ޕެރިސް (ޖުލައި 28) - އިޓަލީގެ ގޯލްކީޕަރު، ޖިއަންލުއީޖީ ޑޮނަރުންމާގެ ކޮންޓްރެކްޓް އާ ކުރަން ޕީއެސްޖީން ކުރި މަސައްކަތުގައި އަލިމަގެއް ނުފެނި، އޭނާ ވިއްކާލަން އެ ކްލަބުން މަޝްވަރާތައް ފަށާފައިވާއިރު، ގިނަ ކްލަބްތަކަކުން ޝައުގުވެރިކަން ފާޅުކޮށްފި އެވެ.
އުމުރުން 26 އަހަރުގެ ޑޮނަރުންމާއާ އެކު، ޕީއެސްޖީން ހަދާފައި އޮތް ކޮންޓްރެކްޓް އޮތީ އަންނަ އަހަރުގެ ޖޫން މަހުގެ ނިޔަލަށެވެ. ޑޮނަރުންމާ، މި ވަގުތު ޕީއެސްޖީގައި ހުރީ ސީޒަނަކު 11 މިލިއަން ޑޮލަރުގެ މުސާރަ އަކަށެވެ. އާ ކޮންޓްރެކްޓާ އެކު ޕީއެސްޖީން ހުށަހެޅި ޑީލުގައި ބޯނަހާ އެކު ވެސް ޑޮނަރުންމާ އަށް ލިބޭނީ 11 މިލިއަން ޑޮލަރެވެ. އެހެންވެ، އޭނާ ވަނީ އެއްބަސްވުން އާ ކުރަން ދެކޮޅު ހަދައިފަ އެވެ.
ޕީއެސްޖީން ވަނީ ލިލްގެ ގޯލްކީޕަރު، ލޫކަސް ޗެވަލިއޭ ގަންނަން 40 މިލިއަން ޑޮލަރު އިންވެސްޓްކުރަން ނިންމައިފަ އެވެ. ފްރާންސްގެ ލެކިއުޕޭ ނޫހުން ރިޕޯޓްކުރާގޮތުގައި، ޗެވަލިއޭ ގަންނަން ޕީއެސްޖީން މަސައްކަތް ވަރުގަދަކުރީ ޑޮނަރުންމާ އެ ޓީމު ދޫކޮށްލުމުގެ ފުރުސަތު އޮތުމުންނެވެ.
ޑޮނަރުންމާ ގަންނަން ޗެލްސީ، މެންޗެސްޓާ ސިޓީ އަދި މެންޗެސްޓާ ޔުނައިޓެޑުން ބިޑްކުރުމުގެ ފުރުސަތު އެބައޮތެވެ.
ޕީއެސްޖީން މި ސީޒަނުގައި ޔުއެފާ ޗެމްޕިއަންސް ލީގާއި ފްރާންސްގެ ތިން މުބާރާތުގެ ތަށި ހޯދިއިރު ޑޮނަރުންމާ ވަނީ ގިނަ މެޗުތަކެއްގައި މޮޅު ކުޅުމެއް ދައްކައިފަ އެވެ.
ޒުވާން އުމުރެއްގައި އޭސީ މިލާނުގެ ފުރަތަމަ ޓީމަށް ކުޅެން ފެށި ޑޮނަރުންމާ، އެ ޓީމު ދޫކޮށްލީ 2021 ވަނަ އަހަރު ހިލޭ ޓްރާންސްފާއެއްގަ އެވެ. މިހާތަނަށް ޕީއެސްޖީ އަށް 161 މެޗު ކުޅެދީފައިވާއިރު، އެ ޓީމާ އެކު، 10 ޓްރޮފީ ހޯދި އެވެ.
