އަށް ލިބޭނީ 11 މިލިއަން ޑޮލަރެވެ. އެހެންވެ، އޭނާ ވަނީ އެއްބަސްވުން އާ ކުރަން ދެކޮޅު ހަދައިފަ އެވެ.
ރިޕޯޓްތައް ބުނާގޮތުން، މިހާރު ޕީއެސްޖީން ނިންމާފައިވަނީ ޑޮނަރުންމާ އަށް އާ ކޮންޓްރެކްޓެއް ނުދީ އޭނާ ދޫކޮށްލުމަށެވެ.
